قوعامدىق كەڭەس بەلسەندىلەرىنە سىياقى بەرىلەدى
ولاردى ارنايى زاڭ جوباسىنا ەنگىزۋ جوسپارلانعان، دەپ حابارلايدى قازاقپارات ءتىلشىسى.
ءمينيستردىڭ ايتۋىنشا، قوعامدىق كەڭەسكە مۇشە ازاماتتاردىڭ بەلسەندىلىگىن ارتتىرۋ ءۇشىن موتيۆاتسيا بولۋى قاجەت. سونىڭ ىشىندە اقشالاي ستيمۋلدى دا قولدانۋعا بولادى.
«قوعامدىق كەڭەس مۇشەلەرىنىڭ ارنايى رەيتينگىن ەنگىزۋ ۇسىنىلىپ وتىر. سوندا ءاربىر ماسەلە، پەتيتسيا، قوعامدىق تىڭداۋ ءۇشىن ۇكىمەتتىك ەمەس ۇيىمدارعا نەمەسە جەكە تۇلعالارعا ۇپاي بەرىلەدى. وسى جۇمىستىڭ ناتيجەسىندە ۇكىمەتتىك ەمەس ۇيىمعا سىياقى بەرىلەدى. ول ءۇشىن مەملەكەتتىك-الەۋمەتتىك تاپسىرىس، گرانتتار مەن سىياقىلار تۋرالى زاڭناماعا وزگەرىستەر ەنگىزىلەدى»، - دەدى د. كالەتايەۆ قوعامدىق كەڭەستەردىڭ II رەسپۋبليكالىق ماجىلىسىندە.
ونىڭ سوزىنە قاراعاندا، قوعامدىق كەڭەس وتىرىستارىنا قاتىسۋ ەرەجەسىن دە كۇشەيتۋ كوزدەلگەن. ماسەلەن، كەڭەس مۇشەسى ءۇش وتىرىسقا كەلمەسە، ونى كەڭەس قۇرامىنان بىردەن شىعارىپ تاستايدى.
«ونداي ازامات باسقا كەڭەستەرگە دە مۇشە بولا المايدى. ال قۇزىرەتتى مەملەكەتتىك ورگان «قارا ءتىزىمدى» جۇرگىزەدى. ترانسفورماتسيانىڭ ناتيجەسىندە ورتالىق مەملەكەتتىك ورگاندارداعى كەڭەستەر - 35 پروتسەنتكە، ال وبلىس دەڭگەيىندەگى قوعامدىق كەڭەستەر 25 پروتسەنتكە كەڭەيەدى دەگەن بولجام بار. قالالىق جانە اۋداندىق كەڭەستەر شامامەن 20 پروتسەنتكە وڭتايلاندىرىلادى. سوندا قوعامدىق كەڭەستەردىڭ تيىمدىلىگى ارتادى. قازىر «قوعامدىق كەڭەس تۋرالى» زاڭ جوباسى ازىرلەنىپ جاتىر. اعىمداعى جىلى ماۋسىم ايىندا اتالعان قۇجات پارلامەنت ماجىلىسىنە ەنگىزىلەدى»، - دەپ اتاپ كورسەتتى د. كالەتايەۆ.
ايتا كەتەيىك، بۇگىنگى جيىندا دارحان امان ۇلى قوعامدىق كەڭەستەردىڭ نەگىزگى پروبلەمالارىن اتادى. ونىڭ ايتۋىنشا، قازىرگى قوعامدىق كەڭەستەر «اقساقالدار جينالىسى» بولىپ كەتتى. سونداي-اق، مينيستر رەسپۋبليكالىق ماڭىزى بار ءۇش قالادا جاستارعا ارەندالىق باسپانانى تاراتۋ مەرزىمى تۋرالى ايتتى.