نۇر-سۇلتاندا ىشىمدىك ونىمدەرىن ساتۋدى شەكتەۋ تۋرالى ۇسىنىس جاسالدى
بۇل تۋرالى قالالىق اكىمدىكتە وتكەن ەلورداداعى ويىن-ساۋىق جانە تاماقتانۋ ورىندارىنداعى سانيتارلىق نورما مەن قوعامدىق ءتارتىپتى ساقتاۋ جونىندەگى وتىرىستا ايتىلدى، دەپ حابارلايدى ەلوردا ينفو.
پوليتسيا پولكوۆنيگى باقىتجان مالىبايەۆتىڭ مالىمەتىنشە، نۇر-سۇلتاندا كاراوكە-بار، تۇنگى كلۋب سياقتى مىڭنان اسا ويىن-ساۋىق ورىندارى جۇمىس ىستەيدى ەكەن. ال كوكتەم-جاز مەزگىلدەرىندە كوشەدەگى سىراحانالار قوسىلىپ، ولاردىڭ سانى تىپتەن ارتا تۇسەدى.
ال جەرگىلىكتى پوليتسيا قىزمەتى باسقارماسىنىڭ باستىعى عوسمان جاكيننىڭ ايتۋىنشا، جىل باسىنان بەرى باس قالاداعى ويىن-ساۋىق ورىندارىنان ىشكى ىستەر ورگاندارىنا 3500 دەن اسا شاقىرتۋ تۇسكەن.
ونىمەن قوسا، كەيبىر كاراوكە-بارلاردا مەملەكەتتىك ليتسەنزياسى بار كۇزەت قىزمەتى دە قاراستىرىلماعان. سونىڭ سالدارىنان اينالاسى قوقىسقا تولىپ، ءتارتىپ بۇزۋ دا ءجيى بولادى.
سونداي-اق، ماماندار كوپ قاباتتى تۇرعىن ءۇيدىڭ تومەنگى قاباتىندا ورنالاسقان كەيبىر ويىن-ساۋىق ورىندارى ءتيىستى زاڭدىلىقتى ساقتاماي، تۇرعىنداردىڭ تىنىشتىعىن بۇزاتىنىن ايتادى.
بۇل تۇرعىدا عوسمان جاكين قوعامدىق ءتارتىپ بۇزۋدى ازايتىپ، قىلمىستىڭ الدىن الۋ ءۇشىن الداعى ۋاقىتتا تۇنگى كلۋبتار مەن كاراوكە-بارلاردا، مەيرامحانالاردا تۇنگى ساعات 23:00 دەن ەرتەڭگى كۇنگى ساعات 8:00 گە دەيىنگى ارالىقتا الكاگول ونىمدەرىن ساتۋدى بەلگىلى ءبىر مولشەردە تىيۋدى ۇسىندى.