نۇر-سۇلتاندا قالالىق تۋريزم بويىنشا جاھاندىق سامميت وتەدى

نۇر-سۇلتان. قازاقپارات - قالا اكىمى باقىت سۇلتانوۆ پورتۋگاليا استاناسى ليسسابوندا وتكەن UNWTO- عا مۇشە ەلدەر قالالارىنىڭ باسشىلارى مەن تۋريزم مينيسترلەرىنىڭ فورۋمىندا نۇر-سۇلتان قالاسىن دۇنيەجۇزىلىك تۋريستىك ۇيىمنىڭ قالالىق تۋريزم بويىنشا 8- جاھاندىق سامميتىن وتكىزۋ ورنى رەتىندە تانىستىردى.

بۇل جايىندا شاھار باسشىسى فەيسبۋكتەگى پاراقشاسىندا جازدى، دەپ حابارلايدى قازاقپارات.

شاھار باسشىسى الدىمەن نۇر-سۇلتان قالاسىنىڭ حالىقارالىق دەڭگەيدەگى ءىس-شارالاردى وتكىزۋگە ارنالعان بارلىق قاجەتتى ينفراقۇرىلىمعا يە ەكەنىن اتاپ ءوتتى.

«سەۋل، كۋالا-لۋمپۋر، بارسەلونا، ماسكەۋ، ىستانبۇل سىندى تاماشا قالالاردان وسىنداي ماڭىزدى سامميتتىڭ ەستافەتاسىن قابىلداۋ جانە نۇر-سۇلتان قالاسىندا وسىنداي ايتۋلى ءىس-شارانى ۇيىمداستىرۋ ءبىز ءۇشىن ۇلكەن قۇرمەت. وتكەن جىلى ەلوردامىزدىڭ 20 جىلدىعى اتالىپ ءوتتى. قالا حالقى 3 ەسەگە ءوسىپ، ەلوردامىز 100 گە جۋىق ۇلت وكىلدەرىنىڭ ورتاق شاڭىراعىنا اينالدى. نۇر-سۇلتان - يۋنەسكونىڭ «الەم قالاسى» سىيلىعىنىڭ يەگەرى. وسىنىڭ بارلىعى قر تۇڭعىش پرەزيدەنتى - نۇرسۇلتان ءابىش ۇلى نازاربايەۆتىڭ جان-جاقتى قولداۋىنىڭ ارقاسىندا مۇمكىن بولدى. ەلباسىنىڭ ەلىمىز مەن ءبىزدىڭ قالامىزدىڭ دامۋىنا قوسقان وراسان زور ەڭبەگى ەسكەرىلە كەلە، ەلىمىزدىڭ ەلورداسى ونىڭ ەسىمىمەن اتالىپ، نۇر-سۇلتان قالاسى بولىپ وزگەرتىلدى»، - دەدى ول.

فورۋم اياسىندا باقىت سۇلتانوۆ پەن UNWTO- نىڭ باس حاتشىسى زۋراب پولوليكاشۆيلي «اقىلدى قالالار، اقىلدى باعىتتار» تاقىرىبىندا UNWTO- نىڭ قالالىق تۋريزم بويىنشا 8- جاھاندىق ءسامميتىن وتكىزۋ جونىندەگى كەلىسىمگە قول قويدى.

«نۇر-سۇلتان - بۇگىنگى تاڭدا الەمنىڭ ەڭ جاس جانە قارقىندى دامىپ كەلە جاتقان استانالارىنىڭ ءبىرى. ول ءوزىنىڭ قايتالانباس ساۋلەتى جانە بىرەگەيلىگىمەن، زاماناۋي ينفراقۇرىلىمى بار نىساندارىمەن ورتالىق ازيانىڭ ىسكەرلىك ءارى وقيعالى حابىنا اينالدى. ەگەر 20 جىل بۇرىن 3 قوناق ءۇي بولسا، قازىر ولاردىڭ سانى 231 گە جەتتى. ونىڭ ىشىندە تانىمال، الەمدىك جەلىلەردىڭ دە نىساندارى بار»، - دەدى اكىم.

وسى جىلدىڭ 7-11- قازانى كۇندەرى وتەتىن سامميتتە، سونداي-اق كونگرەسستەر مەن كونفەرەنتسيالاردىڭ حالىقارالىق قاۋىمداستىعىنىڭ (ICCA) ۇيىمداستىرۋىمەن ىسكەرلىك تۋريزم يندۋسترياسى (MICE) بويىنشا شەبەرلىك سىنىبى وتكىزىلەتىن بولادى.

ۇيىمداستىرۋشىلاردىڭ ايتۋىنشا، اتالعان ءسامميتتى وتكىزۋ - قالانى ورتالىق ازيانىڭ جاڭا تۋريزم ورتالىعى رەتىندە پاش ەتۋ، قالانى دامىتۋداعى جاڭا باعىتتاردى كورسەتۋ، ءىرى حالىقارالىق قاۋىمداستىقتار جانە كومپانيالارمەن ىنتىماقتاستىقتى نىعايتۋدىڭ زور مۇمكىندىگى.

ءوز كەزەگىندە UNWTO باس حاتشىسى زۋراب پولوليكاشۆيلي تۋريزمنىڭ قالا بولاشاعى دامۋىنىڭ اجىراماس بولىگى ەكەندىگىن ايتىپ ءوتتى.

«قازىر دە، بولاشاقتا دا قالا تۋريزمى ءوز ماڭىزدىلىعىن جويمايدى. تۋريزمدى قالالاردىڭ تۇراقتى بولاشاعىنىڭ اجىراماس بولىگى رەتىندە قالىپتاستىرۋ ماقساتىندا ۇلكەن مۇمكىندىكتەر ۇسىنا وتىرىپ، قالالىق تۋريزم بويىنشا UNWTO- نىڭ VIII جاھاندىق ءسامميتىنىڭ نۇر-سۇلتان قالاسىندا وتەتىندىگىنە قۋانىشتى ەكەنىمىزدى ايتقىم كەلەدى»، - دەدى ز. پولوليكاشۆيلي.

ايتا كەتەيىك، UNWTO - دۇنيەجۇزىلىك تۋريستىك ۇيىم، بۇۇ جۇيەسىنىڭ مەكەمەسى. ونىڭ قۇرامىنا 158 ەل، 6 قاۋىمداستىرىلعان جانە 500 دەن استام اففيليرلەنگەن مۇشە ەنگەن. ۇيىم قىزمەتىنىڭ نەگىزگى ماقساتى - تۋريزم سالاسىنىڭ جالپىعا قولجەتىمدى جانە تۇراقتى دامۋىن قامتاماسىز ەتۋ. ۇيىمنىڭ شتاب-پاتەرى يسپانيانىڭ مادريد قالاسىندا ورنالاسقان.