وتاندىق «مۇزبالاق» مۋلتفيلمى رەسەيدەگى كينوفەستيۆالگە قاتىسۋدا

استانا. قازاقپارات - «مۇزبالاق» انيماتسيالىق فيلمى رەسەيدەگى كينوفەستيۆالگە قاتىسۋدا، دەپ حابارلايدى قازاقپارات مادەنيەت مينيسترلىگىنىڭ سايتىنا سىلتەمە جاساپ.

  تۇردىبەك مايدان مەن تىلەك تولەۋعازىنىڭ تولىقمەترلى انيماتسيالىق «مۇزبالاق» اتتى كارتيناسى XVII حالىقارالىق «وت رۋحى» («دۋح وگنيا» ) اتتى دەبيۋتتىك فيلمدەر كينوفەستيۆالىنىڭ، جاسوسپىرىمدەر مەن بالالارعا ارنالعان تۋىندىلارى «سەنىڭ كينوڭ» («تۆوە كينو» ) كونكۋرستىق باعدارلاماسىنا قاتىسىپ، باق سىناماق. فەستيۆال رەسەي فەدەراتسياسىنىڭ حانتى- مانسييسك قالاسىندا 1-6 - ناۋرىز ارالىعىندا وتەدى.

 ايتا كەتەرلىگى، فيلم ق ر مادەنيەت جانە سپورت مينيسترلىگىنىڭ تاپسىرىسى بويىنشا «قازاقفيلم» كينوستۋدياسىندا تۇسىرىلگەن.

 اۆتورلار «مۇزبالاق» اتتى انيماتسيالىق فيلمى ارقىلى تاريح قويناۋىنا ەنىپ، جوعالىپ بارا جاتقان، قازاقتىڭ عاسىرلار بويى قالىپتاسقان ساياتشىلىق مادەنيەتىن كورسەتۋ ارقىلى، اداممەن بۇركىت اراسىنداعى سەنىم نەگىزىنە قۇرالعان دوستىقتى جاس ۇرپاق ساناسىنا ءسىڭىرۋدى كوزدەيدى.

«بۇل فەستيۆال كوپتەن بەرى وتكىزىلىپ كەلەدى. الايدا، انيماتسيالىق فيلم العاش رەت قاتىسىپ وتىر. ال بۇل تۋىندى ءبىزدىڭ «قازاقفيلم» كينوستۋدياسىنىڭ مۋلتفيلمى ەكەنى ەكى ەسە قۋانتادى. فەستيۆالدىڭ اتىنىڭ ءوزى - «وت رۋحى» - تۇركى الەمىنە وتە جاقىن تانىم. سوندىقتان دا ءبىز «مۇزبالاق» مۋلتفيلمى جۇلدەسىز قالمايدى دەپ سەنەمىز»، - دەپ مالىمدەدى كارتينانىڭ سسەناري اۆتورلارىنىڭ ءبىرى ءارى قويۋشى- رەجيسسەرى اداي ءابىلدينوۆ.