قاسىم- جومارت توقايەۆ: قازاقتىڭ ءتىلى - قازاقتىڭ جانى

None
None
نۇر- سۇلتان. قازاقپارات - مەملەكەت باسشىسى قاسىم- جومارت توقايەۆ «ەگەمەن قازاقستان» جانە «ايقىن» گازەتىنە بەرگەن سۇحباتىندا قازاق ءتىلى ماسەلەسىنە قاتىستى سۇراقتارعا جاۋاپ بەردى.

سۇحبات بارىسىندا پرەزيدەنتكە مەملەكەتتىك ءتىلدى دامىتۋ ءۇشىن قانداي شارالار اتقارىلۋ كەرەكتىگى تۋرالى سۇراق قويىلعان بولاتىن.

«قازاقتىڭ ءتىلى - قازاقتىڭ جانى! حالقىمىزدىڭ تاريحى دا، تاعدىرى دا - تىلىندە. مادەنيەتى مەن ادەبيەتى دە، ءدىلى مەن ءدىنى دە - تىلىندە. ۆ. رادلوۆ ايتقانداي، قازاق ءتىلى - ەڭ تازا ءارى باي ءتىلدىڭ ءبىرى. ءتىل وتكەن تاريحپەن عانا ەمەس، بۇگىن مەن بولاشاقتى بايلانىستىراتىن قۇرال. مەنىڭشە، ءتىلدىڭ تۇعىرى دا، تاعدىرى دا بەسىكتەن، وتباسىنان باستالادى. وتباسىندا انا تىلىندە سويلەپ وسكەن ءبۇلدىرشىننىڭ تىلگە دەگەن ىقىلاسى تەرەڭ، قۇرمەتى بيىك بولادى. وسى تۇرعىدا، بالاباقشالاردا، مەكتەپتەردە مەملەكەتتىك ءتىلدىڭ مارتەبەسىن كوتەرۋدى نازاردا ۇستاۋ قاجەت. ءبىز مەملەكەتتىك ءتىلدىڭ مارتەبەسىن كوتەرۋ باعىتىنداعى جۇمىستاردى ۇزدىكسىز جالعاستىرا بەرەمىز»، - دەدى قاسىم- جومارت توقايەۆ.

 بۇدان بولەك، سۇحبات بارىسىندا لاتىن گرافيكاسىنا كوشۋدىڭ الداعى قادامىنا دا نازار اۋدارىلدى. بۇل رەتتە پرەزيدەنت كەز كەلگەن ۇلتتىڭ ءالىپبي تاڭداۋى تەك جازۋ ۇلگىسىن تاڭداۋ ەمەس ەكەنىن اتاپ ءوتتى.

«بۇگىندە قازاقستان حالقى دا زامانا كوشىنەن قالماي، لاتىن گرافيكاسىنا نەگىزدەلگەن ءالىپبيدى تاڭداۋعا بەل بۋىپ وتىر. كورشى مەملەكەتتەردىڭ كوپشىلىگى لاتىن گرافيكاسىن تاڭدادى. الەمدەگى اقپاراتتاردىڭ 90 پايىزى لاتىن گرافيكاسىندا جارىق كورەدى. ال اقپاراتقا كىم يەلىك ەتسە، عىلىم مەن تەحنولوگياعا دا سول يە بولادى. قازاق ءتىلىنىڭ لاتىن الىپبيىنە كوشۋى - رۋحاني جاڭعىرۋدىڭ ەڭ شەشۋشى كەزەڭدەرىنىڭ ءبىرى. بۇل قوعامدىق وي مەن ساناعا تۇپكىلىكتى وزگەرىس جاسايتىن قادام»، - دەدى مەملەكەت باسشىسى.

پرەزيدەنتتىڭ ايتۋىنشا، لاتىن الىپبيىنە كوشۋ كەزەڭ- كەزەڭىمەن جالعاسا بەرەدى. «ناقتى بەلگىلەنگەن كەستە بار. سول جۇيەدەن اۋىتقىمايمىز. ءبىراق، قوعامدىق پىكىر، ءالىپبيدى قولدانۋ بارىسىنداعى ارتىقشىلىقتار مەن ولقىلىقتار ەسكەرىلەدى»، - دەدى قاسىم- جومارت توقايەۆ.

سوڭعى جاڭالىقتار