داۋرەن ابايەۆ ماسكەۋدە ق ر پرەزيدەنتىن قالاي كۇتىپ العانىن ايتىپ بەردى

None
None
نۇر- سۇلتان. قازاقپارات - اقپارات جانە قوعامدىق دامۋ ءمينيسترى داۋرەن ابايەۆ قازاقستان پرەزيدەنتى قاسىم- جومارت توقايەۆتىڭ رەسەيگە جاساعان رەسمي ساپارىندا قانداي كەلىسىمدەرگە قول جەتكىزىلگەنىن ءمالىم ەتتى، دەپ حابارلايدى قازاقپارات ءتىلشىسى.

«قاسىم- جومارت كەمەل ۇلىنىڭ قازاقستان پرەزيدەنتى رەتىندە رەسەيگە ساپارى وتە ءساتتى بولدى. مەملەكەت باسشىلارىنىڭ شاعىن جانە كەڭەيتىلگەن قۇرامدا كەزدەسۋى وتە سەنىمدى ءارى تاتۋ سيپاتتا ءوتتى. پرەزيدەنتتەر ساۋدادان باستاپ مادەني- گۋمانيتارلىق سالاعا دەيىنگى ماسەلەلەردىڭ كەڭ اۋقىمىن تالقىلادى. تاراپتار ەكىجاقتى قارىم- قاتىناستىڭ بۇرىن بەلگىلەنگەن قاعيداتتارىنان اينىمايتىنىن ءبىلدىردى»، - دەدى داۋرەن ابايەۆ «حابار» ارناسىنداعى «اشىق ديالوگ» باعدارلاماسىندا.

مينيستر ءوز سوزىندە تاراپتاردىڭ كەزدەسۋى بارىسىندا ءبىرقاتار ماڭىزدى قۇجاتتارعا قول قويىلعانىن اتاپ ءوتتى.

«اسىرەسە، وندىرىستىك كووپەراتسيا سالاسىندا بىرلەسە قولعا الىناتىن ارەكەتتەردىڭ باعدارلاماسىن ەرەكشە اتاپ وتەر ەدىم. ول قازاقستاندا كەڭىرەك كولىك قۇراۋعا جانە تراكتورلار مەن اۆتوبۋستاردىڭ، اۆتوكولىكتەردىڭ شىعارىلىمىن ارتتىرۋعا باعىتتالعان»، - دەيدى مينيستر.

اقپارات جانە قوعامدىق دامۋ ءمينيسترى سونىمەن بىرگە «قازاقستان پرەزيدەنتىن ماسكەۋدەگى اۋەجايدان لايىقتى دارەجەدە كۇتىپ المادى» دەگەن الەۋمەتتىك جەلىدەگى اڭگىمەگە قاتىستى ويىن ايتتى.

«بۇل جاعدايدا كەڭ تالقىلاۋدىڭ ەشقانداي قاجەتى جوق. شۋدىڭ ءبارى كەيبىر ب ا ق- تىڭ حابارلاماسىندا جۋرناليستەر پرەزيدەنتتى كۇتىپ العانداردىڭ ىشىندە ر ف سىرتقى ىستەر ۆيتسە- ءمينيسترى الەكساندر پانكيننىڭ بارىن ۇمىتىپ كەتكەننەن كەيىن باستالدى. بۇل رەتتە مەن ءبىر ماڭىزدى نيۋانستى تۇسىندىرە كەتكىم كەلەدى: ديپلوماتيادا ساپارلار دەڭگەيى جاعىنان مەملەكەتتىك، رەسمي جانە جۇمىس، بەيرەسمي دەپ بولىنەدى. ونىڭ اربىرىندە وزىندىك حاتتامالىق ەرەكشەلىك بار. ودان تايقۋعا بولمايدى. كەشە رەسمي ساپار بولدى. ونىڭ بارىسىندا ادەتتە اۋەجايدان ەلشىلەردىڭ نەمەسە حاتتامالىق قىزمەت باسشىلارىنىڭ دەڭگەيىندە كۇتىپ الادى. ءدال ءبىز دە سولاي ىستەيمىز. بۇعان قوسا رەسەيلىك تاراپ سىرتقى ىستەر ءمينيسترىنىڭ ورىنباسارىن جىبەرىپ وتىر. بۇل دەگەنىڭىز قوناققا دەگەن ۇلكەن قۇرمەتتى بىلدىرەدى»، - دەيدى مينيستر.

داۋرەن ابايەۆ ءوز سوزىندە مەملەكەت جانە ۇكىمەت باسشىلارى وزگە ەلدىڭ پرەزيدەنتتەرىن تەك مەملەكەتتىك ساپار بارىسىندا عانا كۇتىپ الاتىنىن ەسكەرتتى.

اۆتور: ايان بەكەن ۇلى

سوڭعى جاڭالىقتار