قازاقستان پرەزيدەنتى ينستاگرام جەلىسىنەن پاراقشا اشتى
بۇل تۋرالى قازاقستان رەسپۋبليكاسى پرەزيدەنتىنىڭ باسپا ءسوز حاتشىسى بەرىك قۇرمانعالي ءمالىم ەتتى.
«جاقىندا ءوڭىر اكىمدەرىنە جۇرتپەن ەتەنە بايلانىس ورناتۋ ءۇشىن زاماناۋي بايلانىس قۇرالدارىن ۇتىمدى پايدالانۋعا، ياعني حالىقپەن كەرى بايلانىس ورناتۋ ماقساتىندا الەۋمەتتىك جەلىلەردە بەلسەندى بولۋعا شاقىردىم. وزدەرىڭىزگە بەلگىلى، مەن بىرنەشە جىلدان بەرى Twitter جەلىسىن بەلسەندى قولدانىپ، مەملەكەتىمىز ءۇشىن ەڭ ماڭىزدى دەگەن دۇنيەلەرمەن ءبولىسىپ كەلەمىن. ەندىگى رەتتە وسى ءۇردىستى حالىق ەڭ كوپ شوعىرلانعان Instagram جەلىسىندە دە جالعاستىرۋدى ءجون دەپ تاپتىم» ، - دەپ جازادى مەملەكەت باسشىسى Instagram پاراقشاسىنداعى جازباسىندا.
سونداي- اق، بەرىك قۇرمانعالي ينستاگرامدا پرەزيدەنتتىڭ اتىنان اشىلعان پاراقشالاردىڭ كوبەيىپ كەتكەنىن اتاپ ءوتتى. «سوڭعى ۋاقىتتا Instagram جەلىسىندە پرەزيدەنتتىڭ اتىنان اشىلعان پاراقشالار كوبەيىپ كەتتى، ءبىراق ولاردىڭ ەشقايسىسى دا رەسمي ەمەس. بۇدان بىلاي رەسمي پاراقشا بىرەۋ، ونىڭ مەكەن- جايى @tokayev_online» ، - دەيدى باسپا ءسوز حاتشىسى.
