يمپورتتى ازايتۋ: قازاقستان مال تەرىسىن شەتەلگە شىعارمايتىن بولادى

استانا. قازاقپارات - «اتامەكەن» ۇ ك پ باسقارما ءتوراعاسى ابىلاي مىرزاحمەتوۆ قازاقستانعا كەلەتىن يمپورتتىق تاۋارلاردىڭ كولەمىن ازايتۋ باعىتىندا قانداي شارالار قولعا الىنىپ جاتقانىن ايتىپ بەردى، دەپ حابارلايدى قازاقپارات ءتىلشىسى.

«مەملەكەت باسشىسىنىڭ تاپسىرماسىمەن حالىققا كەرەكتى قاراپايىم تاۋارلاردى ءوندىرۋ ءۇشىن 600 ميلليارد تەڭگە بولىنگەلى وتىر. سول سالانىڭ ءبىرى - جەڭىلونەركاسىپ. ماسەلەن، ونىڭ ىشىنە ءبىزدىڭ كۇندەلىكتى كيەتىن كيىمدەرىمىز، بالالاردىڭ اياق كيىمى سەكىلدى باسقا دا كەرەكتى زاتتار جاتادى. ءبىزدىڭ جەڭىل ونەركاسىپ سالاسىنداعى كاسىپورىندار وكىنىشكە قاراي، تەك ارنايى كيىمدەردى عانا تىگەدى (اسكەري، ىشكى ىستەر نەمەسە مەديتسينالىق سالادا). بۇل باعدارلاما بويىنشا تەك مەملەكەتتىڭ تاپسىرىسىمەن عانا ىستەيتىن كومپانيالار ەمەس، تۇتىنۋشىلارعا، حالىققا وندىرىلەتىن نەگىزگى تاۋارلار شىعارىلادى»، - دەيدى ابىلاي مىرزاحمەتوۆ و ك ق- دا وتكەن باسپا ءسوز ءماسليحاتىندا.

ونىڭ ايتۋىنشا، قازاقستانعا كەلەتىن كيىم- كەشەكتىڭ 82 پايىزى - يمپورت. يمپورتتى شەكتەۋ ءۇشىن ماماندار جان-جاقتى تالداۋ جاساپ، نەگىزگى قيىندىق - شيكىزات كوزىنىڭ بولماۋى دەگەن قورىتىندىعا كەلگەن.

«ياعني، شيكىزات كوزىن الىپ كەلگەننەن كەيىن ونىڭ باعاسى قىمباتىراق بولادى دا، ءبىز قىتايدان نەمەسە تۇركيادان، رەسەي مەن بەلارۋستەن كەلەتىن تاۋارلارمەن باسەكەلەسە المايمىز. سوندىقتان، وسىنىڭ ءبارى ساراپتالدى. سونىڭ ارقاسىندا ناقتى جول كارتاسى جاسالدى. ياعني، الداعى شيكىزاتتى وزىمىزدە شىعارامىز. ەكىنشىدەن، جەڭىلدىكپەن قاراجات بەرىلەدى. سودان كەيىن تەرىنى شەتەلگە شىعارمايمىز. وزىمىزدە وڭدەيتىن جاعداي جاسادىق. ونى ۇكىمەت قولدادى. جول كارتاسىندا ءبارى جازىلعان. بۇل باعدارلاما الداعى 3-4 جىلدا ەلىمىزدە يمپورتتى تومەندەتىپ، ەل ىشىندەگى تاۋارلاردىڭ 50 پايىزىنان كوبىن ءوزىمىز ءوندىرۋ ماقساتىن قويىپ وتىرمىز»، - دەيدى ابىلاي مىرزاحمەتوۆ.

«اتامەكەن» ۇ ك پ باسقارما ءتوراعاسىنىڭ ايتۋىنشا، قازىرگى تاڭدا الماتىداعى قىتايدان الىپ كەلەتىن تاۋارلاردىڭ ءبارىن وتكىزەتىن بازارلارمەن جۇمىس جۇرگىزىلىپ جاتىر.

«قىتايدان كەلەتىن تاۋارلاردىڭ كوبىسى سالىق تولەمەي، كونترافاكت ارقىلى كەلەدى. ونى دا وزدەرىڭىز بىلەتىندەي، ەلباسى ناقتى تاپسىرما بەردى. وسى جولى توسقاۋىل، سالىقتى سالىپ، ول باعامەن ءبىزدىڭ باعانى باسەكەگە الىپ كەلۋ كەرەك»، - دەيدى ابىلاي مىرزاحمەتوۆ.

ەسكە سالا كەتسەك، بۇعان دەيىن ق ر پرەمەر-ءمينيسترى اسقار مامين وتاندىق تاۋارلاردىڭ كولەمىن ۇلعايتۋعا قاتىستى نەگىزگى مىندەتتەردى اتاعان بولاتىن. ۇكىمەت باسشىسىنىڭ ايتۋىنشا، جەتى جىلدان كەيىن يمپورتتىڭ ۇلەسى 59 پروتسەنتتەن 37-گە دەيىن تۇسەدى. ەسەسىنە وتاندىق تاۋارلاردىڭ كولەمى ارتادى. وسىعان بايلانىستى وڭدەۋشى كاسىپورىندارى ءارتاراپتاندىرۋ شارالارى جالعاسادى.