وسى عاسىردىڭ سوڭىنا دەيىن مۇحيت سۋىنىڭ ءتۇسى جاسىلعا وزگەرەدى

استانا. قازاقپارات - ماسساچۋسەتس تەحنولوگيالىق ينستيتۋتى عالىمدارى كليماتتىڭ وزگەرۋى مۇحيتتاعى فيتوپلانكتونعا اسەر ەتىپ، ون جىلدان كەيىن بۇل مۇحيت ءتۇسىنىڭ وزگەرۋىنە الىپ كەلەتىنىن انىقتادى.

The Nature جۋرنالىنىڭ جازۋىنشا، مۇحيت ءتۇسى جاسىل نەمەسە قانىق كوك تۇسكە بويالۋى مۇمكىن.

«عالىمدار مۇحيت ەكوجۇيەسىندەگى العاشقى وزگەرىستەردى سپۋتنيك ارقىلى باقىلاپ، ءبىرىنشى بولىپ بايقايتىن بولادى. ولار جاھاندىق جىلىنۋ كەزىندەگى فيتوپلانكتوننىڭ جارىقتى جۇتۋىن قاداعالاپ، ونىڭ مۇحيت تۇسىنە اسەرى بارىن انىقتاعان»، - دەپ جازادى باسىلىم.

اۆتوردىڭ پايىمىنشا، 2100 -جىلعا قاراي الەمدىك مۇحيتتىڭ ءتۇسى قازىرگىدەن 50 پايىزعا وزگەرەدى.

«عالىمداردىڭ ايتۋىنشا، مۇحيتتىڭ كوك ءتۇستى جەرلەرى ودان سايىن قويۋلانا تۇسەدى، ال پوليۋستەرگە جاقىن ورنالاسقان مۇحيت سۋىنىڭ ءتۇسى جاسىل بولادى» دەپ جازادى باسىلىم.