قازاقستاندىق ستۋدەنت «قارا سابىن» رەتسەبىن بيزنەسكە اينالدىرماق
بولاشاق دارىگەر بۇل سابىننىڭ قانداي قاسيەتى بار ەكەنىن قازاقپارات تىلشىسىنە ايتىپ بەردى.
24 جاستاعى ستۋدەنت داۋلەت يبرايەۆ قاراعاندى مەديتسينالىق ۋنيۆەرسيتەتىنىڭ 7-كۋرس ستۋدەنتى.
«سابىندى مەن ويلاپ تاپقان جوقپىن. بۇل كونەدەن كەلە جاتقان رەتسەپت. ءبىزدىڭ اتا-بابامىز وسى اتاقتى قارا سابىندى قايناتقان. 9 جىل بۇرىن وسىنى زەرتتەي باستادىم. بۇل - مەنىڭ مەكتەپتەن باستاپ جازىپ كەلە جاتقان جوبام. بۇل جۇمىسىم وبلىستىق عىلىمي سايىستا 3-ورىن الدى. ۋنيۆەرسيتەتكە كەلگەندە وسى تاقىرىپتى كەڭىنەن زەرتتەي ءتۇستىم. ۇزاق ۋاقىت بويى قالاي شىعارىلاتىنىن، تاريحىن زەرتتەدىم. ماقالالاردى وقىپ، بىرنەشە رەتسەپتىلەردى جيناپ، ءوزىم قايناتا باستادىم»، - دەدى داۋلەت.
بۇل سابىن دەرماتيت بورتپەلەرىن، اللەرگيالىق بورتپەلەردى ەمدەۋگە قولدانىلادى. پسورياز، اكنە دەگەن سياقتى اۋرۋلارعا دا شيپالى. تابيعي ءونىم بولعاندىقتان اللەرگيا تۋعىزبايدى.
«بۇرىننان بەتىمە بورتپە، اكنە شىعاتىن. قازىر وسى سابىندى قولعاننان باستاپ بەت تەرىسىم ىلعالدانىپ، كوپتەگەن دەفەكتىلەر كەتتى»، - دەدى داۋلەت يبرايەۆ.
بۇل ءونىم بويىنشا رەسمي مەديتسينالىق دالەلدەر بازاسى جوق.
«الەمدە مۇنداي سابىننىڭ بالاماسى بار دەگەندى ەستىمەدىم. ارينە، سابىندى قايناتۋ نەگىزى ءبىر. ءبىراق ءبىزدىڭ سابىن تولىق تابيعي بولىپ سانالادى. 2 كومپونەنت: مالدىڭ مايى مەن وسىمدىكتەردىڭ كۇلىنەن جاسالادى»، - دەدى ستۋدەنت.
داۋلەت سابىندى ۇيىندە قايناتادى. بۇل پروتسەسكە 1 كۇن ۋاقىت كەتەدى.
«سابىننىڭ ءپىشىنىن ءوزىمىز جاسايمىز. ساتۋمەن ءوزىم اينالىسامىن. قازاقستاننىڭ وڭتۇستىك باتىسىندا دا قايناتادى دەپ ەستىدىم. قازىر بۇل جوبانى تولىق بيزنەسكە اينالدىراتىن ويىم بار. ينۆەستورلاردان دا سۇرانىس ءتۇسىپ وتىر»، - دەدى ول.
