الەۋمەتتىك جەلىدە قالاي تانىسۋ كەرەك؟

None
None
 نۇر-سۇلتان. قازاقپارات - قىزعا جازىلاتىن ەڭ ءبىرىنشى حابارلاما...

جەلىدە كوڭىلىڭنەن شىعىپ تۇرعان قىزبەن قاتىناس ورناتۋ، شىن ومىردەگىگە قاراعاندا الدەقايدا جەڭىل.

باقىتىڭ جانسا بىرەر ۋاقىتتىڭ ىشىندە «سۇيىكتىڭ» تۋرالى بارلىق اقپاراتتى بىلۋگە بولادى: قايدا جۇمىس ىستەيدى، قانداي فيلمدەردى ۇناتادى، قاي جانرداعى مۋزىكالاردى تىڭدايدى. ءبىراق، جەلىدەگى سول قىزدىڭ سىزگە نازارىن قالاي اۋدارۋعا بولادى؟ ەڭ ءبىرىنشى نە جازۋ كەرەك؟ وسى جانە وزگە دە امال- تاسىلدەر تۋرالى بۇگىن ءسوز ايتپاقپىز.

ەڭ الدىمەن، حابارلاما جازباس بۇرىن:

1. الەۋمەتتىك جەلىدەگى پاراقشامىزدى رەتكە كەلتىرەمىز. جاقسى ءوتىمدى سۋرەتتى نەگىزگى سۋرەت ەتىپ بەلگىلەپ، «مەن تۋرالى» ءبولىمىن ءوزىمىز تۋرالى اقپاراتپەن تولتىرامىز. «ءساتتى» تۇسكەن سۋرەتتەرىمىزدى جۇكتەيمىز.

2. ءوز قالاڭىزداعى قىزدى تاڭداڭىز. بۇل باستىسى، سەبەبى جىراقتاعى ماحابباتتىڭ وتى ۇزاق جانباسى انىق. فەيك اككاۋنتارعا قارامايمىز، ورتاق قىزىعۋشىلىعى، قىزىقتى تاقىرىپتاردى ءسوز قىلا الاتىن قىزدى تاڭدايمىز.

قىزعا جازىلۋى كەرەك ەڭ ءبىرىنشى حابارلاما قانداي بولۋى ءتيىس؟ ەڭ ءبىرىنشى حابارلاما قىسقا بولعانى ابزال جانە ءسىزدىڭ «سالەم» دەگەن ءسوزىڭىزدى وقىعان ءاربىر قىزدىڭ باسىندا تۋاتىن 3 سۇراققا جاۋاپ بەرە الاتىن حابارلاما بولۋى كەرەك. ول مىنا سۇراقتار:

1. ءسىز كىمسىز: ەسىمىڭىز، جەلىدە ونى قالاي ىزدەپ تاپتىڭىز؛

2. تانىسۋداعى ماقسات: ءجاي اڭگىمەلەسۋ، ۋاقىتتى بىرگە قىزىق وتكىزۋ، كەزدەسۋگە بارۋ؛

3. ناقتى سول قىزدى تاڭداعانداعى سەبەبىڭىز: ورتاق قانداي قىزىعۋشىلىق بار، قىزدىڭ قاي جەرىن ۇناتتىڭىز.

اتالعان تەزيستەردىڭ ءتارتىبى، تانىسۋ كەزىندە بەلگىلى بولادى. ەڭ العاشقى حابارلامانىڭ باستى مىندەتى- قىز بالانىڭ سىزگە دەگەن قىزىعۋشىلىعىن تۋدىرۋ، سىزگە نازارىن اۋدارتۋ. ول ءۇشىن عالامتوردان الىنعان ۇزاق ماتىندەردى شۇبىرتىپ جازۋدىڭ قاجەتى جوق. قاراپايىم ۇيلەستىرىلگەن 1-2 سويلەمنىڭ ءوزى جەتكىلىكتى.

ءوزىڭىزدى تانىستىرىپ ءوتىڭىز، ءبىر جاعىنان پاراقشاڭىزدى ءبارى جازىلىپ تۇرسا دا، ءوزىڭدى تانىستىرۋ - ەتيكەتتىڭ قاراپايىم فورماسى.

ارمەن قاراي، تىلدەسۋدى جالعاستىرۋ ءۇشىن ءبىر جەلەۋ كەرەك. قاراپايىم «جاقىن ارالاسۋعا نيەتتىمىن» دەگەننىڭ ءوزى جەتكىلىكتى. تەك، وتباسى قۇرۋ كەرەك، بالا سۇيگىم كەلەدى دەپ بىردەن جازۋ جاراماس. قىز ونداي اڭگىمەدەن ات تونىن الا قاشادى.

ونىڭ پاراقشاسىن ءجىتى قاراپ شىعىڭىز - ۆيرتۋالدى قاۋىمداستىقتارى، فيلمدەرى، مۋزىكالارى. باسقا قىزداردان قاي جەرى ەرەكشە؟ ەكەۋىزدى نە بىرىكتىرۋى مۇمكىن؟

ەڭ ءبىرىنشى حابارلامانى جازۋداعى قاتەلىكتەر قانداي؟ كوپشىلىك ءجيى قولداناتىن، «ەسكىرگەن» سوزدەر، مىسالى: «سالەم، قالايسىڭ؟» ادەتتە مۇنداي 10 جاعدايدىڭ 9 ىندا قىز بالا سىزگە جاۋاپ قايتارماۋى مۇمكىن. سەكسۋالدى تيپتەگى سوزدەر: «سەنى جاقىننان كورگىم كەلەدى»، «فيگۋراڭىز ات ەكەن» بوگدە ادامنىڭ بۇل سوزدەرى استە قىز بالانى قىزىقتىرماس. بلوكقا قوش كەلدىڭىز! گرامماتيكالىق قاتەلىكتەر: نە جازعانىڭىزدى ءجىتى تەكسەرىپ شىعۋ كەرەك، كەرەك جاعدايدا ءۇتىر، لەپ بەلگىلەرىن قويۋدى ۇيرەنىڭىز. ۆيرتۋالدى الداۋ، ياعني «فەيك» پاراقشامەن جازۋ. قىزدىڭ ورنىنا ءوزىڭىزدى قويىپ كورىڭىز، پاراقشاسىندا دوستارى جوق، اۆاتاركاسىندا لومباردجينيدىڭ سوڭعى مودەلىنىڭ سۋرەتى تۇرعان بەلگىسىز بىرەۋمەن تانىسار ما ەدىڭىز؟

سونىمەن، قىز بالانىڭ نازارىن وزىڭىزگە قاراتتىڭىز. ارمەن قاراي - نەگىزگى ماقساتىڭا ۇمتىلۋ. ەگەر جاقىن قارىم- قاتىناستى قالاساڭىز - تەلەفون ءنومىرىن الىپ، ونىڭ سىزگە دەگەن كىشىگىرىم اۋەستىگىن پايدالانا وتىرىپ، تىكەلەي كەزدەسۋگە شاقىرعان دۇرىس. كەزدەسۋ ورنىن جاقسىلاپ تاڭداۋ كەرەك. ەڭ العاشقى كەزدەسۋدە سىيلىق سىيلاۋ قىز كوڭىلىن تارتۋعا ايتارلىقتاي اسەر ەتەدى. ونى تاڭقالدىرۋعا تىرىسۋ كەرەك.

ەگەر «قىزىڭىز» كەزدەسۋگە كەلىسىم بەرمەسە - قولدى ءبىر سىلتەۋدىڭ قاجەتى جوق. جەلىدەگى دوستار قاتارىنان ءوشىرىپ، بىردەن بلوكقا تىعۋدىڭ قاجەتى جوق. ونىمەن ارى قاراي اڭگىمەلەسە بەرگەن دۇرىسىراق. قىزبەن نەعۇرلىم كوپ سويلەسكەنىڭىز، كەلەسى رەت كەزدەسۋگە شاقىرعاندا كەلىسەتىنىنە كەپىل بولا الادى. اڭگىمەڭىز قىزعا ۇناسا، البەتتە كەزدەسۋگە كەلىسىمىن بەرەدى.

ال ەندەشە ىسكە ءسات، باتىرىم!

 

سوڭعى جاڭالىقتار