د. نازاربايەۆا قىتاي ەلشىسىنە شىڭجاڭداعى قازاقتار ەكى ەل اراسىنداعى «دوستىق كوپىرى» ەكەنىن اتاپ ءوتتى

None
None
 نۇر- سۇلتان. قازاقپارات - ق ر پارلامەنت سەناتىنىڭ ءتوراعاسى داريعا نازاربايەۆا قىتاي حالىق رەسپۋبليكاسىنىڭ قازاقستانداعى ەلشىسى جاڭ  شياۋدى ونىڭ ءوتىنىشى بويىنشا قابىلدادى، دەپ حابارلايدى قازاقپارات سەناتتىڭ باسپا ءسوز قىزمەتىنە سىلتەمە جاساپ.

سەنات سپيكەرى كەزدەسۋدى اشا كەلىپ قىتايمەن ستراتەگيالىق جان- جاقتى ارىپتەستىك قارىم- قاتىناستىڭ ەرەكشە ماڭىزىن اتاپ ءوتتى.

«قازاقستان ەلباسى ن. نازاربايەۆ پەن ق ح ر ءتوراعاسى شي جينپيننىڭ جوعارى دەڭگەيدەگى دوستىق، تاتۋ كورشىلىك جانە ءوزارا تۇسىنىستىك نەگىزىندەگى كەلىسىمدەرىن جۇزەگە اسىرۋدى جالعاستىرۋعا نيەتتى. ستراتەگيالىق جان- جاقتى ارىپتەستىك قارىم- قاتىناستارىن نىعايتۋ باعىتىن ۇستاناتىنىمىزدى ناقتىلايمىز» ، - دەدى د. نازاربايەۆا.

جاڭ  شياۋ ق ح ر حالىق وكىلدەرى بۇكىل قىتايلىق جينالىسى تۇراقتى كوميتەتىنىڭ ءتوراعاسى لي جاڭشۋدىڭ د. نازاربايەۆاعا سەنات ءتوراعاسى قىزمەتىنە سايلانۋىمەن قۇتتىقتاۋىن جەتكىزدى جانە بۇدان بىلايعى جۇمىسى تابىستى بولۋىنا تىلەكتەستىگىن ءبىلدىردى.

«ءبىز ءسىزدىڭ پارلامەنتارالىق بايلانىستاردى دامىتۋعا جانە قىتايدىڭ «ءبىر بەلدەۋ، ءبىر جول» باستاماسىن قولداۋعا قوسقان جەكە ۇلەسىڭىزدى جوعارى باعالايمىز» ، - دەدى ول.

قىتاي ەلشىسى قازاقستاننىڭ تۇڭعىش پرەزيدەنتى ن. نازاربايەۆتىڭ 2- حالىقارالىق «ءبىر بەلدەۋ، ءبىر جول» ىنتىماقتاستىعى فورۋمىنا قاتىسۋ ءۇشىن بەيجىڭ قالاسىنا باراتىن الداعى ساپارىنا دايىندىق تۋرالى سەنات باسشىسىن حاباردار ەتتى.

تاراپتار ساۋدا- ەكونوميكالىق بايلانىستاردى دامىتۋداعى وڭ ۇردىستەر مەن ءبىزدىڭ ەلدەرىمىز اراسىنداعى تاۋار اينالىمى كولەمىنىڭ ءوسۋىن اتاپ ءوتىپ، ينۆەستيتسيا، اۋىل شارۋاشىلىعى، تۋريزم، مادەني- گۋمانيتارلىق ىنتىماقتاستىق سالاسىنداعى ءوزارا ءىس- قيمىلدى كۇشەيتۋ مۇمكىندىكتەرى بار ەكەنىنە توقتالدى.

سەنات باسشىسى ەكى ەل اراسىنداعى جاستار ىنتىماقتاستىعىن بەلسەندى دامىتۋ، اتاپ ايتقاندا، ستۋدەنتتەر الماسۋدى جانە ءبىلىم گرانتتارىن بەرۋدى جولعا قويۋ قاجەتتىگىن اتاپ ءوتتى.

د. نازاربايەۆا شىڭجاڭ- ۇيعىر اۆتنوميالىق ولكەسىندەگى قازاقتار تاقىرىبىن قوزعاي كەلىپ، ق ح ر- داعى ەتنيكالىق قازاقتار قازاقستان مەن قىتاي اراسىنداعى قارىم- قاتىناستا «دوستىق كوپىرى» ەكەنىن اتاپ ءوتتى. تاراپتار وسى سالادا تۋىندايتىن ماسەلەلەردى ءوزارا نەگىزدە سىندارلى تۇردە شەشۋگە ۋاعدالاستى.

كەزدەسۋ بارىسىندا سەنات سپيكەرى قازاقستان ازاماتتارى ءۇشىن تۋريستىك جانە جەكە ۆيزا بەرۋدى جاڭعىرتۋ ماسەلەسىن كوتەردى.

سوڭعى جاڭالىقتار