ليتۆانىڭ ءۇش قالاسىندا قازاقستاندىق فيلمدەر كورسەتىلە باستادى
ليتۆاداعى «قازاقستاندىق كينو كۇندەرى» شەڭبەرىندە قويىلعان فيلمدى رەسمي تۇلعالار، پارلامەنت دەپۋتاتتارى، ىسكەرلىك جانە اكادەميالىق توپتار وكىلدەرى، مادەنيەت قايراتكەرلەرى، سونداي-اق ليتۆادا تىركەلگەن ديپلوماتيالىق كورپۋس باسشىلارى تاماشالادى.
فەستيۆالدىڭ اشىلۋ سالتاناتىندا سويلەگەن سوزىندە ليتۆاداعى قازاقستان ەلشىسى ۆيكتور تەمىربايەۆ ناتيجەلى ىسكە اسۋداعى «رۋحاني جاڭعىرۋ» باعدارلاماسى مەن ەلباسىنىڭ «ۇلى دالانىڭ جەتى قىرى» اتتى ماقالاسىنىڭ ارقاسىندا ەلدىڭ مادەني-تاريحي الەۋەتى دامۋىنىڭ ءديناميزمىن اتاپ ءوتتى. بۇدان باسقا، قازاقستاندىق ديپلومات قازاقستان مەن ليتۆا، اسىرەسە جاڭا بۋىن وكىلدەرىنىڭ اراسىنداعى مادەني ديالوگتى تەرەڭدەتۋدىڭ قاجەتتىلىگىن العا تارتتى.
قازاقستان حالقىنىڭ تاريحتىڭ قيىن كەزەڭدەرىندەگى تاباندىلىعى مەن بيىك رۋحىن كورسەتەتىن «اناعا اپارار جول» كارتيناسى ليتۆالىق كورەرمەندەردى تاڭقالدىردى.
«قازاقستاندىق كينو كۇندەرى» اياسىندا ليتۆانىڭ ەڭ ۇلكەن ءۇش قالاسىندا (ۆيلنيۋس، كاۋناس، كلايپەدا) بارىمىزگە سۇيىكتى بولعان جانە الەم ساحنالارىن مويىنداتقان، سونداي-اق قازاقستاندىق كينوماتوگرافيانىڭ جاڭا تۋىندىلارى «اناعا اپارار جول»، «شال»، «تالان»، «الماس قىلىش»، «جاۋجۇرەك مىڭ بالا»، «كۇلتەگىن» انيماتسيالىق فيلمى جانە تاعى باسقا كينولار كورسەتىلەدى.
«ليتۆاداعى قازاقستاندىق كوكتەمنىڭ» شارالارى اراسىندا قازاقستاندىق- كانادالىق «Equus: جىلقى تاريحى» دەرەكتى فيلمىنىڭ كورسەتىلىمىن، ۆيلنيۋس ۋنيۆەرسيتەتىندەگى «ارقايىم» نەو-ەتنو-فولك توبىنىڭ كونسەرتىن، ليتۆانىڭ ءۇش قالاسىندا جانە لاتۆيا استاناسىندا وتەتىن قازاقستاندىق سۋرەتشى راۋزا ەراليەۆانىڭ كورمەسىن، سونىمەن قاتار قازاق ۇلتتىق ويىنى توعىزقۇمالاقتان ۆيلنيۋستە بولاتىن جارىستى اتاپ وتكەن ءجون.
