تۇركىستاندا جارىقشامدار شىعاراتىن زاۋىتتىڭ ىرگەتاسى قالاندى

استانا. قازاقپارات - تۇركىستان قالاسىنداعى يندۋستريالدى ايماقتا جارىقشامدار شىعاراتىن زاۋىتتىڭ ىرگەتاسى قالاندى.

بۇل تۋرالى قازاقپارات اكىمدىكتىڭ باسپا ءسوز قىزمەتىنە سىلتەمە جاساپ حابارلايدى.

سالتاناتتى ءىس-شاراعا تۇركىستان وبلىسىنىڭ اكىمى جانسەيىت تۇيمەبايەۆ، قىتايدىڭ «Tai-Tur Energy»  ج ش س- ءنىڭ ديرەكتورى چەن حۋەي جانە «Source Energy» كومپانياسىنىڭ باقىلاۋشىلار كەڭەسىنىڭ جەتەكشىسى ورالبەك بوتباي قاتىستى.

بۇعان دەيىن قىتايلىق ينۆەستوردى وبلىس اكىمى جانسەيىت تۇيمەبايەۆ ارنايى قابىلداپ، سول كەزدەسۋدە ەكىجاقتى مەموراندۋمعا قول قويىلعان بولاتىن. جيىندا ءوڭىر باسشىسى تۇركىستان وبلىسىندا ينۆەستورلارعا قولايلى جاعداي جاسالعانىنا توقتالدى. ءوندىرىستى دامىتۋعا، جۇمىسسىزدىقتى ازايتۋعا باعىتتالعان جوبالاردى بىرلەسىپ اتقارۋعا دايىن ەكەنىن جەتكىزدى.

«تۇركىستان - ەلىمىزدەگى تۇرعىندار سانى كوپ وبلىستاردىڭ ءبىرى. مۇندا كاسىپكەرلىكتى، ءوندىرىستى دامىتۋعا زور مۇمكىندىك بار. جۇمىس كۇشى دە، ينۆەستورلارعا ارنالعان قولداۋ دا جەتكىلىكتى. يندۋستريالدى ايماقتان ارنايى 5 گەكتار جەر بەرىلىپ وتىر. زاۋىتتىڭ قۇرىلىسى ۋاقتىلى ءارى ساپالى جۇرگىزىلۋى ءتيىس»، - دەدى وبلىس اكىمى.

«Tai-Tur Energy» - قىتاي حالىق رەسپۋبليكاسىنداعى ەڭ بەدەلدى كومپانيالاردىڭ ءبىرى. بۇل كومپانيانىڭ ديودتى ءارى ەلەكترۇنەمدەگىش جارىقشامدارى قىتايدىڭ ءىرى قالالارىندا قولدانىسقا ەنگىزىلگەن. كوشەلەر مەن ءىرى ماگيسترالداردى جانە الىپ عيماراتتاردى جارىقتاندىرۋ ىسىندە ۇلكەن جەتىستىككە جەتكەن. جوبالارى دا اۋقىمدى. اتالعان كومپانيا ەلىمىزدە ءبىرىنشى رەت تۇركىستان وبلىسىنا ينۆەستيتسيا سالۋعا قول جەتكىزىپ وتىر. ينۆەستيتسيانىڭ قۇنى - 200 ميلليون ا ق ش دوللارى.

تۇركىستانداعى يندۋستريالدى ايماقتا ىرگەتاسى قالانعان كومپانيانىڭ قۇرىلىسى 3 جىلدا اياقتالادى دەپ كۇتىلۋدە. وسى ارقىلى باستاپقىدا 700 ادام جۇمىسپەن قامتىلماق. سۇرانىس پەن ءوندىرىس قۋاتتىلىعىنا ساي جۇمىسشىلار سانى ارتۋى مۇمكىن. زاۋىتتىڭ ونىمدەرى قازاقستاننان بولەك كورشىلەس مەملەكەتتەرگە دە ەكسپورتتالادى.