گۇلشارا ءابدىقالىقوۆا باستاعان ۇكىمەت مۇشەلەرى رۋدنىي جۇمىسشىلارىمەن كەزدەستى

قوستاناي. قازاقپارات - ق ر پرەمەر-ءمينيسترىنىڭ ورىنباسارى گۇلشارا ءابدىقالىقوۆا باستاعان ۇكىمەت مۇشەلەرى قوستاناي وبلىسىنا جاساعان ساپارىنىڭ ەكىنشى كۇنى رۋدنىي قالاسىنا باردى، دەپ حابارلايدى قازاقپارات ءتىلشىسى.

الدىمەن گۇلشارا ءابدىقالىقوۆا ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆپەن بىرگە سوكولوۆ-سارىباي كەن ءوندىرۋ بىرلەستىگىنىڭ كادرلاردى وقىتۋ ورتالىعىنىڭ جۇمىسىمەن تانىستى. ورتالىق ديرەكتورىنىڭ مىندەتىن اتقارۋشى يليا پورحومەنكو ايتقانداي، قازىر مۇندا ماماندار 7 باعىت بويىنشا ءبىلىم الۋدا.

«كادرلاردى وقىتۋ ورتالىعى بىلىكتىلىكتى ارتتىرۋ، جۇمىستاعى تەحنيكالىق ساقتاندىرۋ، جاراقات الۋدىڭ الدىن الۋ، كوشباسشىلىققا باۋلۋ سەكىلدى باعىتتاردا جۇمىس ىستەيدى. ءبىلىم الۋشىلارعا بارلىق جاعداي جاسالعان، تەحنيكالىق جاعىنان قامتاماسىز ەتىلدى. وتكەن جىلى 51643 ماماندى قايتا وقىتىپ شىعاردىق. ونىڭ 3831 ءى تاجىريبەدەن وتكەن ماماندار»، - دەدى يليا پورحومەنكو.

ۆيتسە-پرەمەر رۋدنىيعا كەلگەن جۇمىس ساپارىنىڭ ماقساتىن ءتۇسىندىرىپ، كەن وندىرۋشىلەردىڭ ساۋالدارىنا جاۋاپ بەردى. ونىڭ ايتۋىنشا، قازىرگى ۋاقىتتا جالاقىنىڭ ۋاقىتىلى تولەنبەۋى ەڭبەك داۋلارىنىڭ تۋىنداۋىنا اكەلىپ سوقتىرادى.

«كاسىپورىن مەن جۇمىسشى اراسىنداعى ەڭبەك داۋلارىنىڭ 30 پروتسەنتى جالاقى قارىزىنا بايلانىستى تۋىندايدى. سودان سوڭ ەڭبەك قاۋىپسىزدىگىنە قاتىستى ماسەلەلەر. وسىعان بايلانىستى جۇمىس بەرۋشىلەر جىل سايىن جالاقىنى ءوسىرىپ وتىرعاندارى ءجون. سوڭعى 10 جىلدا ەلىمىزدە ورتاشا جالاقى 2,5 ەسەگە وسكەن. بۇل تۇرعىدا قوستاناي وبلىسى جاقسى جۇمىس اتقاردى»، - دەدى گۇلشارا ءابدىقالىقوۆا.

يليا پورحومەنكونىڭ سوزىنشە، سوكولوۆ-سارىباي كەن ءوندىرۋ بىرلەستىگى جۇمىسشىلارىنىڭ ورتاشا جالاقىسى - 220 مىڭ تەڭگە. ال ەكسكاۆاتورلار جوسپاردى ورىنداعاندا 320 مىڭ تەڭگەگە دەيىن الادى. ەڭ باستىسى، ايلىق كەشىكتىرىلمەي ۋاقىتىلى بەرىلەدى. جۇمىسشىلار بارلىق الەۋمەتتىك پاكەتكە يە بولادى.

ايتا كەتەيىك، ۇكىمەت مۇشەلەرىنىڭ وبلىسقا ساپارىنىڭ ماقساتى - ەلباسىنىڭ «الەۋمەتتىك قامقورلىق» جاڭا الەۋمەتتىك شارالارىنىڭ نەگىزگى باعىتتارىن ءتۇسىندىرۋ.