قازاقستاندا مەديتسينا قىزمەتكەرىنىڭ جالاقىسى كوبەيەدى - ق ر دەنساۋلىق ساقتاۋ ءمينيسترى
ق ر دەنساۋلىق ساقتاۋ ءمينيسترى ەلجان ءبىرتانوۆ ۇكىمەتتىك جۇمىس توبى قۇرامىندا ب ق و- عا كەلگەن ساپارىندا وسىلاي ايتتى، دەپ حابارلايدى قازاقپارات ءتىلشىسى.
ونىڭ ايتۋىنشا، ەلباسىمىز «Nur Otan» پارتياسىنىڭ ХVІІІ سەزىندە دەنساۋلىق ساقتاۋ سالاسىنىڭ الدىنا دا ۇلكەن مىندەتتەر جۇكتەگەنى بەلگىلى.
ەلىمىزدە، اسىرەسە، اۋىلدىق جەرلەردە مەديتسينا كادرلارىنىڭ تاپشىلىعى سەزىلىپ وتىرعانى جاسىرىن ەمەس. سوندىقتان ولاردىڭ جالاقىسىن كوتەرۋ - سۇرانىسقا يە مامانداردى ساقتاپ قالۋدىڭ ءبىر جولى. ويتكەنى جىل سايىن مەديتسينالىق ج و و- لاردى تۇلەكتەر ءبىتىرىپ جاتقانىمەن، ولاردىڭ ءبىرازى جەكە كلينيكالارعا كەتىپ قالىپ جاتادى.
ءمينيستردىڭ سوزىنە قاراعاندا، ەمحانالارعا بارعاندا، مەدبيكەلەردىڭ قارسى الاتىنى بەلگىلى. ولار ورتا ەسەپپەن 70 مىڭ تەڭگەدەي جالاقى الادى. ەندى بۇل كورسەتكىش 100 مىڭ تەڭگەگە جەتەدى. سول سەكىلدى سانيتارلار مەن جۇمىسشىلار ودان دا تومەن ەڭبەكاقى الادى.
سونداي-اق ۋچاسكەلىك دارىگەرلەر جەتىسپەيدى. 1 دارىگەر ەكى ادامنىڭ جۇمىسىن اتقارادى. سونىڭ سالدارىنان كەزەك كوبەيەدى، ساپاعا دا اسەر ەتەدى. ەگەر ولاردىڭ جالاقىسى جوعارى بولسا، ماماندار جەتكىلىكتى بولار ەدى.
«انا مەن بالا ساۋلىعى دا ايرىقشا نازاردا. سوندىقتان پەدياترلاردىڭ دا جالاقىسىن كوتەرۋ كەرەك. الەۋمەتتىك كەسەل سانالاتىن تۋبەركۋلەز، پسيحيكالىق اۋرۋلاردى ەمدەيتىن دارىگەرلەر دە ۇمىت قالماۋى قاجەت»، دەدى ەلجان امانتاي ۇلى.
«مەملەكەت باسشىسى العا قويىپ وتىرعان تاعى ءبىر مىندەت - الداعى ءۇش جىلدا ەلىمىزدە 595 مەديتسينا نىسانى بوي كوتەرەتىن بولسا، سونىڭ 90 پايىزى اۋىلداردا سالىنباق. مۇنداعى ماقسات - مەديتسينالىق قىزمەتتىڭ بارلىق جەردە قولجەتىمدى بولۋى. باتىس قازاقستان وبلىسىندا 22 نىسان تۇرعىزىلماقشى. وبلىس اكىمدىگىنىڭ باستاماسىمەن ورالدا كارديوحيرۋرگيا ورتالىعىن سالۋ دا كوزدەلۋدە»، دەدى مينيستر.