سۋعا اللەرگياسى بار ادامدار قالاي ءومىر سۇرەدى؟

None
None
استانا. قازاقپارات - اللەرگيانىڭ دا ءتۇر- ءتۇرى بار. بىرەۋلەردىڭ تاماقتان، بىرەۋلەردىڭ يىستەن، بىرەۋلەردىڭ جان- جانۋار جۇندەرىنەن، ەندى بىرەۋلەردىڭ اۋا رايىنان اعزاسى تىتىركەنەدى.

 ءتىپتى الەمدە سۋعا اللەرگياسى بار جاندار دا بار ەكەن. سۋ - تىرشىلىك كوزى، ءومىردىڭ ءنارى. ال سۋسىز جاراتىلىستى ەلەستەتۋ ءتىپتى مۇمكىن ەمەس. دەگەنمەن دەنەسىنە سۋ تيسە، اللەرگياسى ءورشىپ، جانىن قويارعا جەر تاپپاي كەتەتىن جاندار دا ءومىر ءسۇرىپ كەلەدى. الەمدە وسىنداي دەرتپەن اۋىراتىن 50 گە جۋىق ادام بار ەكەن. سۋعا اللەرگياسى بار جاندار ءۇشىن قيىندىق كوپ. ولارعا جىلاۋعا دا بولمايدى. جىلاي قالسا، دەنەلەرى دۋىلداپ قىشىپ، نە ءبورتىپ كەتەدى. ال سۋدى مەيىرى قانىپ ءىشۋ دەگەن - ءبىر ارمان. نەمىس دەرماتولوگى ماركۋس ماۋرەر بۇل دەرت ادام ءومىرىن كۇرت وزگەرتەتىنىن ايتادى. ول وزىنە قارالاتىن ەمدەلۋشىلەر قاتارىندا وسىنداي دەرتكە شالدىققان ءبىر ادام بارىن ايتادى. ول 40  جىلدان بەرى وسى اللەرگيا تۇرىمەن كۇرەسىپ كەلەدى ەكەن. بۇل دەرت مەديتسينا تىلىمەن ايتقاندا «اكۆاگەندى ەسەكجەم» دەپ اتالادى. بۇل دەرتكە شالدىققاندار جاڭبىرلى كۇندەرى، ىلعالدى اۋا رايىندا دالاعا دا شىعا المايدى. فيزيكالىق كۇش كوپ جۇمسالاتىن جۇمىستار جاساۋىنا دا بولمايدى. تەرلەي قالسا، اللەرگياسى ءورشيدى.

گيگيەنالىق تازالىق ءۇشىن دە قيىندىق كوپ. سۋعا اللەرگياسى بار جاندار قالاي ءومىر سۇرەدى؟ سۋ ورنىنا ولار ءسۇت ىشەدى. كوپشىلىگى وسىلاي ءومىر ءسۇرىپ كەلەدى. وسىنداي دەرتكە شالدىققانداردىڭ ءبىرى - ميننەسوتا شتاتىنىڭ كىشكەنتاي تۇرعىنى ايۆي انگەرمان. ونىڭ اللەرگياسى سۋدا 15 سەكۋند تۇرعاننىڭ وزىندە- اق ءورشىپ كەتەدى ەكەن. تەرىسى قابىنىپ، اعزاسى تىتىركەنەدى. دارىگەرلەر قىزدى كونديتسيونەرى بار سالقىن بولمەدە كۇتۋ جايلى اتا- اناسىنا ەسكەرتكەن. ال جۋىندىراتىن كەزدە از دا بولسا تىتىركەنۋدى سەزدىرمەۋگە كومەكتەسەتىن دارىلەر بەرگەن. رەيچەل ۋورۆيك ەسىمدى ايەل دە وسى دەرتكەن شالدىققان. ول دەنەسىنە سۋ تيگىزۋدەن قورقادى. سۋ ىشكەنى - ۋ ىشكەنمەن بىردەي.

 - دەنەمە سۋ تيسە، قاتتى شارشاپ قالامىن. قۇددى ءبىر مارافونعا قاتىسىپ كەلگەندەي بولامىن. ءوزىمدى ءالسىز سەزىنىپ، تىنىعۋىما تۋرا كەلەدى. جىلاۋ ءتىپتى قيىن. بەتىم دۋىلداپ كەتەدى. بەيتانىس ادامدار ءۇشىن مەنىڭ دەرتىم قىزىق. بارلىعى «سۋسىز قالاي ءومىر سۇرەسىڭ؟»، «قالاي تاماقتاناسىڭ؟»، «قالاي جۋىناسىڭ؟» دەپ سۇرايدى. باسقا سالسا امال جوق، ءومىر ءسۇرىپ كەلەمىن، - دەيدى رەيچەل. بۇل دەرتكە قاتىستى عالىمداردىڭ ناقتى تۇجىرىمى دا جوق. ءارقايسىسى ءارقيلى بولجايدى. ءتىپتى اللەرگيانىڭ ءبىر ءتۇرى دەپ سانامايتىندار دا بار. ىشكى اعزاداعى يممۋنيتەت رەاكسياسى دەگەن قورىتىندى شىعارادى. سەبەبى تەرىنىڭ سىرتقى قاباتى ارقىلى يممۋنيتەت «قاتە حابار» الۋى مۇمكىن دەپ بولجايدى.

Massaget.kz

سوڭعى جاڭالىقتار