قازاقستان ەتتىڭ العاشقى پارتياسىن يرانعا ەكسپورتتادى

كوكشەتاۋ. قازاقپارات - اقمولا وبلىسى ەتتىڭ العاشقى پارتياسىن يران يسلام رەسپۋبليكاسىنا ەكسپورتتادى، دەپ حابارلايدى قازاقپارات ءتىلشىسى.

قورعالجىن اۋدانىنىڭ سابىندى اۋىلىنداعى «استانا اگروپرودۋكت» ج ش س قازاقستاندا ءبىرىنشى بولىپ يران ەلىنە ەت ەكسپورتتاۋ بويىنشا كەلىسىمشارتقا قول قويىپ، العاشقى پارتياسىن جەتكىزدى.

«قازاقستاننان جەتكەن ەتتىڭ العاشقى پارتياسى يران ەلىنە اقمولا وبلىسىنان جونەلتىلدى. ايتا كەتۋ كەرەك، يران - مۇسىلمان مەملەكەتى بولعاندىقتان، وندا ەتكە دەگەن سۇرانىس جوعارى. بۇل دەگەنىمىز «استانا اگروپرودۋكت» ج ش س شىعاراتىن ەتتىڭ حالال ونىمدەرىنىڭ جوعارى ستاندارتىنا ساي ەكەنىن بىلدىرەدى»، - دەپ اتاپ ءوتتى اقمولا وبلىسى اكىمىنىڭ ورىنباسارى مارات يعاليەۆ.

اقمولا وبلىسىنىڭ كاسىپكەرلىك جانە ونەركاسىپ باسقارماسىنىڭ مالىمەتى بويىنشا، «استانا-اگروپرودۋكت» ج ش س ەت كومبيناتى - وڭىردەگى ەت ونىمدەرىن وڭدەيتىن ءىرى كاسىپورىن سانالادى.

«كاسىپورىن نەمىستىڭ يننوۆاتسيالىق تەحنولوگياسىن قولدانادى. كاسىپورىن ەت ونىمدەرىن ەسپورتتاۋعا باعىتتالعان، باسەكەگە ساي، جوعارى ساپالى «باكارا» برەندىمەن ەت جانە شۇجىق ونىمدەرىن شىعارادى»، - دەيدى باسقارماداعىلار.

ەلباسىنىڭ استانا اينالاسىندا ازىق-تۇلىك بەلدەۋىن دامىتۋ تۋرالى تاپسىرماسىن جۇزەگە اسىرۋ شەڭبەرىندە «باكارا» ەت كومبيناتى ەلوردانىڭ ساۋدا ورىندارىنا ەت ونىمدەرىن ۇسىنىپ، استانالىقتار تاراپىنان جوعارى سۇرانىسقا يە بولىپ وتىر.

«2014-جىلدان باستاپ «استانا-اگروپرودۋكت» ج ش س ماسكەۋ سۋپەرماركەتتەرىنە ەت دەليكاتەستەرىن جەتكىزۋ بويىنشا رەسەي نارىعىنا شىقتى. ال، ق ر اگروونەركاسىپ كەشەنىن دامىتۋ بويىنشا 2017-2021-جىلدارعا ارنالعان مەملەكەتتىك باعدارلامانى جۇزەگە اسىرۋ ارقىلى وتاندىق اۋىل شارۋاشىلىعى تاۋارلارىن وندىرۋشىلەر ءۇشىن جاڭا نارىقتى يگەرۋدە. ءوندىرىستى «حالال» ستاندارتىمەن سەرتيفيكاتتاعان «استانا اگروپرودۋكت» ج ش س قازاقستاندا ءبىرىنشى بولىپ يران ەلىنە ەت ونىمدەرىن جەتكىزۋ بويىنشا كەلىسىمشارت جاسادى»، - دەپ تولىقتىردى ۆەدومستۆودان.

كەلىسىمشارت ءتورت ايعا، ياعني 700 توننا ەت ەكسپورتتاۋعا ارنالعان. قازىرگى كەزدە الدىن الا اقشاسى الىنىپ، 60 توننا ەت جونەلتىلىپ وتىر.

«ناۋرىز ايىنىڭ سوڭىنا دەيىن تاعى جونەلتىلەدى. ال، ءساۋىر ايىنان باستاپ اي سايىن 200 توننادان ەت ەكسپورتتالادى. يران - مۇسىلمان ەلى بولعاندىقتان، مال سويۋ پروتسەسىن وسىندا ارنايى كەلگەن مولدا باقىلاپ وتىرادى. ەت ۆاكۋۋمعا سالىنىپ، سالقىنداتىلعان كۇيدە يرانعا جونەلتىلەدى. العاشقى پارتيا يراندىقتارعا جەتكىزىلدى. ەت ساپاسى مەن ءدامى ولارعا قاتتى ۇنادى. ارىپتەستەرىمىزدىڭ اي سايىنعى ەتكە دەگەن سۇرانىسى - 1000 توننا. سوندىقتان، الداعى ۋاقىتتا ەكسپورت كولەمىن ارتتىراتىن بولامىز»، - دەيدى «باكارا» كومپانيالار توبىنىڭ قۇرىلتايشىسى سەرىك راحىمبايەۆ.

ونىڭ ايتۋىنشا، كومپانيا - قىتايعا ەت ونىمدەرىن جەتكىزۋ بويىنشا اتتەستاتسيالاۋ شارالارىنان ءوتىپ جاتقان بەس كومپانيانىڭ ءبىرى.