ەلوردا كاسىپكەرلەرى جەردى العاش رەت ەلەكتروندىق اۋكسيون ارقىلى الدى

نۇر-سۇلتان. قازاقپارات - نۇر-سۇلتان قالاسىندا كاسىپكەرلەرگە كوشە ساۋداسىن جۇرگىزۋ ءۇشىن جەر ۋچاسكەلەرى العاش رەت ەلەكتروندىق اۋكسيون ارقىلى ۇلەستىرىلدى.

بۇل تۋرالى «Astana» ا ك ك» ا ق- نىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات.

كاسىپكەرلىك سۋبەكتىلەرىنە كوشە ساۋداسىن جۇرگىزۋ ءۇشىن جەر ۋچاسكىلەرىن ۇلەستىرۋ العاش رەت www.gosreestr.kz پورتالىندا جۇرگىزىلدى.

«Astana» ا ك ك» مالىمەتى بويىنشا، ەلەكتروندىق پلاتفورما ءوتىنىش بەرۋدەن باستاپ ەلەكتروندىق ساۋداداعى قاتىسۋ، حاتتاماعا قول قويۋ پروتسەستەرىنە دەيىن تۇگەل قامتۋعا مۇمكىندىك بەردى. ياعني اۋكسيونعا قاتىسۋ ءۇشىن ارنايى بەلگىلەنگەن ورىنعا بارۋدىڭ قاجەتتىلىگى بولعان جوق. ساۋداعا قاتىسۋ ءۇشىن ءوتىنىش قالدىرۋ، پورتالداعى جەكە كابينەتكە كىرۋ، سونداي-اق حاتتاماعا قول قويۋ ە س ق (ەلەكتروندىق ساندىق قولتاڭبانىڭ) كومەگىمەن جۇزەگە اسىرىلدى.

«اتالمىش ەلەكتروندىق پلاتفورما جەر ۋچاسكەلەرىن قوسالقى جالگەرلىككە بەرۋ اۋكسيونىن العاش رەت وتكىزدى. بۇعان دەيىن پورتالدا جەكە يەلىككە بەرىلەتىن مۇلىك ساۋداعا قويىلاتىن. جەر ۋچاسكەلەرىن ۇلەستىرۋ اۋكتسيونىنىڭ ءساتتى ءوتۋى ەڭ الدىمەن، شاعىن جانە ورتا بيزنەس وكىلدەرى اراسىندا «1000 ورىن - كوشە ساۋداسى» جوباسىنا سۇرانىستىڭ جوعارى ەكەندىگىن جانە اۋكسيون وتكىزۋ تاسىلىنە سەنىم بولعاندىعىن كورسەتەدى. ءبىز «1000 ورىن - كوشە ساۋداسى» باعدارلاماسى اياسىندا ساۋدا ورىندارىن ۇلەستىرۋ پروتسەسىن بارىنشا اشىق جۇرگىزۋدى كوزدەيمىز. قولدانىستاعى ساندىق تەحنولوگيا قۇجاتتار توپتاماسى جانە رەەستردە زاڭسىز وزگەرىستەر ەنگىزۋگە جول بەرمەيدى. جەر ۋچاسكەلەرىنىڭ ءتىزىمى بارلىق مۇددەلى تاراپتارمەن كەلىسىلگەن، ال باعدارلاما قاتىسۋشىسىنا قويىلاتىن جالعىز تالاپ - قولدانىستاعى زاڭناما تالاپتارىنا ساي ارەكەت ەتۋ»، - دەپ اتاپ ءوتتى «Astana» ا ك ك» ا ق باسقارما ءتوراعاسىنىڭ ورىنباسارى تەمىرلان نۇرعيسايەۆ.

بۇعان دەيىن «Astana» ا ك ك نۇر-سۇلتان قالاسىندا كوشە ساۋداسىن جۇرگىزۋگە ساۋدا پاۆيلوندارىن ورنالاستىرۋ ءۇشىن جەر ۋچاسكەلەرىن سۋبارەنداعا الۋ جونىندە وتىنىشتەر قابىلدانا باستاعانىن حابارلاعان بولاتىن. ول 20- ناۋرىز - 4- ءساۋىر ارالىعىندا ءوتتى. اۋكسيونعا بارلىعى 10 جەر ۋچاسكەسى قويىلدى. وعان قاتىسۋ ءۇشىن بارلىعى 81 كاسىپكەردەن ءوتىنىش قابىلداندى.

ساۋداعا قويىلعان جەر ۋچاسكەلەرىنىڭ نىسانالى ماقساتى - موبيلدى ساتۋ نۇكتەسىن (كوكونىس، جەمىس-جيدەك)، ستاتسيونارلىق ەمەس ازىق-تۇلىك ونىمدەرىن ساتۋ نۇكتەسىن (نان-توقاش ونىمدەرى، ءسۇت پەن شۇجىق ونىمدەرى)، دايىن تاماق ونىمدەرىن ساتۋ نۇكتەسىن (سۋسىندار، بالمۇزداق، فاست-فۋد) ورنالاستىرۋ.