بەس بالانىڭ ءولىمى: قازاقستاندىقتار قارالى وتباسىعا قولۇشىن بەرىپ جاتىر
تەك بۇل جازبامىزدا قارا جامىلعان وتباسىنىڭ قايعىسىن تەڭ بولىسپەككە ۇمتىلعان بارلىق قازاقستاندىقتاردىڭ باستامالارىن اتاپ ءوتۋدى ءجون كوردىك، دەپ حابارلايدى قازاقپارات.
كوكتالدا كەشە بەس بالانى سوڭعى ساپارعا شىعارىپ سالدى. راسىمگە كەلگەن حالىقتىڭ قاراسى مول. قابىرعاسىن ءبىر-بىرلەپ سوكسەڭ دە، قاباق شىتپاس ەرلەردىڭ ءوزى كوز جاسىنا ەرىك بەردى.
حالىقتىڭ مول شوعىرى تىركەلگەن الەۋمەتتىك جەلىنى اشساڭىز، بۇل وقيعاعا قابىرعاسى قايىسپاعان، كوڭىل ايتپاعان ادامنىڭ كەمدە-كەم ەكەنىن كورەسىز. شيەتتەي بالالارىن اسىراۋ ءۇشىن ءتۇن قاتىپ ءجۇرىپ، جۇمىسقا جەگىلگەن اكە مەن شەشەنىڭ ءبىر ەمەس، ءتورت نەسيەسىنىڭ بارى بەلگىلى بولدى.
الەۋمەتتىك جەلىدە تاراعان وتباسىنىڭ شوتىنا حالىق شاما-شارقىنشا اقشا اۋدارىپ جاتىر. الماتى جۇرتشىلىعى بۇگىن استانادا ۇيىندە ورتەنىپ كەتكەن 5 بالانى ەسكە الۋ ءۇشىن 28 پانفيلوۆشىلار پاركىندەگى ماڭگىلىك الاۋ ماڭىنا جينالدى. قايعىلى قازا قابىرعاسىن قايىستىرعان جۇرتشىلىق ءۇنسىز عانا الاۋ باسىنا كەلىپ، گۇل شوقتارى مەن ويىنشىقتار، شامدار قويا باستادى. مۇنداي ازا تۇتۋ شاراسى ەلىمىزدىڭ بارلىق قالالارىندا ءجۇرىپ جاتىر.
قازاقستان مۇسىلماندارى ءدىني باسقارماسى قارالى وتباسىعا بۇگىن 13 ميلليون تەڭگە اۋدارىلعالى وتىرعانىن حابارلادى. «حازرەت سۇلتان» مەشىتىنىڭ ۇستازى ماقساتبەك قايىرعاليەۆ كەشە 13,4 ميلليون تەڭگە جينالعانىن، بۇل سوما جانۇياعا تابىستالاتىنىن ايتقان. ءىزىن الا استانانىڭ باس يمامى ناۋرىزباي وتپەنوۆ بەس بالاسىنان ايىرىلعان وتباسىعا ءۇي الىپ بەرەتىندەرىن جەتكىزدى.
«ءبىز ولاردىڭ اتا-اناسىمەن سويلەستىك. اقىلداسا كەلە، مەشىت اتىنان باسپانا ساتىپ الىپ بەرەمىز دەپ شەشتىك. ءبىز وسىلاي كەلىستىك»، - دەدى ول.
كاسپي بانك تاراپىنان دا وتباسىعا كومەك بەرىلدى. ءوز قولداۋى رەتىندە بانك قارا جامىلعان وتباسىنىڭ نەسيەسىن جاباتىن بولدى. بولعان وقيعاعا قاتىستى مەملەكەتتىك ورگاندار دا كومەك قولىن سوزۋدا. مادەنيەت جانە سپورت مينيسترلىگىنىڭ قىزمەتكەرلەرى قايعىداعى وتباسى شوتىنا ءبىر كۇندىك جالاقىلارىن اۋدارماق. بۇل جاقسىلىقتىڭ ءبارى دە ەسەڭگىرەگەن اكە-شەشەنىڭ قايعى جۇگىن ءبىر مىسقال دا ازايتا الماس. دەسە دە، ءبارى دە نيەتىمەن كومەك قولىن سوزىپ جاتىر...
ەسكە سالا كەتەيىك، 4- اقپان كۇنى تۇندە «كوكتال-1» تۇرعىن ءۇي الابىندا جەكە ءۇيدىڭ اۋلاسىندا تۇرعىزىلعان ۋاقىتشا باسپانادان ءورت شىقتى.
ءورتتى ءسوندىرۋ بارىسىندا 2006، 2008، 2014، 2016، 2018-جىلدارى تۋعان 5 قىز بالانىڭ دەنەسى تابىلدى. قايعىلى وقيعا كەزىندە بەس بالانىڭ اتا-اناسى تۇنگى جۇمىستا بولعان.
بۇگىن 5 بالانى ەلوردالىقتار اقتىق ساپارعا شىعارىپ سالدى. سونداي-اق، ەلباسى ورتتە قازا بولعان بالالاردىڭ وتباسىنا كوڭىل ايتتى.