تەمىرجول ستانسالارى باسشىلارىنىڭ پارامەن ۇستالعان ۆيدەوسى جاريالاندى

استانا. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى تەمىرجول ستانسالارىنىڭ باسشىلارىن ۇستاۋ كەزىندەگى ۆيدەونى جاريالادى، دەپ حابارلايدى قازاقپارات ءتىلشىسى.

سىبايلاس جەمقورلىققا قارسى ءىس- قيمىل ۇلتتىق بيۋروسى ءتوراعاسىنىڭ ورىنباسارى شىڭعىس قابدوللانىڭ ايتۋىنشا، تەمىرجول قاتىناسى سالاسىنداعى جەمقورلىق ارەكەتتەر جۇيەلى تۇردە قايتالانادى. شەنەۋنىكتەر دە، باسقا باسشىلار دا ءوز قىزمەتتەرىن اسىرا پايدالانىپ جاتادى.

«ماسەلەن، وسى اپتادا «قازاقستان تەمىرجولى» ا ق-سىنا قاراستى قوستاناي جولدارى بولىمشەسى فيليالىنىڭ ديرەكتورى، ونىڭ ورىنباسارى جانە ستانسيا باسشىسى ۇستالدى. ولار كاسىپكەردەن جالپى سوماسى 6,1 ميلليون تەڭگە كولەمىندە پارا العان. سول ءۇشىن تاۋارلاردى تاسىمالداۋعا قاجەتتى ۆاگونداردى كەدەرگىسىز بەرۋگە ۋادە ەتكەن»، - دەدى ش. قابدوللا استانادا وتكەن باسپا ءسوز ءماسليحاتىندا.

ونىڭ ايتۋىنشا، الماتى وبلىسىندا بۋرۋنداي ستانسياسىنىڭ باسشىسى دا پارا العانى ءۇشىن كۇدىككە ءىلىنىپ وتىر. ول ۆاگون ۇسىنعانى ءۇشىن كاسىپكەردەن 100 مىڭ تەڭگە تالاپ ەتكەن.

ايتا كەتكەن ءجون، سوڭعى ءۇش جىلدىڭ ىشىندە تەمىرجول تاسىمالى سالاسىندا 70 جەمقورلىق ارەكەتى انىقتالدى. سول ءۇشىن 33 لاۋازىمدى تۇلعا قىلمىستىق جاۋاپقا تارتىلدى، ولاردىڭ ىشىندە 28 ادام سوتتالدى.

«تەمىرجول قاتىناسى سالاسىنداعى جەمقورلىق ارەكەتتەرى جۇمىسقا قابىلداۋدان باستاپ مەملەكەتتىك ساتىپ الۋلار، جولاۋشىلار مەن جۇك تاسىمالىنا دەيىن تارالىپ كەتكەن. باسشىلار دا، جولسەرىكتەر دە جاۋاپقا تارتىلادى»، - دەپ اتاپ كورسەتتى ش. قابدوللا.