شاردارادا ەلىمىزدە بالاماسى جوق ءبىرىڭعاي احۋال ورتالىعى اشىلدى

تۇركىستان. قازاقپارات - تۇركىستان وبلىسى، شاردارا اۋداندىق اۋرۋحاناسىندا بالاماسى جوق «باستاپقى مەديتسينالىق-سانيتاريالىق كومەك بويىنشا احۋال ورتالىعى» اشىلدى.

وبلىستىق دەنساۋلىق ساقتاۋ باسقارماسىنىڭ باسشىسى مۇقان ەگىزبايەۆتىڭ تاپسىرماسىمەن اشىلعان ورتالىق ەمحانا جانە ستاتسيونارلىق مەديتسينالىق كومەكتىڭ ساپاسى مەن اشىقتىعىن جاقسارتۋعا ىقپال ەتپەك، دەپ حابارلايدى قازاقپارات ءتىلشىسى.

سالا ماماندارىنىڭ ايتۋىنشا، جاڭا ورتالىق ەڭ الدىمەن باستاپقى مەديتسينالىق-سانيتاريالىق كومەك بويىنشا جۇمىس ىستەيدى. ونىڭ مىندەتىنە مەديتسينالىق مەكەمەلەر مەن دارىگەرلەردىڭ جۇمىسى تۋرالى اقپاراتتى قاداعالاۋ جانە وڭدەۋ كىرىپ وتىر. ال، تولىقتاي سيفرلىق جۇيەگە قوسىلعان احۋال ورتالىعى تۇركىستان وبلىسىنىڭ دەنساۋلىق ساقتاۋ باسقارماسىنىڭ بازاسىندا اشىلعان بولاتىن. بۇل جۇيە ايماقتىڭ دەنساۋلىق ساقتاۋ سالاسىن باقىلاۋ مەن باسقارۋدىڭ ءتيىمدى قۇرالى بولىپ تانىلىپ وتىر. ياعني، ءاربىر اۋدان بويىنشا مەديتسينالىق مەكەمەلەردىڭ شۇعىل ارەكەت ەتۋ شارالارىن قولدانۋ ارقىلى ونلاين تالداۋ جۇرگىزىلەدى.

ورتالىقتىڭ جۇمىسىمەن تانىسۋ ءۇشىن اتالعان اۋداندا «دامۋ» قورىنىڭ نۇر-سۇلتان قالاسى مەن تۇركىستان وبلىسى بويىنشا ايماقتىق وكىلدەرىنىڭ قاتىسۋىمەن ارنايى سەمينار ءوتتى. ەكى كۇنگە سوزىلعان جيىنعا 20 مەديتسينالىق ۇيىمنىڭ 40 تان استام قىزمەتكەرى قاتىسىپ، جاڭا جۇيەنى قولدانۋ ءادىسىن ۇيرەندى. باس قوسۋدا وبلىستىق رەيتينگتىڭ ونلاين تالداۋ مودۋلىن قوسۋ، سونداي-اق ب م س ك جانە ستاتسيونار قىزمەتتەرىنىڭ دامۋىنا تالداۋ جۇرگىزىلدى.

ايتا كەتەيىك، الداعى ۋاقىتتا ءدال وسىنداي ورتالىقتار تۇركىستان وبلىسىنا قاراستى بارلىق مەديتسينالىق مەكەمەدە اشىلادى دەپ جوسپارلانىپ وتىر. وسىلايشا باستاپقى مەديتسينالىق-سانيتاريالىق كومەك جۇمىسى اۋدان ورتالىقتارىنان شالعاي اۋىلدىق جەرلەردەگى مەديتسينالىق قىزمەت ساپاسىن ارتتىرۋعا باعىتتالادى.

«ءبىز كەشەندى مەديتسينالىق اقپاراتتىق جۇيەمەن (ك م ا ج) جۇمىس ىستەيمىز. بۇل جۇيە ءاربىر مەديتسينالىق مەكەمە جۇمىسىنىڭ بارلىق اسپەكتىلەرىن قاداعالاۋعا مۇمكىندىك بەرەدى. ءبىز قانداي دا ءبىر مامانعا قابىلداۋدىڭ ورتاشا ۋاقىتىن، كومەك سۇراپ كەلگەندەردىڭ سانىن، ولاردىڭ دياگنوزدارىن، ۇيگە شاقىرۋلاردى ورىنداۋ ۋاقىتىن، پاتروناجدى جانە ت. ب. تۇستارىن تولىق كورىپ وتىرمىز. وسىلايشا، دارىگەرلىك قىزمەتتەردىڭ ساپاسىن ارتتىرۋعا دەن قويا الامىز. بۇل ونلاين رەجىمىندە وڭىرىمىزدەگى بارلىق مەديتسينالىق مەكەمەلەردە نە بولىپ جاتقانىنان حاباردار بولۋعا مۇمكىندىك بەرەدى. وسى ارقىلى ەمحانالار مەن اۋرۋحانالارداعى جۇكتەمەنى ءبىلىپ جانە مەديتسينالىق قىزمەتكەرلەردىڭ جۇمىسىن تولىق باقىلاي الامىز»، - دەيدى احۋال ورتالىعىنىڭ ۇيلەستىرۋشىسى، شاردارا اۋداندىق اۋرۋحاناسىنىڭ باس دارىگەرى جانار وسپانوۆا.