قازاقستان مەن رەسەي اراسىنداعى ىنتىماقتاستىق جالعاسا بەرەدى - ق ر پرەزيدەنتى

نۇر-سۇلتان. قازاقپارات - قاسىم-جومارت توقايەۆ رەسەي فەدەراتسياسىنىڭ پرەزيدەنتى ۆلاديمير پۋتينمەن جۇرگىزگەن كەلىسسوزدەر قورىتىندىسى بويىنشا بۇقارالىق اقپارات قۇرالدارىنىڭ وكىلدەرى ءۇشىن بريفينگ وتكىزدى، دەپ حابارلايدى اقوردانىڭ باسپا ءسوز قىزمەتى.

قاسىم-جومارت توقايەۆ جۋرناليستەر الدىندا سويلەگەن سوزىندە قازاقستان رەسپۋبليكاسىنىڭ پرەزيدەنتى رەتىندە رەسەي فەدەراتسياسىنا جاساعان العاشقى ساپارىنىڭ سيمۆولدىق ءمانىن اتاپ ءوتىپ، ەكى ەل اراسىنداعى قارىم-قاتىناستاردىڭ ەرەكشە سيپاتىن ايتتى.

- ماسكەۋگە رەسمي ساپارمەن كەلۋگە شاقىرعان رەسەي فەدەراتسياسىنىڭ پرەزيدەنتى ۆلاديمير پۋتينگە، سونداي-اق قوناقجايلىق كورسەتىپ، جىلى قابىلداعانى ءۇشىن رەسەيلىك دوستارىمىزعا ريزاشىلىق بىلدىرەمىن. بۇل ساپار ەكى تاراپتىڭ دا وداقتاستىقتى ودان ءارى دامىتىپ، قازاقستان مەن رەسەي حالىقتارىنىڭ دوستىق بايلانىستارىن نىعايتۋعا ۇمتىلاتىنىن كورسەتتى، - دەدى مەملەكەت باسشىسى.

قاسىم-جومارت توقايەۆ قاتىسۋشىلارعا قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ مەملەكەت باسشىسى وكىلەتتىگىن توقتاتۋ تۋرالى شەشىمى جونىندە ايتتى جانە بۇل قادام قازاقستاننىڭ كەلەشەگى ءۇشىن جاسالعان ساياسي دانالىق پەن ۇلكەن جاۋاپكەرشىلىكتىڭ جارقىن ۇلگىسى بولىپ تابىلاتىنىن ەرەكشە اتاپ ءوتتى.

- بۇل تاريحي وقيعا الەمدىك قوعامداستىقتىڭ ءبىزدىڭ ەلىمىزگە زور قۇرمەتپەن قاراۋىنا تۇرتكى بولدى. بۇگىندە نۇرسۇلتان نازاربايەۆ بارشا قازاقستان حالقىنىڭ ىستىق ىقىلاسىنا بولەنىپ، قولداۋىنا يە بولىپ وتىر. ول ەلباسى مارتەبەسىندە قاۋىپسىزدىك كەڭەسىنىڭ جانە Nur Otan باسقارۋشى پارتياسىنىڭ ءتوراعاسى لاۋازىمىنداعى ءوزىنىڭ اۋقىمدى قىزمەتىن اتقارا بەرەدى، - دەدى قازاقستان پرەزيدەنتى.

مەملەكەت باسشىسى ءوزىنىڭ پرەزيدەنت رەتىندەگى قىزمەتى قازاقستان مەن رەسەي اراسىنداعى ىنتىماقتاستىقتىڭ «التىن عاسىرىندا» باستالعانىن اتاپ ءوتىپ، نۇر-سۇلتان مەن ماسكەۋدىڭ جان-جاقتى ديالوگىن نىعايتۋ جونىندەگى ستراتەگيالىق باعداردى جالعاستىرۋعا جانە بۇعان دەيىنگى قول جەتكىزىلگەن ۋاعدالاستىقتاردىڭ ساباقتاستىعىن قامتاماسىز ەتۋگە زور نيەتتەستىك بىلدىرەتىنىن ايتتى.

سونىمەن بىرگە، قاسىم-جومارت توقايەۆ قازاقستاندا رەسەي كاپيتالىنىڭ قاتىسۋىمەن مۇناي جانە حيميا، جەڭىل ونەركاسىپ، اۋىل شارۋاشىلىعى، اۆتوموبيل جانە تەمىرجول ماشينالارىن جاساۋ سالاسىنداعى 100 گە جۋىق بىرلەسكەن جوبالاردى ىسكە اسىراتىن 9 مىڭنان استام كاسىپورىننىڭ جۇمىس ىستەيتىنىن اتاپ كورسەتتى.

قازاقستان پرەزيدەنتى رەسەي تاراپىمەن اراداعى كەلىسسوزدەردىڭ تاقىرىبى بولعان ەكى ەلدىڭ ونەركاسىپ كووپەراتسياسى جانە ينۆەستيتسيالىق ىنتىماقتاستىق ماسەلەلەرىنە ارنايى توقتالدى.

- بۇگىن تاراپتار قول قويعان قازاقستان-رەسەي ونەركاسىپ كووپەراتسياسى سالاسىنداعى بىرلەسكەن ءىس-قيمىلدار باعدارلاماسى وسى باعىتتاعى جۇمىسقا تىڭ سەرپىن بەرەدى. بۇل باعدارلامانى جۇزەگە اسىرۋ تراكتورلاردىڭ، اۆتوبۋستاردىڭ، اۆتوموبيلدەر مەن باسقا دا كولىك قۇرالدارىنىڭ ءوندىرىسىن ارتتىرۋعا مۇمكىندىك بەرەدى، سونداي-اق ەلىمىزدە قوسىمشا جۇمىس ورىندارىن اشادى، - دەدى مەملەكەت باسشىسى.

مەملەكەت باسشىسى قازاقستان مەن رەسەيدىڭ گەوگرافيالىق ورنالاسۋ ەرەكشەلىگىنە توقتالا وتىرىپ، ەكى ەلدىڭ كولىك-ترانزيت الەۋەتى باسەكەگە قابىلەتتى ماڭىزدى باسىمدىق ەكەنىنە توقتالدى، سونداي-اق وسى مۇمكىندىكتى ءتيىمدى پايدالانۋ قاجەتتىگىنە نازار اۋداردى.

- ءبىزدىڭ ەلدەرىمىز ارقىلى ەۋرازيانىڭ باتىسى مەن شىعىسىن بايلانىستىراتىن «باتىس ەۋروپا - باتىس قىتاي» اۆتوماگيسترالى اسا ماڭىزدى كولىك كۇرە جولى بولىپ تابىلادى. ءبىز شەكارالىق رۇقساتتاما نۇكتەلەرى جۇمىسىنىڭ تيىمدىلىگىن ارتتىرۋ ماسەلەسىنە دە نازار اۋداردىق. بۇل ءبىزدىڭ ازاماتتارىمىزدىڭ شەكارا ارقىلى ءوتۋىن جەڭىلدەتۋگە مۇمكىندىك بەرەدى، سونداي-اق ءوڭىرارالىق ساۋدا-ساتتىقتى دامىتۋعا ىقپال ەتەدى، - دەدى قاسىم-جومارت توقايەۆ.

بۇدان بولەك، قازاقستان پرەزيدەنتى ەنەرگەتيكا جانە جانار-جاعارماي سەكتورىندا ءوزارا ءىس-قيمىل جاساۋدىڭ پەرسپەكتيۆالارىنا، سونداي-اق ەكى ەلدىڭ اسكەري-تەحنيكالىق جانە عارىش سالاسىنداعى ىنتىماقتاستىعىنا، سونىڭ ىشىندە بايقوڭىر قالاسىن گازبەن قامتاماسىز ەتۋ ماسەلەلەرىنە ارنايى توقتالدى.

مەملەكەت باسشىسى قازاقستان مەن رەسەيدىڭ تۋريزم سالاسىنداعى ىنتىماقتاستىعى تۋرالى ايتا كەلە، وسى سالانىڭ دامۋىنا قاجەتتى مۇمكىندىكتەردىڭ مول ەكەنىن اتاپ كورسەتتى جانە تۋريستىك، كولىك-لوگيستيكالىق ينفراقۇرىلىمدى دامىتۋ، سونداي-اق ەكى ەلدىڭ شيپاجايلارىن ناسيحاتتاۋ جۇمىستارىن جۇرگىزۋ قاجەتتىگىنە باسا نازار اۋداردى.

قازاقستان پرەزيدەنتى ەكىجاقتى مادەني-گۋمانيتارلىق بايلانىستاردى ودان ءارى نىعايتۋ ماسەلەلەرىنە دە توقتالدى.

- كەلىسسوزدەر بارىسىندا قازاقستاندا قولدانبالى عىلىمدارعا ارنالعان بىرلەسكەن وقۋ ورنىن اشۋ ماسەلەسى تالقىلاندى، قازاقستاندىق ارتىستەردىڭ سانكت-پەتەربۋرگتەگى مۋزىكا ۇيىندە ءبىلىم الۋى جانە قازاقستاننىڭ ۇلتتىق مۇراجايىندا ەرميتاج كۇندەرىن وتكىزۋ مۇمكىندىكتەرى قاراستىرىلدى، - دەدى قاسىم-جومارت توقايەۆ.

سوڭىندا قازاقستان پرەزيدەنتى جۇرگىزىلگەن كەلىسسوزدەردىڭ ناتيجەسىنە كوڭىلى تولاتىنىن ايتىپ، قول جەتكىزىلگەن كەلىسىمدەر قازاقستان مەن رەسەيدىڭ دوستاستىققا، سەنىمدىلىككە، تاتۋ كورشىلىككە جانە وداقتاستىققا نەگىزدەلگەن ىنتىماقتاستىعىن ودان ءارى نىعايتۋعا ىقپال ەتەتىنىنە سەنىم ءبىلدىردى.

ۆلاديمير پۋتين ءوز سوزىندە قاسىم-جومارت توقايەۆقا رەسەي فەدەراتسياسىنا العاشقى رەسمي ساپارمەن كەلگەنى ءۇشىن ريزاشىلىق ءبىلدىردى.

- كەلىسسوزدەر قازىرگى قازاقستان مەملەكەتىنىڭ نەگىزىن قالاۋشى، قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆپەن بىرلەسىپ جەمىستى جۇمىس ىستەگەن جىلداردا قالىپتاسقان داستۇرگە تولىعىمەن ساي كەلەتىن سىندارلى جانە ىسكەرلىك جاعدايدا جۇرگىزىلگەنىن اتاپ وتكىم كەلەدى، - دەدى ۆلاديمير پۋتين.

رەسەي پرەزيدەنتى قابىلدانعان بىرلەسكەن مالىمدەمەدە رەسەي مەن قازاقستاننىڭ كەڭ اۋقىمدى ستراتەگيالىق سەرىكتەستىگىن نىعايتۋدى كوزدەيتىن ءوزارا كەلىسىم كورىنىس تاپقانىن، سونداي-اق ونى ودان ءارى دامىتۋ ءۇشىن ناقتى جانە جاۋاپتى مىندەتتەر قويىلعانىن اتاپ ءوتتى.

- جەمىستى جانە مازمۇندى كەلىسسوزدەر ءۇشىن قازاقستان پرەزيدەنتىنە جانە قازاقستاننان كەلگەن ءبىزدىڭ ارىپتەس دوستارىمىزعا شىنايى ريزاشىلىعىمدى بىلدىرگىم كەلەدى. ءبىزدىڭ كەزدەسۋىمىزدىڭ ناتيجەلەرى باۋىرلاس ەكى ەل حالىقتارىنىڭ يگىلىگى ءۇشىن رەسەي مەن قازاقستاننىڭ وداقتاستىق قارىم-قاتىناستارىن نىعايتۋعا سەپتىگىن تيگىزەتىنىنە سەنىمدىمىن، - دەدى ۆلاديمير پۋتين.

***

ساپار قورىتىندىسى بويىنشا مىناداي قۇجاتتارعا قول قويىلدى:

1. قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ پەن رەسەي فەدەراتسياسىنىڭ پرەزيدەنتى ۆلاديمير پۋتيننىڭ بىرلەسكەن مالىمدەمەسى.

2. رەسەي-قازاقستان وندىرىستىك كووپەراتسياسى سالاسىنداعى بىرلەسكەن ءىس-قيمىل باعدارلاماسى.

3. قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى «بايقوڭىر» كەشەنىن گازبەن جابدىقتاۋ جونىندەگى كەلىسىم.

4. قازاقستان رەسپۋبليكاسىنىڭ سيفرلىق دامۋ، قورعانىس جانە اەروعارىش ونەركاسىبى مينيسترلىگى مەن رەسەي فەدەراتسياسىنىڭ ونەركاسىپ جانە ساۋدا مينيسترلىگى اراسىنداعى كاسىپورىنداردىڭ عىلىمي-تەحنيكالىق كووپەراتسياسى سالاسىنداعى ەكىجاقتى ىنتىماقتاسۋ جوسپارى.