قازاقستاندا حالىق ساناعىن جۇرگىزۋ ۋاقىتى اۋىستىرىلۋى مۇمكىن
كوميەتتىڭ مالىمەتىنشە، قازاقستان زاڭناماسى جانە حالىقارالىق ۇسىنىستار بويىنشا، حالىق ساناعى كەمىندە ون جىلدا ءبىر رەت جۇرگىزىلەدى. بۇل حالىق ساناعىن جۇرگىزۋ مەرزىمدەرىنىڭ كەزەكتى الەمدىك راۋندتارمەن سالىستىرمالىلىعىن قامتاماسىز ەتۋ ءۇشىن جاسالادى. سوندىقتان ساناق جۇرگىزۋ اراسىندا ون جىلدىق مەرزىمدى ساقتاۋعا قازاقستان ءۇشىن 2019-جىلعى قازان مەن 2020-جىلعى قازان ايى اراسىنداعى مەرزىم قولايلى.
قازاقستاندا حالىق ساناعىن جۇرگىزۋگە دايىندىق 2017-جىلى باستالىپ كەتكەن. حالىقارالىق ادىستەمە بويىنشا، ساناق جۇرگىزۋ ءۇشىن ەڭ قولايلى مەرزىم - تۇرعىندار موبيلدىلىگى ەڭ تومەن كەزەڭ (كۇزگى-قىسقى ماۋسىم) بولىپ تابىلادى. ياعني بۇل كەزەڭ تۇرعىنداردى قامتۋ جانە جينالعان مالىمەتتەر ساپاسى تۇرعىسىنان تابىستى وتكىزىلۋىنە كوپ مۇمكىندىك بەرەدى.
«وسىعان بايلانىستى 2020-جىلى حالىق ساناعىن جۇرگىزۋدىڭ ەڭ قولايلى مەرزىمدەرى اقپان- ناۋرىز ايلارى بولىپ تابىلادى. ۇلتتىق ساناقتى جۇرگىزۋمەن بايلانىستى ءبىرقاتار ۇيىمداستىرۋشىلىق جانە نۇسقاۋلىق ساتتەردى ەسەپكە الا وتىرىپ، ق ر حالقىنىڭ ۇلتتىق ساناعىن 2020-جىلدىڭ باسىندا وتكىزۋ تۋرالى شەشىم قابىلداندى»، - دەپ ءمالىم ەتتى ۆەدومستۆودان.
قازىرگى كەزدە ۇكىمەتتىڭ «2020-جىلى قازاقستان رەسپۋبليكاسى ۇلتتىق حالىق ساناعىن وتكىزۋ تۋرالى» قاۋلىسىنىڭ جوباسى مەملەكەتتىك ورگاندار جانە جەرگىلىكتى اتقارۋشى ورگاندار، اككرەديتتەلگەن ۇيىمدار، «اتامەكەن» ۇلتتىق كاسىپكەرلەر پالاتاسىمەن كەلىسۋ ۇستىندە، سونداي-اق ق ر ۇلتتىق ەكونوميكا مينيسترلىگىنىڭ ينتەرنەت-رەسۋرسىندا تالقىلاۋ ءۇشىن قولجەتىمدى.
«قاۋلى جوباسىن كەلىسۋ جانە قابىلداۋ جاعدايىندا، ۇلتتىق حالىق ساناعىن 2020-جىلدىڭ 5- اقپانى مەن 5- ناۋرىز ارالىعىندا وتكىزۋ جوسپارلانىپ وتىر»، - دەپ ءمالىم ەتتى باسپا ءسوز قىزمەتىنەن.