شياڭگاڭدا قازاقتىڭ ۇلتتىق ويىنى توعىزقۇمالاق ويىنىنىڭ كورسەتىلىمى ءوتتى

نۇر-سۇلتان. قازاقپارات - گونكونگ قالاسىندا «ورتا ازيا ورتالىعىنىڭ» ۇيىمداستىرۋمەن قازاقتىڭ ۇلتتىق ويىنى - توعىزقۇمالاقتان بىرنەشە سەمينار جانە حالىقارالىق جارىس وتكىزىلدى، دەپ حابارلايدى قازاقپارات ءتىلشىسى.

شارا گونكونگ قالاسىندا «ورتا ازيا ورتالىعىنىڭ» ۇيىمداستىرۋمەن ورتا ازيا كۇندەرى اياسىندا ءوتتى. بۇل تۋرالى قازاقپارات تىلشىسىنە دۇنيەجۇزىلىك توعىزقۇمالاق فەدەراتسياسىنىڭ باس حاتشىسى ماقسات شوتايەۆ ايتىپ بەردى.

«بۇل كولەمدى ءىس- شارا بارىسىندا توعىزقۇمالاق 200 گە جۋىق تالاپكەرگە تانىستىرىلىپ، ۇيرەتۋ جانە شەبەرلىك ساباقتارى وتكىزىلدى. ەڭ الدىمەن، 28 -ناۋرىز كۇنى گونكونگ تەحنيكالىق ۋنيۆەرسيتەتىنىڭ عيماراتىندا بىرنەشە ەرىكتىلەرمەن كەزدەسۋ وتكىزىلىپ، توعىزقۇمالاق ويىنىنىڭ ناسيحاتتالۋىنا ىقپال جاسالدى. ورتا ازيا ورتالىعىنداعى ەرىكتىلەر توبى بىرنەشە ۇلتتان قۇرىلعان، ىنتىماعى جاراسقان، بەلسەندى ۇيىم. ولاردىڭ اراسىندا قازاق، تۇرىك، تاجىك، گونكونگ جانە سينگاپۋر جاستارى بار»، - دەپ اتاپ ءوتتى م. شوتايەۆ.

سونىمەن قاتار اتالعان شارادا الەم چەمپيوندارى اسەل داليەۆا مەن سەرىك اقتايەۆ جەرگىلىكتى تۇرعىندارعا شەبەرلىك ساباقتارىن وتكىزگەن.

«29-31 -ناۋرىز ارالىعىندا گونكونگتىڭ ەڭ ۇزدىك مەكتەپتەرىنەن جينالعان زەرەك وقۋشىلارعا توعىزقۇمالاقتى تانىستىرۋ شارالارى «Oasis» ورتالىعىندا جاسالدى. 200-گە جۋىق بەلسەندى جاستار قازاقتىڭ ويىنىمەن تانىسىپ، الەم چەمپيوندارى اسەل داليەۆا مەن سەرىك اقتايەۆتان شەبەرلىك ساباقتارىن الدى. ولاردىڭ اراسىنان ىرىكتەلگەن جاستار حالىقارالىق جارىسقا قاتىستى. گونكونگ-2019 جارىسىنا قازاقستان، سينگاپۋر جانە گونكونگتان تاڭداۋلى 12 ويىنشى قاتىستى»، - دەدى م. شوتايەۆ.

جارىس شۆەيتسار جۇيەسىمەن ءوتىپ، 5 تۋردا جەڭىمپازدار انىقتالدى. ناتيجەسىندە، باس جۇلدە سەرىك اقتايەۆقا، 2-ورىن قرەسسش اسەل داليەۆاعا، ال 3- ورىن، گونكونگتىق ياڭ يەڭگە (Yang Jeng) بۇيىردى.

جەڭىمپازدار مەن جۇلدەگەرلەر ارنايى سىيلىقتارمەن جانە ديپلومدارمەن ماراپاتتالدى. ءىس- شاراعا قاتىسۋشىلار توعىزقۇمالاق ويىنىنىڭ وتە پايدالى ەكەندىگىنە كوز جەتكىزدى.