نۇرسۇلتان نازاربايەۆ يوردانيا كورولىمەن تەلەفون ارقىلى سويلەستى

 نۇر- سۇلتان. قازاقپارات - قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆ يوردانيا كورولى ІІ ابداللامەن تەلەفون ارقىلى سويلەستى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

يوردانيا كورولى ІІ ابداللا نۇرسۇلتان نازاربايەۆتىڭ قازاقستان پرەزيدەنتى وكىلەتتىگىن توقتاتۋ تۋرالى شەشىمىنە قولداۋ ءبىلدىرىپ، بۇل حاباردى بۇكىل الەم زور تۇسىنىستىكپەن قابىلداعانىن اتاپ ءوتتى.

ІІ ابداللا نۇرسۇلتان نازاربايەۆپەن جەكە دوستىعىن جوعارى باعالايتىنىن ايتىپ، ەلباسىنىڭ قازاقستان مەن يوردانيا اراسىنداعى ىنتىماقتاستىقتى قالىپتاستىرۋ جانە دامىتۋ ىسىندەگى تاريحي رولىنە توقتالدى.

يوردانيا كورولى قازاقستان رەسپۋبليكاسىنىڭ تۇڭعىش پرەزيدەنتى - ەلباسىعا مىقتى دەنساۋلىق جانە الداعى قىزمەتىنە تابىس تىلەدى.

نۇرسۇلتان نازاربايەۆ پەن ІІ ابداللا الداعى ۋاقىتتا تۇراقتى بايلانىستارىن جالعاستىرا بەرۋگە ۋاعدالاستى.