سيفرلىق قازاقستان: اقپاراتتىق تەحنولوگيالار قاي سالاعا ەنگىزىلدى؟

استانا. قازاقپارات - ق ر اقپارات جانە كوممۋنيكاتسيالار ءمينيسترى داۋرەن ابايەۆ «سيفرلىق قازاقستان» باعدارلاماسىن ىسكە اسىرۋدىڭ ناتيجەسى بويىنشا ەسەپ بەردى، دەپ حابارلايدى قازاقپارات ءتىلشىسى.

ءمينيستردىڭ ايتۋىنشا، وتكەن جىلى باعدارلاما اياسىندا اقپاراتتىق تەحنولوگيالار ءبىرقاتار سالالارعا ەنگىزىلدى. سونىڭ ناتيجەسىندە ەڭبەك ونىمدىلىگى ارتىپ، ءبىراز قاراجات ۇنەمدەلدى.

«ماسەلەن، وتىن- ەنەرگەتيكا جانە تاۋ-مەتاللۋرگيا سالارىندا 4.0 يندۋسترياسىنىڭ ەلەمەنتتەرىن ەنگىزۋدىڭ ناتيجەسىندە ەڭبەك ونىمدىلىگى ورتاشا ەسەپپەن 10 پروتسەنتكە ارتتى. ال ەلەكتر قۋاتى 33 پروتسەنتكە دەيىن ۇنەمدەلدى. مىسالى، «ەمبى مۇناي گاز» ا ق- سى مۇناي ءوندىرۋدى 773 تونناعا ارتتىردى. بيىل وسىنداي جۇيە بويىنشا جۇمىس ىستەيتىن نىسانداردىڭ سانى 12 دەيىن كوبەيەدى. تاۋ-كەن سالاسىندا 102 كاسىپورىننىڭ دەرەكتەرىن سيفرلاندىرۋعا جانە اقپاراتتىق اعىندى باسقارۋعا مۇمكىندىك تۋدى. تاعى ءبىر مىسال، قورلاردى جوسپارلاۋعا اقپاراتتىق جۇيەسىن ەنگىزۋ ارقىلى ERG ءبىرتۇتاس ماسسيۆ بويىنشا جۇمىس ىستەيدى. بيزنەس پروتسەستەر اشىق جۇرگىزىلەدى. قىزمەتكەرلەر قوسىمشا ءبىلىم الدى. 250 جاڭا جۇمىس ورنى اشىلدى»، - دەدى د. ابايەۆ ۇكىمەتتىڭ بۇگىنگى وتىرىسىندا.

ونىڭ سوزىنە قاراعاندا، كولىكتىك- لوگيستيكا سالاسىن تسيفرلاندىرۋ اياسىندا «زياتكەرلىك كولىك جۇيەسى» ىسكە اسىرىلىپ جاتىر. بۇگىندە 46 ارنايى ولشەۋ قۇرالىنىڭ 12 ورناتىلدى.

«سونداي-اق، جول اكتيۆتەرىن باسقارۋ جۇيەسى ىسكە قوسىلدى. ونىڭ اياسىندا 16 جىلجىمالى جول زەرتحاناسى ءوز جۇمىسىن باستادى. بۇل جول ينفراقۇرىلىمىنىڭ ساپاسىن ارتتىرادى دەپ سەنەمىز. اتالعان جۇيە جولعا جۇمسالاتىن شىعىنداردى جوسپارلاۋعا جانە جوندەۋ جۇمىستارى كەزىندە ساپانى باقىلاۋعا مۇمكىندىك بەرەدى. 2019-جىلى رەسپۋبليكالىق دەڭگەيدەگى 24 مىڭ شاقىرىمدى قۇرايتىن اۆتوجولداردى زەرتتەۋ ماقساتىندا 31 ارنايى اۆتوماتتاندىرىلعان ولشەۋ قۇرالىن ەنگىزۋ جوسپارلانىپ وتىر. ينتەللەكتۋالدى كولىك جۇيەسىن ەنگىزۋدىڭ ناتيجەسىندە وتكەن جىلى 279 جۇمىس ورنى اشىلدى. 2025 -جىلعا قوسىمشا 1,5 مىڭنان استام جۇمىس ورنىن اشۋ كوزدەلگەن»، - دەپ اتاپ كورسەتتى د. ابايەۆ.