زايسان كولىنىڭ جاعاسىنان ءولى قولتىراۋىن تابىلدى

None
None
 نۇر-سۇلتان. قازاقپارات - ەرتىس وزەنىنىنىڭ بويىنان قولتىراۋىن، ءيا، كادىمگى كروكوديل تابىلدى.

زايسان كولىنىڭ كۇرشىم اۋدانىنا قاراستى زايىر قونعان قىستاعىنىڭ ماڭىنان كوكتەمگى كانيكۋلعا كەلگەن وقۋشىلار جۋىقتا عانا ولگەن كروكوديلدىڭ دەنەسىن تاۋىپ الدى.

دەنەسىنىڭ ۇزىندىعى شامامەن ءبىر مەتردەن اسىپ جىعىلاتىن الىپ كەسىرتكەنىڭ سىرت كەلبەتىن جەرگىلىكتى عالىمدار شىنىمەن دە ءنىل قولتىراۋىنىنا ۇقساتىپ وتىر.

سوندا قىستاعى ايازى مينۋس 45-50 گرادۋسقا دەيىن باراتىن التايعا، افريكا قۇرلىعىندا ءومىر سۇرەتىن قولتىراۋىن قايدان كەلگەن؟

قىستاقتا جىلقى باعىپ وتىرعان بىرلىك ءساۋىرحاننىڭ ايتۋىنشا، كول جاعاسىندا ويناپ جۇرگەن بالالار ۇيگە قورقىپ جۇگىرىپ كەلگەن.

- كروكوديل دەگەندى كينودان عانا كوردىك قوي. قارى ەندى عانا ەري باستاعان جاعالاۋداعى قاتقاق مۇزدىڭ اراسىندا جاتىر ەكەن. باسىنىڭ تەرىسى جوق، اڭ- قۇس كەمىرىپ تاستاعان بولۋى كەرەك. باسقا جەرىنىڭ تەرىسى سول كۇيى تۇتاس تۇر. كۇزگە دەيىن ءجۇرىپ كۇن سۋىتقان كەزدە ءۇسىپ قالعان سياقتى. العاشىندا جاز مەزگىلىندە دەمالۋشىلاردان قالعان رەزەڭكە ويىنشىق ەكەن دەپ ويلادىم، باس سۇيەگىن ۇستاپ كورگەن سوڭ عانا كادىمگى قولتىراۋىن ەكەنىنە كوزىم جەتتى، - دەيدى جەرگىلىكتى جىلقىشى.

ش ق و پالەونتولوگيا ورتالىعىنىڭ اعا قىزمەتكەرى دەنيس شۋتكيننىڭ ايتۋىنشا، رەپتيليانىڭ زايسان كولى جاعاسىنان تابىلۋى ارينە قىزىق قۇبىلىس.

- بۇل Amietophrynus regularis توبىنا جاتاتىن ءنىل كروكوديلىنىڭ 3 نەمەسە، 4 جاستاعى اتالىعى. قازىر ونىڭ ءبىزدىڭ وڭىرگە قالاي كەلگەنىن زەرتتەۋ ۇستىندەمىز. زايسان جەرىندە تالاي پالەونتولوگيالىق قازبا جۇمىستارى جۇرگىزىلىپ، تالاي كونە جانۋارلاردىڭ سۇيەكتەرى تابىلىپ جاتىر. سوعان قاراپ، ارحوزاۆرلار، ياعني قولتىراۋىندار دا بۇل جەردى ەجەلدەن مەكەندەپ كەلۋى ابدەن مۇمكىن دەگەن دە وي تۋادى، - دەيدى عالىم.

 

altaynews.kz

سوڭعى جاڭالىقتار