ەلباسى قورى قازاق ءتىلىن ۇيرەتەتىن جاڭا جوبالارمەن تانىستىردى

استانا. قازاقپارات - ق ر تۇڭعىش پرەزيدەنتى - ەلباسى قورى جانىنداعى مەملەكەتتىك ءتىلدى دامىتۋ قورى قازاق ءتىلىن ۇيرەنۋگە كومەكتەسەتىن جاڭا جوبالارمەن تانىستىردى، دەپ حابارلايدى قازاقپارات ءتىلشىسى.

و ق ك- دا وتكەن بۇگىنگى باسپا ءسوز ءماسليحاتىندا SSoyle.kz ونلاين-كۋرسىنىڭ اعىلشىنشا جانە لاتىن گرافيكاسىنداعى نۇسقاسى، Android پەن iOs پلاتفورمالارىنداعى Balasoyle موبيلدى قوسىمشاسى، «ۇلى دالا اڭىزدارى» («لەگەندى ۆەليكوي ستەپي») ۆەب-گرافيكالىق روماندار سەرياسى، قازاق ءتىلىن ۇيرەنۋگە ارنالعان Soyletube ۆيدەوجوباسى تانىستىرىلدى. جوبالاردىڭ ىشىندەگى ەرەكشە نازار اۋدارتاتىنى - بۇل SSoyle.kz ونلاين-كۋرسىنىڭ اعىلشىنشا جانە لاتىن گرافيكاسىنداعى نۇسقاسى.

وسى ۋاقىتقا دەيىن قازاق ءتىلىن ۇيرەنۋ مۇمكىندىگىن تەك ورىس ءتىلدى قولدانۋشىلار پايدالانسا، قازىر ونلاين-كۋرس شەت ەلدەردە تۇراتىن قازاقتار مەن اعىلشىن ءتىلدى شەتەلدىكتەرگە قولجەتىمدى بولىپ وتىر. وعان قوسا پورتال ارقىلى جاستار لاتىن گرافيكاسىن مەڭگەرە الادى.

«بۇگىنگى كۇنى SSoyle.kz پورتالىندا 115 مىڭنان استام ادام ءتىل ۇيرەنۋدە. اشىلعالى ونى 5 ميلليوننان استام قازاقستاندىق جانە شەتەلدىك قولدانعان. ال الەۋمەتتىك جەلىلەر ارقىلى كۇندەلىكتى 30 مىڭ ادام قازاق ءتىلىن ۇيرەنەدى. بۇگىنگى كۇنى «Soyle»  موبيلدى قوسىمشاسىن 50 مىڭ ادام جۇكتەگەن. 2016-جىلدان باستاپ «SSoyle.kz» ادىستەمەسى بويىنشا Skype ارقىلى قازاق ءتىلىن وقىتۋ ساباقتارى تەگىن جۇرگىزىلۋدە. «استانا» راديوسىندا اپتاسىنا 3 رەت قازاق ءتىلىن مەڭگەرۋگە ارنالعان باعدارلامالار وتكىزىلەدى»، - دەيدى ق ر تۇڭعىش پرەزيدەنتى - ەلباسى قورىنىڭ باسپا ءسوز-حاتشىسى وكسانا لوسكۋتوۆا.

وكسانا لوسكۋتوۆانىڭ ايتۋىنشا، Balasoyle ءموبيلدى قوسىمشاسى دامىتاتىن ونلاين ويىندار ارقىلى مەكتەپكە دەيىنگى جانە مەكتەپ جاسىنداعى بالالارعا قازاق ءتىلىن ۇيرەتۋدە. جوبا بالالاردىڭ دۇرىس سويلەۋىنە، گرامماتيكا ەرەجەلەرىن مەڭگەرۋگە، سوزدىك قورىن دامىتۋعا جانە قورشاعان ورتانى تانۋعا ىقپال ەتەدى. كۇندەلىكتى پورتالدى 1,5 مىڭ ادام پايدالانادى.

ايتا كەتەرلىگى، بارلىق جوبالار قر تۇڭعىش پرەزيدەنتى - ەلباسى قورى جانە «Samruk-Kazyna Trust»  الەۋمەتتىك جوبالاردى دامىتۋ قورىنىڭ قولداۋىمەن ازىرلەنگەن. قور «ۇلى دالا اڭىزدارى» ونلاين جوباسى اياسىندا ۆەب-گرافيكالىق روماندار سەرياسىن ازىرلەۋدى قولعا الىپ، قازاق، ورىس جانە اعىلشىن تىلدەرىندەگى «QQazcomics.kz» ۆەب-سايتى مەن موبيلدى قوسىمشاسى ازىرلەگەن.

«ۇلى دالا اڭىزدارى» جوباسى «ۇلى ماحاببات تۋرالى جەتى حيكايا» جانە «قازاق جەرىنىڭ ۇلى باتىرلارى» اتتى بولىمدەردەن، سونىمەن قاتار قازاق حالقىنىڭ عاسىردان عاسىرعا، ۇرپاقتان ۇرپاققا جەتكەن تاريحى مەن اڭىزدارىنان تۇرادى. بارلىق اڭىزدار كوپشىلىككە قازاقستاننىڭ كيەلى جەرلەرى تۋرالى تولىعىراق مالىمەت الۋعا مۇمكىندىك بەرەدى.

«Samruk-Kazyna Trust»  قورى الەۋمەتتىك جانە ءتىل جوبالارىن، اتاپ ايتقاندا، قازاق ءتىلىن ۇيرەنۋگە باعىتتالعان «SSoyle.kz» ونلاين- كۋرستارىنا قولداۋ كورسەتۋدە. ونلاين- جوبانىڭ كومەگىمەن كوپتەگەن عالامتور قولدانۋشىلارى مەملەكەتتىك ءتىلدى تەگىن ۇيرەنۋگە مۇمكىندىك الدى»، - دەيدى قوردىڭ الەۋمەتتىك جوبالاردى دامىتۋ قورىنىڭ كورپوراتيۆتىك كوممۋنيكاتسيالار دەپارتامەنتىنىڭ ديرەكتورى ميراس ىرگەبايەۆ.

سونىمەن قاتار، مەملەكەتتىك ءتىلدى دامىتۋ قورى تانىمال Youtube بەينە-پلاتفورماسىندا ءتىلدى مەڭگەرۋگە ارنالعان پايدالى بەينەساباقتار توپتاماسىن ازىرلەگەن. بەينەساباقتار قازاق تىلىندە دۇرىس سويلەۋدى جەتىلدىرۋگە باعىتتالعان جانە كۇندەلىكتى تۇرمىستا ءجيى قولدانىلاتىن مىسالداردان تۇراتىن ديالوگ تۇرىندە تۇسىرىلگەن.

ساباقتار ءتىلدى جاڭادان ۇيرەنىپ باستاعان جانە ونى مەڭگەرىپ العاندارعا كومەكتەسەتىن رەسۋرستار جيناقتالعان. قازىرگى ۋاقىتتا Youtube-ارناسىندا  «Soyletube» ارناسىنىڭ 8 بەينەروليگى جۇكتەلىپ وتىر.