نازاربايەۆتىڭ تاپسىرماسىمەن قازاقستاندا بالالار قۇقىعىن قورعاۋ كەڭەسى قۇرىلدى
پارتيا ءتوراعاسىنىڭ ورىنباسارى ماۋلەن اشىمبايەۆ مالىمدەگەندەي، استانادا بەس ءبۇلدىرشىننىڭ ءولىمى قوعامدا وزەكتى الەۋمەتتىك ماسەلەلەردىڭ بار ەكەنىن كورسەتتى.
كەڭەس قۇرۋ يدەياسى بۇرىننان ويدا بولعان، ءبىراق قايعىلى وقيعا ونى قۇرۋدى تەزدەتكەن.
«راسىمەن، بەس بىردەي ءبۇلدىرشىننىڭ قاپىدا قازا بولۋى تۇتاس حالىقتىڭ قابىرعاسىن قايىستىرىپ جىبەردى. وكىنىشتەن وزەگىمىز ورتەنەدى. ەندى وسىنداي قاسىرەتتىڭ قايتالانباۋى ءۇشىن ارەكەت ەتۋىمىز كەرەك.
وسىعان وراي ەلباسى تاپسىرماسى بويىنشا «نۇر وتان» پارتياسى جانىنان «بالالار قۇقىعىن قورعاۋ جونىندەگى كەڭەس» قۇرىلدى. بالالار قۇقىعىن قورعاۋ سالاسىندا ءبىرقاتار تاسىلدەمەنى تۇبەگەيلى وزگەرتپەكپىز. سونداي-اق كوپبالالى انالارعا كوبىرەك كومەك كورسەتىلەدى»، - دەپ ايتقان ەدى اشىمبايەۆ.
كەڭەس قازاقستاننىڭ بارلىق ايماقتارىندا ارەكەت ەتەدى. كەڭەس مۇشەلەرى قازاقستاندىق وتباسىلارعا وزدەرى باراتىن بولادى.
ونىڭ مىندەتتەرىنىڭ ءبىرى - كىشكەنتاي بالاسى بار اتا-انالاردىڭ جۇمىس ىستەۋىنە جاعداي جاساۋ، كوپبالالى وتباسىلاردى دەمەۋ، بالالاردى قورعاۋ جونىندەگى زاڭدى تالداۋ جانە بالالار قۇقىعى بۇزىلۋى فاكتىلەرىن قاراۋ.
كەڭەسكە ءماجىلىس دەپۋتاتتارى، مەملەكەتتىك ورگاندار قىزمەتكەرلەرى، ساراپشىلار جانە قوعام بەلسەندىلەرى كىردى. كەڭەس ءتوراعاسى بولىپ ماۋلەن اشىمبايەۆ تاعايىندالدى.
كەڭەستىڭ ءوزىنىڭ جەكە سايتى بولادى. وندا قازاقستاندىقتار ءوز تالاپتارى مەن وتىنىشتەرىن قالدىرا الادى.