جەدەل جاردەم قىزمەتىن دەر كەزىندە پايدالانۋ ءۇشىن نە ىستەۋ كەرەك؟
اتالمىش ماتەريالدا ەلىمىزدىڭ مەديتسينا سالاسىندا جاسالىپ جاتقان جاڭا رەفورمالارعا سايكەس، ەمحاناعا تىركەۋ مەن جەدەل جاردەم قىزمەتىنىڭ قانداي تارتىپپەن جۇزەگە اسىرىلاتىنى كورسەتىلگەن.
«جىل سايىن قىركۇيەك-قاراشا ارالىعىندا ەمحاناعا تىركەۋ ناۋقانى ۇيىمداستىرىلادى. سوڭعى ەكى جىلدا ءداستۇرلى ناۋقاندى مەديتسينالىق ساقتاندىرۋ قورى وتكىزدى. وسىعان قاراي، ءبىز تۇرعىنداردى مۇمكىندىگىنشە ۇيلەرىنە جاقىن ماڭداعى ەمحانالارعا تىركەلۋ قاجەت ەكەندىگىن ەسكەرتىپ جاتىرمىز. مۇنىڭ سەبەبى جەدەل جاردەم قىزمەتىنىڭ تيىمدىلىگىمەن بايلانىستى. بىرىنشىدەن، بۇل ۇيدە كىشكەنتاي بالا نەمەسە قارت كىسىلەر اۋىرىپ قالعان جاعدايدا دارىگەر شاقىرۋعا ىڭعايلى. ەكىنشىدەن، جەدەل جاردەم سالاسىنداعى سوڭعى رەفورمالارعا بايلانىستى ەندى 4- ساناتتاعى شاقىرتۋلار بويىنشا قىزمەتتى جەرگىلىكتى ەمحانالار كورسەتەدى»، - دەيدى «الەۋمەتتىك مەديتسينالىق ساقتاندىرۋ قورى» ك ە ا ق باسقارۋشى ديرەكتورى زابيرا ورازاليەۆا.
ونىڭ سوزىنشە، وتكەن جىلى دەنساۋلىق ساقتاۋ مينيسترلىگى جەدەل جاردەم جۇيەسىن رەفورمالاۋعا كىرىستى.
«اتالعان رەفورما بويىنشا جەدەلدىگى جاعىنان 4- ساناتقا جاتاتىن شاقىرتۋلار جەرگىلىكتى ەمحانالارعا بەرىلدى»، - دەيدى مامان.
