نىعماتۋلين قاتارداعى پارلامەنتارالىق وداق اسسامبلەياسىندا ءسوز سويلەدى
ءماجىلىستىڭ باسپا ءسوز قىزمەتىنىڭ مالىمەتىنشە، دۇنيەجۇزىنەن كەلگەن پارلامەنت وكىلدەرىنىڭ جىل سايىنعى كەزدەسۋىنىڭ باستى تاقىرىبى - بەيبىتشىلىك، قاۋىپسىزدىك، زاڭ ۇستەمدىگى جانە ورنىقتى دامۋ بولعان.
الەمنىڭ 178 ەلىنىڭ پارلامەنت وكىلدەرىن بىرىكتىرەتىن پارلامەنتارالىق وداق سياقتى حالىقارالىق بەدەلدى الاڭدا وسى ماسەلەلەردى تالقىلاۋ جالپىعا ورتاق ادامزاتتىق قۇندىلىقتاردىڭ تەك قانا ماقسات ەمەس، سونىمەن بىرگە زاماناۋي كوپتەگەن قاتەلەردىڭ الدىن الۋدىڭ ءتيىمدى جولى بولماق.
ءماجىلىس سپيكەرى نۇرلان نىعماتۋلين اتاپ وتكەندەي، ەلىمىز تاۋەلسىزدىكتىڭ العاشقى كۇننەن باستاپ بەيبىتشىلىكتى، كەلىسىمدى، قاۋىپسىزدىكتى ساقتاي وتىرىپ، جالپى ادامزاتتىق قۇندىلىقتارعا قۇرمەتتەۋ قاراۋ يدەياسىنىڭ جاقتاۋشىسى.
«بۇل - ەلىمىزدى ەڭ دامىعان الەمدەگى 30 ەلدىڭ قاتارىنا كىرۋ ماقساتىن قويعان قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆتىڭ ەرەن ەڭبەگى ەكەنى ءسوزسىز»، - دەدى نۇرلان نىعماتۋلين.
ول قازاقستاننىڭ جانە ەلىمىزدىڭ تۇڭعىش پرەزيدەنتىنىڭ تۇراقتى دامۋ ماقساتتارىنا جەتۋگە باعىتتالعان باستامالارعا نازار اۋداردى.
بۇل جولدا، ءماجىلىس ءتوراعاسى ءىس-قيمىلمەن ۇيلەستىرىلگەن بىرلەسكەن كۇش-جىگەردىڭ قاجەتتىگىنە توقتالدى.
«بۇل ماسەلەلەردى پارلامەنتارالىق وداق اسسامبلەياسى سياقتى ماڭىزدى ديالوگ الاڭىندا تالقىلاۋ ۇلتتىق زاڭنامالاردى بىرىزدەندىرۋ جانە جاقىنداستىرۋ ماقساتىندا ءبىزدىڭ ەلدەرىمىزدىڭ پارلامەنتتەرى اراسىنداعى ءوزارا ءىس قيمىلدى جان-جاقتى ىنتالاندىرۋعا، سونداي-اق زاڭنامالىق پراكتيكالار مەن يننوۆاتسيالىق زەرتتەۋلەر دەڭگەيىندە تاجىريبە الماسۋعا مۇمكىندىك بەرەدى»، - دەدى نۇرلان نىعماتۋلين.
اسسامبلەيانىڭ قورىتىندىسى اعىمداعى جىلدىڭ شىلدە ايىنا جوسپارلانعان تۇراقتى دامۋ جونىندەگى جوعارى دەڭگەي ب ۇ ۇ ساياسي فورۋمىنا قوسىلعان پارلامەنتتىك ۇلەس بولىپ تابىلادى.
ەسكە سالا كەتسەك، پارلامەنتارالىق وداق 1889-جىلى الەمدىك پارلامەنتتەردىڭ ءىس-ارەكەتىن ۇيلەستىرۋ ءۇشىن قۇرىلعان. وعان قازاقستان 1993-جىلى مۇشە رەتىندە قابىلداندى. وداق قازىرگى ۋاقىتتا 178 ەل مەن 12-ايماقتىق پارلامەنتارالىق ۇيىمداردى باس قوسادى.
