ەندى ايازدان ەشبىر ءسابي توڭباسىن
ءورتتى ءسوندىرۋ بارىسىندا 2006, 2008, 2014, 2016, 2018 -جىلعى 5 قىز بالانىڭ دەنەسى تابىلدى. ولاردىڭ كىشىسى نەبارى 11 ايلىق ءسابي ەدى. ءورت كەزىندە بەس بالانىڭ اتا- اناسى تۇنگى جۇمىستا بولعان. بۇگىن 5 بالانى ەلوردالىقتار اقتىق ساپارعا شىعارىپ سالدى. بولعان قارالى وقيعا مۇقىم قازاقتىڭ جۇرەگىن اۋىرتتى، قابىرعاسىن قايىستىردى. اقىندارىمىز بەس پەرىشتەلەرگە ارناپ جوقتاۋ ولەڭدەرىن جازدى.
شاپاعاتشى
.. .بۇل قوعامنىڭ ۇنامادى- اۋ ءبىر ءىسى،
(شەر شولمەگىن بوساتا الار كىم ءىشىپ؟ !)
بەس پەرىشتە - جاسىل قانات بەس ءسابي،
كوككە ۇشىپ كەتە باردى ءتۇن ءىشى.
ۇركەر قايدا - توبەدە مە؟ باتىستا؟
نە جورامال - بۇك ءتۇسىپ بۇل جاتىسقا؟ !
كەتە باردى بەس پەرىشتە - بەس ءسابي،
قالا المادى جالىن قاماپ، وت ۇستاپ.
جىلا، جۇرەك،
جۇدە، كوڭىل، ويازىپ،
بەرەر مە ەكەن كۇن ەمشەگىن، اي ازىق؟
ۇستاپ قالا المادى عوي ارقانىڭ اق شالمالى ايازى.
ەندى ورالماس، مەكەن بولماس كىر عالام
- مىڭ بوياۋلى دۇنيەسىن بۇلداعان.
ەسكە سالىپ ەگىلتەدى بىزدەردى،
كۇل ورنىنا وسكەن رايحان گۇل عانا.
داڭعازاعا بۇرماس قايتا مويىنىن،
ەلىكتىرمەس "ۇيشىك- ۇيشىك" ويىنى.
تەرەزەدەن جاۋتاڭ قاعىپ جانارلار،
تاس قالادان ىزدەمەيدى مەيىرىم.. .
ازام - اۋىر،
قايعىم - قالىڭ، وي - تەرەڭ،
ءبىراق ءبىزدى تۇسىنبەيسىڭ، بايتەرەك.. .
بۇتاعىڭا قوناقتايتىن بالاپان،
اسپانعا اۋىپ كەتە بارسا قايتەر ەڭ؟ !
جۇماق كىرەر - ساراي، حاۋىز،
كىل شاعىي، ەرتەگىلەر الەمىندەي تۇمسا كۇي.
.. .الاقانىن جايىپ ماعان تالپىنىپ،
تۇسىمدە ىلعي ورتەنەدى ءبىر ءسابي.
مەن دە مۇڭدى، تۋعان ولكەم جىراقتا،
قانشا تاعدىر تامۇق كەشىپ، ءجۇر وتتا.
سول ءسابيدى كەۋدەمە اكەپ ارۋلاپ،
جۋىندىرام كوزدەن اققان بۇلاققا.. .
بەس پەرىشتە ءتامامدالماس ساپارى،
شىراق جاعىپ جۇرەر تۇنگە وت الىپ.
.. .شاپاعاتشى بولسىن ساعان سابيلەر،
مەنىڭ سورلى، مەنىڭ ۇلى وتانىم!
مۇرات شايماران
جوقتاۋ
(اشىلسا الاقان، جۇمىلسا جۇدىرىق بولاتىن بەس ساۋساقتى جوقتاۋ)
باسبارماق- اي، باسبارماق،
قاراباۋىر قاسقالداق.. .
جۇرتىڭ سەنى جوقتاۋدا،
جانارىنان جاس پارلاپ.
ءتيتتاي بالان
ۇيرەگىم، جالىن، وتقا كۇيگەنىم.
قالاي جەرگە قيادى ەل،
سۇيىنگەنىن، سۇيگەنىن.
ويبوي، ورتانتەرەگىم،
كەلتە بولدى- اۋ دەرەگىڭ.
مەملەكەتىڭ مەنسىنبەي،
بولدى اللاعا كەرەگىڭ.
شىلدىر، شىلدىر شۇمەگىم،
اتا- اناڭنىڭ كۇنى ەدىڭ.
ءتاتتى- اق ەدى تىلەگىڭ،
ءاپپاق ەدى جۇرەگىڭ.
ەي، كىشكەنتاي بوبەگىم،
ەي، قايعىلى ولەڭىم.
تالبەسىكتەن سۋىرىپ،
جەر بەسىككە بولەدىم.. .
كەتتىك راس كەردەڭدەپ،
تۇرمىن مىنە شەر مەڭدەپ.
قوش دەۋگە دە شارا جوق،
شولاق قولىڭ ەربەڭدەپ.. .
بەيبىت سارىباي
***
قايدا ءجۇر دەپ اتا- انامدى سوكپەڭىز،
قار ۇستىندە تاماق ىزدەپ كەتكەن ءىز.
جەر بەتىنەن جايلى ورىن تابا الماي،
ءتۇن ورتاسى ۇشىپ كەتتىك كوككە ءبىز!
ۋاقىت بوپ، ايىرىلدىق جاس جاننان،
ءومىرىمىز تار بولمەدە باستالعان.
بارلىق بالا باقىتتى ءومىر ءسۇرسىنشى،
ءبىز ولاردى باقىلايمىز، اسپاننان!
قاستارىڭدا بولسىن دايىم اناڭىز،
اكەتايىڭ بولسىن دايىم پاناڭىز،
بۇل ومىردەن پاتەر كورمەي كەتسەك تە،
ۇجىماقتا ءزاۋلىم ساراي سالامىز!
ەندى ايازدان ەشبىر ءسابي توڭباسىن،
جاۋقازىن گۇل اشپاي جاتىپ سولماسىن،
ۇرپاعىڭنىڭ جارىق بولىپ ماڭدايى،
وتانىمدا ەش جاماندىق بولماسىن!!!
كەڭشىلىك تىشقان
***
قايران اكە،
وت ورانىپ وزەگىڭ،
اياز- قايعى قارىدى.
سورلى شەشەي، تارتىلدى عوي وزەنىڭ،
كىمگە جەتەر زار ءۇنىڭ؟ !
بەس بالاڭدى قۇرىقتادى تەز ءولىم،
قىزعالداقتار قىرشىن قيدى تامىرىن.
اجال- وتى ەرتە سالدى- اۋ كەزەگىن،
قۇلىنشاقتار قۇشاقتاتتى- اۋ قابىرىن!
كىم ءبىلىپتى، ەت جۇرەكتى ەزەرىن؟ !
قايران اكەي! سورلى شەشەي!
قورعان بولسىن سابىرىڭ!
مەرەي قارت
***
جارىق كۇنىم تۇنگە اينالدى،
شاتتىق ءۇنىم مۇڭعا اينالدى.
اپپاق ارمان كۇلگە اينالدى،
ءۇمىت، سەنىم قۇمعا اينالدى.. .
بەس كۇن تىرلىك.. . بەس كۇندىگىم.. .
كەشىرمەستى كەشتىم بۇگىن! .. .
جاڭا عانا ءبۇر جارعان- دى
كەتتى ءۇزىلىپ وسكىن گۇلىڭ. ...
ء اربىر ءساتىن جەڭىس كورەر
ءبىز بە وسى ەڭ ۇستەم ەل؟ ! .. .
اياۋسىز- اق ۇشتى كوككە
ەڭ اياۋلى پەرىشتەلەر.. .
ءومىر ءسۇرىپ جىن- قوعامدا.
قورلانام دا، جىندانام دا؟ !
... ءوزى- اق وتقا تاستاي سالار
نالەت وندا، تۇل قوعامعا! .. .
جارىق كۇنىم تۇنگە اينالدى،
شاتتىق ءۇنىم مۇڭعا اينالدى
اپپاق ارمان كۇلگە اينالدى،
ءۇمىت، سەنىم قۇمعا اينالدى.. .
سايان ەسجان
***
كۇن قاتتى بوران دەيدى، ەرتەڭ دەيدى،
بورانعا كەشەگىنىڭ دەرتى ولمەيدى.
بولار ما اياز قاتتى ودان اسقان،
جۇرەگىڭ وعان نەگە ورتەنبەيدى؟ !
بولا الماي شىرىل ۇنگە ەشكىم قورعان،
بۋداقتاپ تۇنگە ءسىڭىپ كوشتىڭ بە ارمان؟ !
ءبىر شارپىپ جۇرەكتەردى ءوتتى- اۋ بۇگىن،
بەس ءسابي - بەس كۇن جالعان.
اقپاننىڭ ازا ءتۇنى نەنى ۇقتىردىڭ،
قاندايلىق قاسىرەتكە جولىقتىردىڭ؟ !
.. .كوڭىلسىز حاتتار ءالى كەلىپ جاتىر،
قالشىلداپ توڭىپ تۇرمىن.. .
اسىلان تىلەگەن
Massaget.kz