تىكۇشاق اپاتى: تالدىقورعاندا قارالى ميتينگ ءوتىپ، ەكى سارباز جەرلەندى

تالدىقورعان. قازاقپارات - تالدىقورعاننىڭ ورتالىق الاڭىندا قارالى ميتينگ ءوتىپ، تىكۇشاق اپاتىنان قازا تاپقان ەفرەيتور ايدىن ءابدىلدينوۆ پەن ەفرەيتور ميراس جۇماتايەۆتى سوڭعى ساپارعا شىعارىپ سالدى.

الماتى وبلىسىنان قازا تاپقان 8 اسكەري قىزمەتشىنىڭ تورتەۋىنىڭ دەنەسى ءالى انىقتالماي جاتىر، دەپ حابارلايدى قازاقپارات ءتىلشىسى.

قوشتاسۋ راسىمىنە قورعانىس ءمينيسترى گەنەرال-مايور نۇرلان ەرمەكبايەۆ، قازاقستان مۇسىلماندارى ءدىني باسقارماسىنىڭ باس ءمۇفتيى سەرىكباي قاجى وراز، الماتى وبلىسىنىڭ اكىمى اماندىق باتالوۆ جانە اسكەري وىزمەتكەرلەر مەن ولاردىڭ تۋعان-تۋىستارى قاتىستى. تالدىقورعاننىڭ ورتالىق الاڭىنا جينالعان مارقۇمداردىڭ تۋعان-تۋىس، دوس-جاراندارىنا ق ر قورعانىس ءمينيسترى نۇرلان ەرمەكبايەۆ كوڭىل ايتىپ، بەكەم بولۋعا شاقىردى.

«ولار اقتىق دەمى قالعانشا وتانعا ادال بولۋدىڭ ۇلگىسىن كورسەتتى. باتىرلارىمىزدى ماڭگى ۇمىتپاۋ ماقساتىندا مەموريال ورناتۋ جوسپاردا بار. ولار مەملەكەتتىك ناگراداعا ۇسىنىلاتىن بولادى. ودان بولەك، ساربازداردىڭ وتباسىنا مينيسترلىك تاراپىنان جان-جاقتى قولداۋ كورسەتىلەدى» دەپ اتاپ ءوتتى مينيستر.

قازا تاپقان ايدىن ءابدىلدينوۆتىڭ ارتىندا جارى مەن ەكى كىشكەنتاي قىزدارى قالدى. پاتەر جالداپ، كۇن كەشىپ جاتقان وتباسىنىڭ جارى جولداسىن سوڭعى رەت قاڭتار ايىندا كورگەنىن ايتادى.

«جولداسىمدى سوڭعى رەت قاڭتار ايىندا كوردىم. كۇندە سويلەسىپ تۇراتىنبىز، بولعان جايتقا ءالى دە سەنەر الار ەمەسپىن. ەكى قىزىمىز بار. ۇلكەنىم 12 دە. كىشىم 6 جاستا. كۇيەۋىمنىڭ جاساي الماي كەتكەن جاسىن قىزدارىما بەرسىن. باسقا وتباسىلارىنا قايعىرىپ كوڭىل ايتامىن. ەلىمىز تىنىش بولسىن. مۇنداي جاعدايلار قايتالانباسىن دەپ تىلەيمىن»، - دەدى مارقۇم بولعان ەفرەيتور ايدىن ءابدىلدينوۆتىڭ جارى سامال سەرىك قىزى.

مارقۇم بولعان 28 جاستاعى ميراس جۇماتايەۆ شاڭىراق كوتەرىپ ۇلگەرمەگەن. ەگىلىپ جىلاعان ميراستىڭ اناسى ۇلىنىڭ بۇل ومىردە ەندى جوق ەكەنىنە سەنەر الار ەمەس.

«بۇگىن مايور تيمۋر قۇدايبەرديەۆتى ەڭبەكشىقازاق اۋدانىندا جانە لەيتەنانت اسلان ايتپايەۆتى كەربۇلاق اۋدانىندا جەرلەپ جاتىر. قالعان 4 ساربازدىڭ دەنەسى ءالى انىقتالمادى. ەفرەيتەر قۋانىش سارقىتبايەۆتىڭ اعاسىنان قان الىپ، ساراپتاماعا جونەلتىپ جاتىر. قالعان ۇشەۋى سەرجانت قايرات نۇرساپانوۆ، اعا سەرجانت مۇرات ءشارىپوۆ جانە كىشى سەرجانت اسحات ابدۋلماناتتىڭ دەنەلەرى ءالى انىقتالۋدا»، - دەدى الماتى وبلىستىق قورعانىس ىستەرى جونىندەگى دەپارتامەنتتىڭ باسپا ءسوز حاتشىسى جانار ءامىرجانوۆا.