قازاقستان يزرايل، قىتاي، وڭتۇستىك كورەياعا اۋىل شارۋاشىلىعى ونىمدەرىن ەكسپورتتاماق

None
None
نۇر-سۇلتان. قازاقپارات - قازاقستان يزرايل، قىتاي، وڭتۇستىك كورەيا سىندى ەلدەرگە اۋىل شارۋاشىلىعى ونىمدەرىن ەكسپورتتاۋ ءۇشىن كەلىسسوز جۇرگىزىپ جاتىر.

بۇل تۋرالى بۇگىن ۇكىمەت وتىرىسىندا ق ر پرەمەر-ءمينيسترى اسقار مامين ايتتى، دەپ حابارلايدى قازاقپارات ءتىلشىسى.

«اگروونەركاسىپ سالاسىن دامىتۋ باعدارلاماسىن ىسكە اسىرۋ اياسىندا وڭىردەن اۋىل شارۋاشىلىعى ءونىمىنىڭ ەكسپورتىن 2022-جىلعا دەيىن كەم دەگەندە 2,5 ەسە ارتتىرۋ مىندەتى تۇر. وسىعان وراي ۆەتەرينارلىق جانە فيتوسانيتارلىق قاۋىپسىزدىك تالاپتارىنىڭ ساقتالۋىن قامتاماسىز ەتۋ قاجەت»، - دەدى ۇكىمەت باسشىسى.

وسى رەتتە اسقار مامين 2017-جىلى قازاقستاننىڭ بارلىق ءوڭىرى اۋسىلدان تازا ايماق مارتەبەسىن العانىن ەسكە سالدى.

«وسىنىڭ ارقاسىندا يران، اراب امىرلىكتەرىنە، ساۋد ارابياسىنا مال شارۋشالىعى ونىمدەرىن ەكسپورتتاۋعا شەكتەۋلەر الىندى. ءتيستى شارتتار كەلىسىلدى. قازىرگى تاڭدا يزرايل، قىتاي، وڭتۇستىك كورەيا جانە باسقا دا ەلدەرمەن وسى باعىتتتا كەلىسسوزدەر جۇرگىزىلۋدە»، - دەدى ول.

ۇكىمەت باسشىسىنىڭ ايتۋىنشا، اعىمداعى جىلعى ناۋرىزدا قازاقستاننىڭ فيتوسانيتارلىق قىزمەتى 30 مىڭ كاسىپورىندى تەكسەرىپ، ولار قىتايعا ءبيداي ءونىمىن ەكسپورتتاۋشىلار تىزىمىنە ەنگىزىلدى.

«ۆەتەرينارلىق جانە فيتوسانيتارلىق كەدەرگىلەردى الۋ جانە وتكىزۋ نارىقتارىن كەڭەيتۋ بويىنشا جۇمىستى جالعاستىرۋ قاجەت. قازاقستاننىڭ جوعارى ساپالى جانە ەكولوگيالىق تازا ونىممەن قامتاماسىز ەتەتىن سەنىمدى كوزگە اينالۋعا بارلىق الەۋەتى بار دەپ ايتۋعا بولادى»، - دەدى اسقار مامين.

وسىعان وراي اسقار مامين اۋىل شارۋاشىلىعى مينيسترلىگىنە اكىمدىكتەرمەن بىرگە ءبىرقاتار ماسەلەگە ەرەكشە نازار اۋدارىپ، ناقتى شارالاردى قولعا الۋى كەرەكتىگىن ەسكەرتتى.

«بىرىنشىدەن - تۇراقتى ەپيزووتيالىق احۋالدى قامتاماسىز ەتۋ، مال قورىمى ورىندارىن ۆەتەرينارلىق-سانيتارلىق تالاپتارعا سايكەستەندىرۋ، ەگىس القاپتارىن زيانكەستەرگە قارسى وڭدەۋ شارالارىن ۋاقىتىلى قابىلداۋ، ءتيىمدى ۆەتەرينارلىق جانە فيتوسانيتارلىق باقىلاۋدى قامتاماسىز ەتۋ. بۇل رەتتە، ەۋرازيالىق ەكونوميكالىق وداق مەملەكەتتەرىمەن ءوزارا ساۋداعا قاتىستى جاسالعان كەلىسىمدەر اياسىندا ءتيىستى راسىمدەردى جۇرگىزۋ قاجەت. اتالىپ وتكەن ءىس- شارالار ونەركاسىپ سالاسىن دامىتۋ باعدارلاماسىندا قاراستىرىلعان جانە ولاردى قامتاماسىز ەتۋ كەرەك»، - دەدى ول.

سوڭعى جاڭالىقتار