قازاقستاندا جاسالعان بىرەگەي وپەراتسيا بىزدەن گورى شەتەلدە كوپ تالقىلاندى - داۋرەن ابايەۆ
«شىنىندا دا، بۇل يۋري ۆلاديميروۆيچ پيا باسقارىپ وتىرعان كارديوحيرۋرگتاردى عانا ەمەس، بۇكىل وتاندىق مەديتسينانى قۇتتىقتاۋعا تۇرارلىق جاڭالىق. بۇل - الەمدىك اۋقىمداعى جەتىستىك. بىلەسىز بە، بۇل جاڭالىق ءبىزدىڭ ەلدەن گورى شەتەلدە كەڭىنەن تالقىلانعان تاقىرىپتاردىڭ ءبىرى. الماتىلىق پاتسيەنت يسمايل تۇرسىنوۆقا قان اينالىمى ءۇشىن قوسالقى قۇرىلعى يمپلانتاتسياسى جاسالدى. مۇنداي وتا الەمنىڭ بىردە-ءبىر ەلىندە جاسالماعان. جىلىنا 150 گە تارتا پاتسيەنت وسىنداي وتاعا مۇقتاج بولادى. بۇكىل الەمنىڭ مەديتسينا سالاسىنداعى كاسىپقوي ماماندارى مەن ساراپشىلارى وسى جەتىستىكتى ەرەكشە اتاپ وتۋدە. مەنىڭ ويىمشا، بۇل قادام ءبىزدىڭ ەلدەگى دەنساۋلىق ساقتاۋ سالاسىنىڭ جاقسى كورسەتكىشى بولا الادى»، - دەدى داۋرەن ابايەۆ.
ەسكە سالا كەتسەك، ۇلتتىق عىلىمي كارديوحيرۋرگيالىق ورتالىق ماماندارى جاقىندا الەم بويىنشا العاش رەت تاعى ءساتتى وپەراتسيانى جاساعان بولاتىن. ونىڭ باستى ەرەكشەلىگى سول، ادامنىڭ جۇرەگىنە سىمسىز قاناينالىم قۇرىلعىسى ورناتىلعان.
ورتالىق باسشىسى يۋري پيانىڭ ايتۋىنشا، جۇرەكتىڭ سول جاق قارىنشاسىنىڭ كومەكشى قۇرىلعىسى ادامعا ەركىن قوزعالۋعا مۇمكىندىك بەرەدى. سەبەبى سىرتقا ەشقانداي كابەلدەر شىعارىلمايدى. ال قاناينالىم قۇرىلعىسىن زاريادتاۋ وڭاي، ونىڭ قۋاتى 8 ساعاتقا جەتەدى. بىرەگەي وپەراتسيا 24 جاستاعى يسمايل تۇرسىنوۆقا جاسالدى.