قولى سىنعانىنا قاراماستان قارسىلاسىن جەڭگەن قازاقستاندىق فايتەر جەكپە- جەگىنىڭ ۆيدەوسى پايدا بولدى

None
None
 نۇر-سۇلتان. قازاقپارات -  YouTube جەلىسىندەگى MMA and BOXING Hot news ارناسىندا قازاقستاندىق فايتەر قايرات احمەتوۆ پەن اۋستراليالىق ريس ماكلارەن اراسىندا توكيودا ONE Championship تۋرنيرى اياسىندا وتكەن جەكپە-جەكتىڭ تولىق ۆيدەوسى جاريالاندى، - دەپ حابارلايدى Vesti.kz.

جەكپە-جەك الەمدىك ONE Championship گران-پري اياسىندا ءوتتى، وندا سپورتشىلار جەڭىل سالماقتا شيرەك فينالدا ايقاستى. ءۇش راۋندتىڭ سوڭىندا احمەتوۆ تورەشىلەر شەشىمىمەن جەڭىسكە جەتتى.

وسىلايشا، 31 جاستاعى احمەتوۆ سپورتتىق مانسابىنداعى 22-جەڭىسىنە قول جەتكىزدى. سونداي-اق، ول بۇرىندارى ەكى رەت جەڭىلىس تاپقان. 27 جاستاعى اۋستراليالىق بولسا، 12 كەزدەسۋدىڭ التاۋىندا جەڭىلگەن. قايرات احمەتوۆتىڭ مەنەدجەرى سايات ءابدىراحمانوۆتىڭ ايتۋىنشا، قازاقستاندىق فايتەر ONE Championship تۋرنيرىندە اۋىر جاراقاتپەن ونەر كورسەتكەن.

ءابدىراحمانوۆتىڭ ايتۋىنشا، جەكپە-جەككە دەيىن دە، كەزدەسۋ كەزىندە دە ءبىرشاما قيىندىقتاردى باستان كەشىرگەن.

«الاڭداعان بارلىق جانكۇيەردى قۇتتىقتايمىن، جەڭىس قۇتتى بولسىن! قايراتتىڭ قانداي قيىندىقتاردى باستان وتكەرگەنىن ازداعان ادامدار بىلەدى. جەكپە-جەك كەزىندە دە بۇل قيىندىقتار توقتامادى. ءبىرىنشى راۋندتا قايرات قولىن سىندىرىپ الدى، الايدا قيىندىقتارعا قاراماستان ول جارتىلاي فينالىنا شىقتى! باۋىرىم سەنى ماقتان تۇتامىن»، - دەپ جازدى ءابدىراحمانوۆ Instagram جەلىسىندەگى پاراقشاسىندا.

فينالعا شىعۋ ءۇشىن قازاقستاندىق فايتەر جاپونيالىق سەنزو يكەدو جانە فيليپپيندىك دەنني كينگەد جۇبى جەڭىمپازىمەن جۇدىرىقتاسادى.

ايتا كەتەيىك، ارالاس جەكپە-جەكتە 2010-جىلدان بەرى ونەر كورسەتىپ كەلە جاتقان احمەتوۆ 2017-جىلى ONE Championship چەمپيونى اتانعان ەدى، الايدا سول جىلى برازيليالىقپەن ريەۆانش وتكىزىپ، تيتۋلىنان ايىرىلدى. ONE Championship - سينگاپۋرلىق پروموۋشەن. 2011-جىلدان بەرى ازيا اۋماعىندا وتكىزىلىپ كەلەدى.

سوڭعى جاڭالىقتار