قاتتى ايازدا كولىكسىز قالماۋ ءۇشىن نە ىستەۋ كەرەك؟
بۇرقاسىن بۋىپ تاستاعان سوڭ، كەي ادام كولىكتەرىن كوشەگە قالدىرىپ كەتۋگە ءماجبۇر بولعان، دەپ حابارلايدى «حابار 24».
ءبىراق قاتتى ايازدان تەمىر تۇلپارلارى قاتىپ، ەرتەسى وتالماي قالىپتى. ال كولىك قىزدىرۋدى كاسىپ كوزىنە اينالدىرعاندار بۇل كۇنى باعانى دا اسپانداتىپ جىبەرگەن. قىزمەتتەرىنە كەمى 15 مىڭ تەڭگە سۇرايدى. ال قالتاسىندا مۇنداي قارجىسى جوقتار قارا سۋىقتا قاراجاياۋ قالعان. ساقىرلاعان سارى اياز ءمادينا ءابدۋوۆانى دا اۋرە-سارساڭعا سالعان. كەشە جۇمىس كۇنى بىتكەن سوڭ، كولىگىن وتالدىرۋعا شىققان ەكەن. ءبىراق قاتتى ايازدان تەمىر تۇلپارى قاتىپ قالعان. قىرسىق قىلعاندا، كومەك كورسەتەر جان دا بىردەن تابىلا قويماپتى.
ءمادينا ءابدۋوۆا، قالا تۇرعىنى:
- كولىگىمدى ۇزاق وتالدىرا الماي تۇردىم. سول كەزدە ماڭايدان بىرنەشە جاس جىگىت ءوتتى. ولاردان كومەك سۇراپ ەدىم، سوزىمە قۇلاق اسپادى. ارادا بىرنەشە ۋاقىت وتكەندە عانا قارت كىسى كەلىپ، جاعدايىمدى سۇرادى. قانشا تىرىسقانىمەن، ول كىسى دە كولىگىمدى وتالدىرا المادى. امالىم قۇرىعان سوڭ، كولىكتى وسىندا قالدىرىپ كەتتىم.
اقپاننىڭ ايازىندا ءمادينا سىندى استىنداعى كولىگىنەن ايرىلعان جاندار كوپ استانادا. مۇنى بىلەتىن پىسىقايلار قىزمەت قۇنىن دا ءبىر-اق كۇندە ءوسىرىپ جىبەرگەن. ولار ءبىر كولىكتى قىزدىرىپ بەرۋ ءۇشىن كەمى 15 مىڭ تەڭگە سۇرايدى. تەمىر تۇلپارلاردى جىبىتەتىن قۇرىلعىلار قىمبات بولعان سوڭ، قۇندى دا وسىرۋگە ءماجبۇرمىز دەيدى ولار.
روديون ارحانگەلسكي، كولىك جوندەۋشى:
- قالادا مۇنداي قىزمەت ءتۇرى 10-15 مىڭ تەڭگە تۇرادى. ودان دا كوپ سۇرايتىندارى بار. ويتكەنى كولىكتى قىزدىراتىن قۇرىلعىلار قىمبات. مەنىڭشە، ادامدارعا قيىن كەزدە كومەكتەسۋ كەرەك. سوندىقتان مەن كولىكتى ءجىبىتىپ بەرۋ ءۇشىن 5-7 مىڭ تەڭگە الامىن.
قالتاسىندا مۇنداي قاراجاتى جوقتار قانشاما. ۇسكىرىك اياز الەككە سالعان سوڭ، امالسىز كولىكتەرىن كوشەگە تاستاپ كەتۋگە تۋرا كەلەدى. كولىك قىزدىراتىندار ونداي جاعدايعا تاپ بولماس ءۇشىن قۇندى كەڭەسكە قۇلاق تۇرگەن ابزال دەيدى.
روديون ارحانگەلسكي، كولىك جوندەۋشى:
- كولىكتىڭ مايىن ۋاقىتىلى اۋىستىرىپ تۇرۋ كەرەك. اككۋمۋلياتوردىڭ كۇشىن تەكسەرۋ قاجەت. قىسقا قالاي قامدانساق، كولىكتى دە سولاي باپتاعان دۇرىس. كوپ ادام اياز تۇسپەي تۇرىپ ءبىراز شىعىندالاتىن شىعار، ەسەسىنە قىستى كۇنى قامسىز جۇرەدى. ولاي ەتپەگەن جاعدايدا، شىعىنعا بەلشەسىنەن باتۋى مۇمكىن.
ماماندار سۋىق كۇندە كولىكتى ءجيى وتالدىرىپ، قىزدىرىپ تۇرعان دۇرىس دەيدى. سول كەزدە قاتپايدى. ياكي اككۋمۋلياتورىن جىلى ورىنعا قويۋ كەرەك، بولماسا كيىزبەن وراپ تاستاعان دۇرىس. ويتكەنى بيىل تەرىسكەيدە قىس قىتىمىر مىنەز تانىتىپ تۇر. اۋا رايىن بولجاۋشىلار مۇنداي سۋىق ءالى ءبىراز كۇن ساقتالاتىنىن ايتادى. سوندىقتان وقتا-تەكتە وپىق جەپ قالماۋ ءۇشىن الدىن الا قامدانعان ءجون.
www.24.kz