تالدىقورعان جاستارىنا بەس وڭىردەن جۇمىس ۇسىنىلدى

تالدىقورعان. قازاقپارات - تالدىقورعانداعى جاستارعا قىزمەت كورسەتۋ ورتالىعىندا ءوڭىرارالىق بوس جۇمىس ورىندار جارمەڭكەسى ءوتتى.

جەتىسۋلىق جاستارعا ەلىمىزدىڭ بەس وڭىرىنەن جۇمىس بەرۋشىلەر كەلىپ، ءوز ۇسىنىستارىن جاسادى، دەپ حابارلايدى قازاقپارات ءتىلشىسى.

ۇيىمداستىرۋشىلاردىڭ ايتۋىنشا، جارمەڭكەنىڭ باستى ماقساتى ەڭبەك رەسۋرستارىن دۇرىس پايدالانىپ، حالىقتى ءوز ەركىمەن قونىستاندىرۋ ارقىلى جۇمىسسىزدىقتى ازايتۋ. سونداي-اق جۇمىس بەرۋشىلەر مەن جۇمىس ىزدەۋشىلەردى بايلانىستىرىپ، ازاماتتاردى ناتيجەلى جۇمىسپەن قامتۋ.

بوس ورىندار جارمەڭكەسىنە سولتۇستىك قازاقستان، شىعىس قازاقستان، قوستاناي وبلىستارى مەن پاۆلودار، سەمەي قالالارىنان 60 جۇمىس بەرۋشى كەلدى. ولار 1800 ۆاكانسيا ۇسىندى. شاراعا قالالار مەن اۋدانداردان كەلگەن جۇمىسسىز ازاماتتار، پروباتسيا قىزمەتىندە ەسەپتە تۇرعان جاستار قاتىستى. جارمەڭكە قورىتىندىسى بويىنشا، 122 ادام باسقا وڭىرگە بارۋعا نيەتتەرىن ءبىلدىردى.