قاسىم- جومارت توقايەۆ ۆالەنتينا ماتۆيەنكومەن كەزدەستى
مەملەكەت باسشىسى رەسمي ساپارى اياسىندا رەسەي فەدەراتسياسى فەدەرالدىق جينالىسى فەدەراتسيا كەڭەسىندە بولىپ، كەڭەس ءتورايىمى ۆالەنتينا ماتۆيەنكومەن كەزدەستى، سونداي- اق قۇرمەتتى قوناقتار كىتابىنا قولتاڭبا قالدىردى.
كەزدەسۋ بارىسىندا قاسىم- جومارت توقايەۆ رەسەيگە العاشقى شەتەلدىك ساپارىنىڭ سيمۆولدىق ءمانى زور ەكەنىن ايتىپ، بۇل ءوزارا قۇرمەت پەن سەنىمگە نەگىزدەلگەن ەكىجاقتى ستراتەگيالىق سەرىكتەستىكتىڭ جوعارى دەڭگەيىن ايعاقتايتىنىن اتاپ ءوتتى.
- قازاقستاننىڭ جاڭا پرەزيدەنتى رەتىندەگى مەنىڭ مىندەتىم - ەلدەرىمىز اراسىنداعى وداقتاستىق قارىم- قاتىناستىڭ دامۋىنا مول ەڭبەك سىڭىرگەن ەلباسى نۇرسۇلتان نازاربايەۆتىڭ ستراتەگياسىنىڭ ساباقتاستىعىن قامتاماسىز ەتۋ، - دەدى مەملەكەت باسشىسى.
قاسىم- جومارت توقايەۆ ۆالەنتينا ماتۆيەنكونىڭ ت م د پارلامەنتارالىق اسسامبلەياسىنىڭ ءتوراعاسى لاۋازىمىنداعى قىزمەتىن جوعارى باعالاپ، فەدەراتسيا كەڭەسىنىڭ سپيكەرىنە ەكىجاقتى پارلامەنتتىك بايلانىستاردى نىعايتۋ جونىندەگى بىرلەسكەن جۇمىستارى مەن حالىقارالىق قۇرىلىمدار اياسىنداعى جەمىستى ىنتىماقتاستىق ءۇشىن ريزاشىلىق ءبىلدىردى.
سونىمەن قاتار، مەملەكەت باسشىسى ەكى ەلدىڭ ينتەگراتسيالىق كۇن ءتارتىبى اياسىندا ءوزارا ءىس- قيمىلداردى كەڭەيتۋ ماسەلەلەرىنە ارنايى توقتالدى.
- 29 - مامىردا نۇر- سۇلتان قالاسىندا ەۋرازيا ەكونوميكالىق وداعىنىڭ مەرەيتويلىق ءسامميتى وتەدى. قازاقستان رەسپۋبليكاسىنىڭ پرەزيدەنتى رەتىندە ەۋرازيالىق ينتەگراتسيانىڭ دامۋىنا بارىنشا جاعداي جاسايمىن. ءبىزدىڭ مەملەكەتتەرىمىزدىڭ پارلامەنتتەرى وسى ۇدەرىستەرگە زور ۇلەس قوسا الادى دەپ ويلايمىن، - دەدى قازاقستان پرەزيدەنتى.
ۆالەنتينا ماتۆيەنكو پارلامەنتارالىق قارىم- قاتىناستى نىعايتۋدىڭ ماڭىزدىلىعىن ايتىپ، وسى ساپار قازاقستان مەن رەسەيدىڭ ستراتەگيالىق سەرىكتەستىگىنە تىڭ سەرپىن بەرەتىنىنە سەنىم ءبىلدىردى.
- ءسىز كەستەڭىزدىڭ تىعىزدىعىنا قاراماستان، فەدەراتسيا كەڭەسىنە كەلۋگە ۋاقىت تاپقانىڭىز ءۇشىن ريزاشىلىعىمدى بىلدىرەمىن. ەكىجاقتى پارلامەنتتىك ءوزارا ءىس- قيمىلداردى جانە ت م د پارلامەنتارالىق اسسامبلەيا اياسىنداعى ىنتىماقتاستىقتى دامىتۋعا قوسقان جەكە ۇلەسىڭىز ءۇشىن سىزگە العىس ايتقىم كەلەدى، - دەدى ۆالەنتينا ماتۆيەنكو.
سوڭىندا ۆالەنتينا ماتۆيەنكو قاسىم- جومارت توقايەۆقا بيىلعى ءساۋىر ايىندا پارلامەنتارالىق اسسامبلەيانىڭ كەزەكتى وتىرىسى جوسپارلانعانىن جانە وسى جيىنعا قازاقستان رەسپۋبليكاسى پارلامەنتى سەناتىنىڭ ءتوراعاسى داريعا نازاربايەۆانىڭ شاقىرىلعانى تۋرالى ايتتى.
كەزدەسۋ سوڭىندا تاراپتار ەكىجاقتى ىنتىماقتاستىقتىڭ اۋقىمدى ماسەلەلەرى جونىندە پىكىر الماستى.
