باۋىرجان مومىش ۇلى كىمدەردى ونەگە تۇتقان؟

نۇر-سۇلتان. قازاقپارات - ماعان باياعىدا ءبىر ستۋدەنت: «ءسىز كىمنەن ونەگە الاسىز؟» - دەپ سۇراق قويعاندا، «مەن قورقاقتاردان، قاڭعىباستاردان، ماسكۇنەمدەردەن، ومىردە قاتەلەسكەن، جولى بولماعان جانداردان ونەگە الام» - دەپ جاۋاپ بەرگەم.

الگى ستۋدەنت تاڭ قالىپ:

- مۇنىڭىز قالاي؟ ونەگەنى جاقسى ادامداردان الۋ كەرەك ەمەس پە؟ - دەدى قايتا سۇراق بەرىپ.

- قورقاقتار دا، قاڭعىباستار مەن ماسكۇنەمدەر دە دۇنيەگە مەن سياقتى، سەن سياقتى پاك كۇيىندە كەلگەن. كەيىن ولار ءومىردىڭ قيىنشىلىعىمەن كۇرەسە المادى. سودان تاسقا سوعىلعان شولمەككە ۇقساپ بىت-شىتى شىقتى.

«جاقسىلىق اعاش باسىندا، جاماندىق اياق استىندا» دەگەن قازاقتا اتالى ءسوز بار. ەڭ وڭاي نارسە - جاماندىق، وعان جەتۋ ءۇشىن كوپ ويلانۋدىڭ، كوپ كۇش جۇمساۋدىڭ قاجەتى شامالى. جامان جولعا ءتۇسۋ دە وڭاي. ولار سول وڭاي جولمەن كەتتى. مەن اداسپاس ءۇشىن ولاردىڭ قاتەلىكتەرىنەن دە ونەگە الام.

باۋىرجان مومىش ۇلى

«مەن - حالقىمنىڭ باۋىرجانىمىن» كىتابىنان