ۇيدەگى شاڭ سەمىزدىككە الىپ كەلۋى مۇمكىن

نۇر-سۇلتان. قازاقپارات - ا ق ش عالىمدارى ۇيدەگى قاراپايىم شاڭ-توزاڭنىڭ ەندوكرين بۇزىلۋىنىڭ دامۋى مەن سەمىزدىككە الىپ كەلۋى مۇمكىن ەكەنىن انىقتادى.

بۇل تۋرالى MMedicalNewsTodaу باسىلىمى جازدى. ديۋك ۋنيۆەرسيتەتىنىڭ زەرتتەۋشىلەرى ۇيدەگى شاڭ-توزاڭ ەندوكرين جۇيەسىنىڭ بۇزىلۋى ارقىلى سەمىزدىككە الىپ كەلۋى مۇمكىن ەكەنىن دالەلدەيتىن دايەكتەردى كەلتىرگەن.

زەرتتەۋ بارىسىندا عالىمدار 194 ۇيدەن شاڭ-توزاڭنىڭ ۇلگىلەرىن جيناعان. زەرتحانادا مولەكۋلالىق ساراپتاما جۇرگىزگەن. ماماندار زەرتتەگەن شاڭ ۇلگىلەرىنىڭ قۇرامىنان 100 دەن اسا حيميالىق زات تابىلدى. عالىمداردىڭ ايتۋىنشا، وسى جۇزدەگەن زاتتاردىڭ 70 ى ەندوكريندىك جۇيە ورگاندارىنىڭ جۇمىسىندا تەرىس وزگەرىستەر تۋدىرۋعا قابىلەتتى حيميكاتتار بولعان. «ماي ءتىنىنىڭ وسۋىنە ىقپال ەتەتىن حيميكاتتار ارتىق سالماق نەمەسە سەمىزدىككە ۇشىراعان بالالار ۇيلەرىندە الىنعان ۇلگىلەردە بولعان. بۇل حيميالىق زاتتاردى تۇرمىستىق تازالاۋ قۇرالدارى مەن پلاستيكتەن تابۋعا بولادى»، - دەپ حابارلادى جوبا اۆتورلارى.

ماماندار ا ق ش-تىڭ قورشاعان ورتانى قورعاۋ جونىندەگى اگەنتتىگىنىڭ مالىمەتتەرىنە سۇيەنىپ، بالالاردىڭ كۇن سايىن 60 تان 100 ميلليگراممعا دەيىن ءۇي شاڭىن جۇتاتىنىن ايتادى. ولار وتكەن زەرتتەۋلەردە شاڭداعى زاتتاردىڭ اسەرى مەن فەرتيلدىك بۇزىلىستاردىڭ دامۋى، سونداي-اق باۋىر مەن وبىر اۋرۋلارىنىڭ پايدا بولۋ ءقاۋپىنىڭ جوعارىلاۋى اراسىنداعى بايلانىس انىقتالعانىن ەسكە سالادى.