تۇركىستاندىق دارىگەرلەر ۇمىت بولعان ەجەلگى بوسانۋ ءادىسىن جاڭعىرتپاق
ماماندار وسى ءتاسىل ارقىلى انانىڭ تولعاعىن جەڭىلدەتىپ، تەز بوسانۋىنا ىقپال ەتۋگە بولاتىنىن ايتادى. قازىر بۇل ادىسپەن دۇنيەگە ءسابي اكەلەتىن انالار سانى كۇن ساناپ ارتىپ كەلەدى.
«ارقانعا تارتىلىپ وتىرىپ بوسانۋ بۇرىنعى انالارىمىزدىڭ تاريحي ءادىسى بولعان. تىك تۇرعان جاعدايدا جانە بۇيىرىندە بوسانۋ - دالەلدى مەديتسينا نەگىزىندە تاڭداۋ ءادىسى جانە د د ۇ ۇسىنىمى بولىپ تابىلادى. بۇل ق ر د س م كلينيكالىق حاتتاماعا دا ەنگىزىلگەن. مەديتسينالىق تۇرعىدان بۇل پايدالى دەپ سانالادى. تولعاق قىسقاندا سالماق كۇشى ارقانعا تۇسەدى. فيزيولوگيالىق بوسانۋدىڭ بارىسىندا تىك بوسانۋ ءادىسى تولعاقتى جەڭىلدەتىپ، بالانىڭ باسىنىڭ جەڭىل وتۋىنە جول بەرەدى»، - دەيدى شاردارا اۋداندىق ورتالىق اۋرۋحاناسىنىڭ باس دارىگەرى جانار وسپانوۆا.
وڭىردەگى دارىگەرلەر بوسانۋدىڭ بۇل ءادىسىن ءتىپتى شەتەلدىكتەر دە قولداناتىنىن ەستىگەن. سول سەبەپتى، ەلىمىزدە وعان پاتەنت الىپ زاڭداستىرىلعانىن قالايدى. مۇنداي تاجىريبە ازىرگە تەك شاردارا اۋداندىق ورتالىق اۋرۋحاناسىندا عانا قولدانىسقا ەنگىزىلىپ وتىر. وسى كۇنگە دەيىن ارقاننىڭ كومەگىمەن ءۇش جۇزدەن استام بالا دۇنيەگە كەلگەن. اۋرۋحانا باسشىلىعى جاقىن ارادا سۋدا بوسانۋ ءادىسىن دە ەنگىزۋدى جوسپارلاپ وتىر.
ايتا كەتەيىك، قازىرگى تاڭدا جۇكتى ايەلدەر جالپى ءداستۇرلى، وتىرىپ نەمەسە بۇيىرىنە جاتىپ بوسانۋ ارقىلى ءسابيىن دۇنيەگە اكەلەدى.
اۆتور: اينۇر اقبايەۆا
