ەلوردا اكىمدىگى: اۆتوبۋستا جاراقات العاندارعا كومەك تۋرالى جالعان اقپارات تاراپ جاتىر

 نۇر- سۇلتان. قازاقپارات - ەلورداداعى اۆتوبۋستار اپاتىنان زارداپ شەككەندەرگە شۇعىل تۇردە قان تاپسىرۋ قاجەتتىگى تۋرالى اقپارات شىندىققا جاناسپايدى، دەپ حابارلايدى قازاقپارات ءتىلشىسى.

«الەۋمەتتىك جەلىلەر مەن مەسسەندجەرلەردە ءىرى كولىك اپاتى سالدارىنان زارداپ شەككەندەرگە شۇعىل تۇردە قان تاپسىرۋ قاجەتتىگى تۋرالى جالعان اقپارات تاراپ جاتىر. وسىعان بايلانىستى پاتسيەنتتەرگە ساپالى ەم- دوم كورسەتۋ ءۇشىن بارلىق قاجەتتى زاتتار كلينيكادا بار ەكەنىن رەسمي تۇردە جاريالايمىن. بۇل تۇرعىدا دۇربەلەڭ تۋدىرۋدىڭ رەتى جوق» ، - دەلىنگەن قالا اكىمدىگىنىڭ باسپا ءسوز حاتشىسى ەلۆيرا جۇرگەنبايەۆا مالىمەتىندە.

ايتا كەتەيىك، ەلورداداعى ءىرى كولىك اپاتى بويىنشا پوليتسيا تەرگەۋ امالدارىن باستادى.

بۇدان بۇرىن حابارلانعانداي، ەلورداداعى جانتۇرشىگەرلىك كولىك اپاتىنان زارداپ شەككەندەر سانى 27 گە جەتتى.

ەسكە سالساق، 26 - ناۋرىز كۇنى ۇلى دالا مەن قابانباي باتىر داڭعىلى قيىلىسىندا ءۇش اۆتوبۋستىڭ جانە جەڭىل كولىكتەردىڭ قاقتىعىسۋىمەن جول- كولىك وقيعاسى ورىن الدى. قالا ماڭى باعدارىنداعى № 303 اۆتوبۋس № 12 باعدارداعى جولاۋشىلار اۆتوبۋسىمەن سوقتىعىستى. وسىنىڭ ەكپىنىمەن ولار № 53 اۆتوبۋسقا جانە جەدەل جاردەم كولىگىنە بارىپ سوعىلدى.