مەملەكەت قانداي جاعدايدا شەتەلدە ەمدەۋ شىعىنىن وتەپ بەرەدى

استانا. قازاقپارات - الەۋمەتتىك مەديتسينالىق ساقتاندىرۋ قورى ەلىمىز ازاماتتارى قانداي جاعدايدا شەتەلدە ەمدەلۋ قۇقىعىنا يە بولاتىنىن ءتۇسىندىردى، دەپ حابارلايدى قازاقپارات ءتىلشىسى.

«قازاقستاندا قولدانىلمايتىن جوعارى تەحنولوگيالى ەمدەۋ ادىستەرىن تالاپ ەتەتىن سىرقات كەزىندە ناۋقاستى ارنايى كوميسسيا شەتەلدىك مەديتسينالىق ۇيىمدارعا جىبەرۋى مۇمكىن. بۇل ماسەلە «قازاقستان رەسپۋبليكاسى ازاماتتارىن بيۋدجەت قاراجاتى ەسەبىنەن شەتەلدە ەمدەۋ ءۇشىن باعىتتاۋ ەرەجەلەرىن بەكىتۋ تۋرالى» №554 بۇيرىقپەن رەتتەلەدى»، - دەلىنگەن قوردىڭ باسپا ءسوز قىزمەتىنىڭ حابارلاماسىندا.

باسىم جاعدايدا شەتەلدىك ەمحانالاردا ەمدەلۋگە كەلەسى ساناتتاعى ازاماتتار جىبەرىلەدى:

 - ورگان ترانسپلانتاتسياسىن جۇرگىزۋگە مۇقتاج پاتسيەنتتەر؛

- اياعى اۋىر ايەلدەر؛

- بالالار؛

- مىندەتىن اتقارۋ كەزىندە اۋىر جاراقات العان اسكەري قىزمەتكەرلەر مەن قۇقىققورعاۋ ورگاندارىنىڭ قىزمەتكەرلەرى؛

بالالار مەن كۇتىمگە مۇقتاج ادامدار شەتەلدىك ەمحانالارعا كۇتىپ باعاتىن ادامىمەن بىرگە بارادى.

كولىكتىك شىعىندار بيۋدجەت ەسەبىنەن وتەلەدى.

قازاقستان ازاماتتارى بيۋدجەت قاراجاتى ەسەبىنەن ەمدەلۋگە باعىتتالاتىن اۋرۋلاردىڭ تۇرلەرى:

- راديوحيرۋرگيالىق ەمدەۋ ءادىسىن تالاپ ەتەتىن ارتەريوۆەنوزدى مالفورماتسيالار نەمەسە ىسىكتەر (گامما- پىشاق)؛

 - ەندوۆاسكۋليارلى ەم جاساۋ ءۇشىن باس ميى باعاناسى تامىرلارىنىڭ جانە جۇلىن ميى تامىرلارىنىڭ ارتەريوۆەنوزدى مالفورماتسياسى، سونداي- اق ارتەريالدى انيەۆريزم كەزىندە؛

- باس سۇيەكتەگى ىسىكتى ترانسورالدى ادىسپەن الىپ تاستاۋ؛

- راديوحيرۋرگيالىق ەمدەۋ ءادىسىن تالاپ ەتەتىن قاتەرلى كوز اۋرۋلارى (گامما- پىشاق، راديواكتيۆتى اپپليكاتورلار)؛

- كەراتوپروتەزدەۋ؛

- جۇرەك، بۇيرەك، باۋىر، وكپە، جىلىك مايىن ترانسپلانتاتسيالاۋدى تالاپ ەتەتىن اۋرۋلار كەزىندە؛

- كومەي ستەنوزى؛

- كەڭىردەك ستەنوزى.

شەتەلدە ەمدەلۋگە ءوتىنىم بەرۋ ءۇشىن كەلەسى قۇجاتتاردى تاپسىرۋ قاجەت:

- جەكە كۋالىكتىڭ كوشىرمەسى؛

- پاتسيەنتتى شەتەلدىك مەديتسينالىق ۇيىمعا جولداۋ كەرەكتىگى تۋرالى وبلىستىق دەنساۋلىق ساقتاۋ باسقارماسىنىڭ ءوتىنىش حاتى؛

- زەرتتەۋ ناتيجەلەرى جازىلعان ناۋقاستىڭ اۋرۋ تاريحىنان كوشىرمە؛

- شەتەلدە ەمدەۋ قاجەتتىگى تۋرالى مەديتسينالىق قورىتىندى.

«شەشىمدى دەنساۋلىق ساقتاۋ مينيسترلىگىنىڭ ارنايى كوميسسياسى قابىلدايدى. ونىڭ قۇرامىنا مينيسترلىكتىڭ، ۇكىمەتتىك ەمەس ۇيىمداردىڭ مۇشەلەرى مەن دارىگەرلەر كىرەدى. بۇل رەتتە، مەملەكەتتىك بيۋدجەت شەتەلدىك مەديتسينالىق ۇيىمعا وزدىگىمەن جۇگىنگەندەردىڭ شىعىنىن وتەمەيدى»، - دەپ ەسكەرتەدى قوردان.

اۆتور: ايان بەكەن ۇلى