مەملەكەت باسشىسى رەتىندە مەن ءوزىمنىڭ مىندەتىمدى جانە جاۋاپكەرشىلىگىمدى تەرەڭ سەزىنەمىن - ق. توقايەۆ
«ءبىز ەلباسىمىزدىڭ ارقاسىندا تاۋەلسىز، قۋاتتى مەملەكەت قۇردىق. قازاقستان حالىقارالىق جۇيەدە وزىنە لايىقتى ورنىن الدى. ءبىزدى ىقپالدى جانە بەلدى مەملەكەت رەتىندە بۇكىل الەم مويىندايدى. قازىرگى تاڭدا تاريحي كەزەڭدى باستان وتكەرىپ وتىرمىز. جوعارى بيلىك زاڭدى جانە بەيبىت جولمەن اۋىستى. بۇكىل الەم قوعامداستىعى وسى وقيعانى تۇسىنىستىكپەن جانە قۇرمەتپەن قابىلدادى. مەملەكەت باسشىسى رەتىندە مەن ءوزىمنىڭ مىندەتىمدى جانە جاۋاپكەرشىلىگىمدى تەرەڭ سەزىنەمىن»، - دەدى ق. توقايەۆ.
مەملەكەت باسشىسى پرەزيدەنت لاۋازىمىنا كىرىسكەننەن باستاپ وڭىرلەردى ارالاپ جۇرگەنىن اتاپ ءوتتى.
«حالىقتىڭ كوڭىل- كۇيىن جاقسى بىلەمىن. زيالى قاۋىممەن، ەڭبەك ۇجىمدارىمەن، بيزنەس وكىلدەرىمەن، ينۆەستورلارمەن، حالىقارالىق تۇلعالارمەن كەزدەستىم. ءبىز ەلباسىنىڭ سارا جولىمەن جۇرەمىز. حالقىمىز - ءبىرتۇتاس. تاۋەلسىزدىگىمىزدىڭ ەڭ جوعارى قۇندىلىعى رەتىندە مەملەكەتىمىزدىڭ ىرگەسى مىعىم. الداعى پرەزيدەنت سايلاۋى وسىعان دالەل بولۋى كەرەك. سوندىقتان، ەلدەگى قوعامدىق- ساياسي كەلىسىمدى قامتاماسىز ەتىپ، العا باسۋ ءۇشىن، الەۋمەتتىك- ەكونوميكالىق ماقسات- مىندەتتەردى لايىقتى جۇزەگە اسىرۋ ءۇشىن بىزگە ايقىندىق قاجەت. ونىڭ ۇستىنە، الەمدەگى احۋال بۇلىڭعىر بولىپ تۇر. بۇل وتانىمىزدىڭ قاۋىپسىزدىگىنە سىن- قاتەر اكەلۋى مۇمكىن»، - دەدى قر پرەزيدەنتى.
ق. توقايەۆ ىشكى جانە سىرتقى ساياساتتاعى ساباقتاستىق پەن تۇراقتىلىقتى ساقتاپ، ەلباسى ۇسىنعان الەۋمەتتىك باعدارلامالاردى ويداعىداي ءساتتى ءارى ءتيىمدى ىسكە اسىرۋىمىز كەرەكتىگىنە باسا نازار اۋداردى.
«ول ءۇشىن اتالعان تاعدىرلى شەشىمدى قابىلدادىم»، - دەدى مەملەكەت باسشىسى.
اۆتور: مارلان جيەمباي
