قازاقستاندا قىزىلشاعا قارسى ۆاكسينا ەگۋ باستالدى

None
None
نۇر-سۇلتان. قازاقپارات - بۇگىننەن باستاپ رەسپۋبليكا بويىنشا قىزىلشاعا قارسى ۆاكسيناتسيا جۇرگىزىلەدى. بيىل العاش رەت ءبىر جاسقا تولماعان بالالارعا ەكپە سالۋ باستالادى.

سەبەبى 12 ايعا تولماعان بالالاردىڭ اراسىندا قىزىلشا اۋرۋىنا شالدىعۋ كورسەتكىشى جوعارى بولىپ تۇر، دەپ حابارلايدى قازاقپارات ءتىلشىسى.

رەسمي مالىمەتكە سايكەس، جىل باسىنان بەرى ەلىمىزدە قىزىلشاعا شالدىققان 4670 ادام تىركەلدى. ولاردىڭ باسىم بولىگى - بالالار. سوڭعى ءبىر اپتانىڭ ىشىندە 500 گە جۋىق ادام قىزىلشامەن اۋىرىپ قالدى. ق ر باس مەملەكەتتىك سانيتاريالىق دارىگەرى جانداربەك بەكشيننىڭ ايتۋىنشا، قىزىلشا بارلىق ايماقتاردا تىركەلىپ وتىر. الايدا نۇر-سۇلتان، الماتى، شىمكەنت قالالارىندا، سونداي- اق، اقمولا مەن تۇركىستان وبلىستارىندا اۋرۋ ءورشىپ تۇر. ماسەلەن، ناۋرىزدىڭ باسىندا استانادا ون ادام جانساقتاۋ بولىمىنە ءتۇستى. ال ەلوردانىڭ ينفەكتسيالىق اۋرۋحاناسىندا قوسىمشا كەرەۋىتتەردى قويۋعا تۋرا كەلدى.

باس سانيتاردىڭ سوزىنە قاراعاندا، قازاقستاندا قىزىلشانىڭ جاڭا مۋتاتسياسى تارالا باستادى. «قىزىلشانىڭ گەنەتيكالىق تارماقتارى، ياعني مۋتاتسياعا جاتاتىن Dublin جانە Kabul تارماقتارى بار. وسى ەكى سەروتيپ قازاقستاندا ەشقاشان بولعان جوق. ماسەلەن، استانادا ەڭ اۋىر 18 جاعدايدى زەرتتەگەندە سول ادامداردان Kabul-دىڭ 70 پروتسەنتى جانە Dublin- ءنىڭ 30 پروتسەنتى شىقتى. Kabul سەروتيپى، كوبىنەسە، ازيادان كەلەدى. ال Dublin ەۋروپا ەلدەرىندە ءجيى كەزدەسەدى. ءبارى سول جاقتان كەلىپ جاتىر»، - دەدى ج. بەكشين استانادا وتكەن باسپا ءسوز ءماسليحاتىندا.

قىزىلشانىڭ ينكۋباتسيالىق كەزەڭى 20 كۇنگە دەيىن سوزىلادى. وسى ۋاقىتتىڭ ىشىندە وعان شالدىققان ادام باسقا بىرەۋگە اۋرۋدى وپ-وڭاي جۇقتىرا الادى. سەبەبى ۆيرۋس اۋا ارقىلى تارالادى جانە ناۋقاس وتىرعان جەردە ەكى ساعاتقا دەيىن ساقتالادى. ينكۋباتسيالىق كەزەڭ بولعاندا ادامنىڭ ءوزى قىزىلشامەن اۋىرىپ جۇرگەنىن بىلمەۋى دە مۇمكىن. سوندىقتان مەكتەپكە، دۇكەنگە، جۇمىسقا جانە باسقا دا قوعامدىق جەرگە بارىپ، ۆيرۋستى تاراتىپ جۇرە بەرەدى. ال ەكپە الماعاندار ونى 90 پروتسەنتكە جۇقتىرا الادى. رەسپۋبليكا بويىنشا قىزىلشا اۋرۋى، كوبىنەسە، ەكپە الماعان بالالاردىڭ اراسىندا ءجيى كەزدەسەدى. ولاردىڭ ۇلەسى 60 پروتسەنتتى قۇراپ وتىر. بالالاردىڭ كوبىسى ەكپە سالاتىن جاسقا - 12 ايعا جەتپەگەن. وسىعان بايلانىستى بيىل قىزىلشاعا قارسى ەكپەنى 9 ايدان باستاپ سالۋ تۋرالى شەشىم قابىلداندى.

«يممۋنولوگتار وسى ماسەلەنى جان-جاقتى زەرتتەپ شىقتى. ەكپە سالۋدى 9 ايدان باستاۋعا بولادى. بۇدان بولەك، مەديتسينالىق مەكەمە قىزمەتكەرلەرىنە ەكپە سالىنادى. سەبەبى ولار ناۋقاستارمەن تىكەلەي جۇمىس ىستەيدى. قالعانى ءوز ەركىمەن ەكپە سالعىسى كەلەتىن ازاماتتارعا بەرىلەدى»، - دەيدى ج. بەكشين.

ونىڭ ويىنشا، ەكپەگە قارسى شىعاتىندار ءدارى-دارمەك ساۋداسىنان پايدا كورىپ وتىر.

سوڭعى جاڭالىقتار