قىتايدا بەيبىت اتامقۇلوۆ پەن ۋاڭ ي ەتنيكالىق قازاقتاردىڭ جاعدايى تۋرالى كەڭەستى
ساپار بارىسىندا سىرتقى ساياسي ۆەدومستۆو باسشىسى ق ح ر مەملەكەتتىك كەڭەسىنىڭ مۇشەسى، سىرتقى ىستەر ءمينيسترى ۋاڭ يمەن ەكى جاقتى كەلىسسوز جۇرگىزدى، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.
تاراپتار قازاقستان-قىتاي ساياسي، ساۋدا-ەكونوميكالىق جانە مادەني-گۋمانيتارلىق سالالارداعى ىنتىماقتاستىعىن ودان ءارى دامىتۋدىڭ وزەكتى ماسەلەلەرىن تالقىلادى جانە حالىقارالىق كۇن تارتىبىندەگى ماسەلەلەردىڭ كەڭ اۋقىمى بويىنشا پىكىر الماستى.
قازاقستانداعى ىشكى ساياسي وزگەرىستەر اياسىندا ب. اتامقۇلوۆ قىتاي تاراپىنا ەلدىڭ سىرتقى ساياساتىنىڭ وزگەرمەيتىندىگى جانە حالىقارالىق مىندەتتەمەلەرىن ورىنداۋ تۋرالى حاباردار ەتتى.
«ءبىز جان-جاقتى ستراتەگيالىق سەرىكتەستىكتىڭ جاڭا كەزەڭىنىڭ قارىم-قاتىناستارىن نىعايتۋعا جانە تەرەڭدەتۋگە دەگەن مىندەتتەمەلەرىمىزدى راستايمىز»، - دەدى ق ر س ءى م باسشىسى.
سونىمەن بىرگە ول «قازاقستان مەن قىتاي اراسىنداعى قارىم-قاتىناس - ءوزارا ۇتىمدى جانە ءتيىمدى ىنتىماقتاستىقتىڭ ۇلگىسى» دەپ اتاپ ءوتتى.
ءوز كەزەگىندە قىتاي تاراپى قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ قازاقستان-قىتاي جان-جاقتى ستراتەگيالىق سەرىكتەستىگىن ورناتۋداعى، «بەلدەۋ جانە جول» باستاماسىن بىرلەسىپ قۇرۋداعى ىنتىماقتاستىقتى تەرەڭدەتۋ بويىنشا تاريحي ءرولىن جوعارى باعالادى.
كەلىسسوزدەر بارىسىندا ەكى ەل اراسىنداعى ءوڭىرارالىق جانە شەكارا ماڭىنداعى سەرىكتەستىك فورماتتارىندا، سونداي-اق ونەركاسىپتىك جانە ينۆەستيتسيالىق سالادا، ەكونوميكانى سيفرلاندىرۋ جانە تەحنولوگيالىق جاڭعىرتۋ سالادا پراكتيكالىق ىنتىماقتاستىققا ەرەكشە نازار اۋدارىلدى. «جىبەك جولىنىڭ ەكونوميكالىق بەلدەۋى» باستاماسىن «نۇرلى جول» جاڭا ەكونوميكالىق ساياساتىمەن جانە ەۋرازيالىق ەكونوميكالىق وداقتىڭ ينتەگراتسيالىق باعدارلامالارىمەن ءتيىمدى ۇشتاستىرۋعا ۇلكەن نازار اۋدارىلادى.
سونىمەن قاتار، قازاقستان مەن ق ح ر سىرتقى ساياسي ۆەدومستۆولارىنىڭ باسشىلارى ب ۇ ۇ، شاڭحاي ىنتىماقتاستىق ۇيىمى، ازياداعى ءوزارا ىقپالداستىق جانە سەنىم شارالارى كەڭەسى جانە ت. ب. حالىقارالىق ۇيىمدار جانە ينتەگراتسيالىق بىرلەستىكتەر اياسىنداعى ىنتىماقتاستىق، ورتالىق ازياداعى تۇراقتىلىق پەن قاۋىپسىزدىكتى قامتاماسىز ەتۋ ماسەلەلەرىن قاراستىرىپ، ترانسشەكارالىق سۋ رەسۋرستارىنىڭ ماسەلەلەرى جونىندە پىكىر الماستى.
كەلىسسوز بارىسىندا ق ح ر اۋماعىندا تۇراتىن ەتنيكالىق قازاقتاردىڭ جاعدايى ءسوز بولدى. ەكى ەلدىڭ س ءى م اراسىنداعى جۇمىس بايلانىسى ارقىلى تۋىندايتىن ماسەلەلەردى شەشۋگە ءوزارا مۇددەلىلىك اتاپ ءوتىلىپ، كونسۋلدىق قىزمەتتەردىڭ جۇمىسىن جانداندىرۋ تۋرالى ۋاعدالاستىققا قول جەتكىزىلدى.
كەلىسسوز قورىتىندىسى بويىنشا قازاقستان مەن قىتاي سىرتقى ساياسي ۆەدومستۆولارى اراسىندا 2020-2022-جىلدارعا ارنالعان ىنتىماقتاستىق تۋرالى مەموراندۋمعا قول قويىلدى.
سول كۇنى قازاقستان س ءى م باسشىسى ق ح ر كوممەرتسيا ءمينيسترى چجۋن شانمەن كەلىسسوزدەر جۇرگىزىپ، ساۋدا-ەكونوميكالىق ءوزارا ىقپالداستىق ماسەلەلەرىن تالقىلادى. قىتاي تاراپى ق ر س ءى م- ءنىڭ ينۆەستيتسيالاردى تارتۋ جانە ەكسپورتتى جىلجىتۋدى ۇيلەستىرۋ جونىندەگى مەملەكەتتىك ساياساتتى ىسكە اسىرۋ سالاسىنداعى جاڭا فۋنكتسيالارى مەن وكىلەتتىكتەرىمەن تانىستى.
قىتاي - قازاقستاننىڭ ءىرى سىرتقى ساۋدا سەرىكتەسى. سوڭعى جىلدارى ەلدەر اراسىنداعى ساۋدا كولەمى ايتارلىقتاي ارتتى. وسىعان بايلانىستى ساۋدا سالاسىن كەڭەيتۋ، ساۋدا قۇرىلىمىن وڭتايلاندىرۋ، ساۋدا اۋقىمىن ۇلعايتۋ، سونداي-اق ەكىجاقتى ساۋداداعى جوعارى تەحنولوگيالىق ونىمدەردىڭ ۇلەسىن ارتتىرۋ ماسەلەلەرىن رەتتەيتىن قازاقستان مەن قىتاي اراسىنداعى ساۋدا قاتىناستارىن جانداندىرۋ جونىندەگى جول كارتاسىن ازىرلەۋ ۇسىنىلدى.
ساپار اياسىندا مينيستر ب. اتامقۇلوۆ بەيجىڭنىڭ ورتالىق پاركىندەگى قازاق جازۋشىسى اباي قۇنانبايەۆتىڭ ەسكەرتكىشىنە گۇل شوقتارىن قويىپ، قىتايلىق ءمۇسىنشى يۋان سيكۋندى «ق ر تاۋەلسىزدىگىنە 25 جىل» مەدالىمەن ماراپاتتاۋ راسىمىنە قاتىستى.
