نۇرسۇلتان نازاربايەۆ كونستيتۋتسيالىق كەڭەسكە جۇگىنۋ سەبەبىن ءتۇسىندىردى

 استانا. قازاقپارات - ق ر پرەزيدەنتى نۇرسۇلتان نازاربايەۆ ەلىمىزدىڭ كونستيتۋتسيالىق كەڭەسىنە جۇگىنۋ سەبەبىن ءتۇسىندىردى، دەپ حابارلايدى قازاقپارات ءتىلشىسى.

«قازاقستان رەسپۋبليكاسىنىڭ كونستيتۋتسياسى قابىلدانعان 1995 -جىلدان باستاپ قازىرگى ۋاقىتقا دەيىن كونستيتۋتسيالىق كەڭەسكە 220, ونىڭ ىشىندە 22 پرەزيدەنتتىك جۇگىنۋ جىبەرىلدى. «ق ر كونستيتۋتسيالىق كەڭەسى تۋرالى» زاڭعا سايكەس كونستيتۋتسيالىق كەڭەس كونستيتۋتسيانى رەسمي ءتۇسىندىرۋ قۇقىعىنا يە. زاڭنامادا ولقىلىقتاردىڭ بولۋى قالىپتى قۇبىلىس سانالادى. ماسەلەن، كونستيتۋتسيادا پرەزيدەنتتىڭ اۋىسۋ شارتتارى ايقىندالماعان، سونىمەن قاتار ونىڭ وتستاۆكاعا ەرىكتى تۇردە كەتۋ جاعدايى قاراستىرىلماعان. الەمنىڭ بارلىق كونستيتۋتسيالارىندا مۇنداي نورما بار. بۇل اسپەكتىنىڭ ۇلكەن وزەكتىلىگىنە بايلانىستى كونستيتۋتسيالىق كەڭەسكە وسى قاعيدانى ءتۇسىندىرۋدى ءوتىندىم» ، - دەدى ەلباسى اقوردا تاراتقان ۆيدەوماتەريالدا.

ق ر پرەزيدەنتى بۇگىندە قوعامنىڭ سايلاۋ ماسەلەسىنە قىزىعۋشىلىق تانىتىپ وتىرعاندىعىن دا اتاپ وتكەن.

«دەگەنمەن، بۇل تاقىرىپتىڭ توڭىرەگىندە دۇربەلەڭ تۋدىرۋدىڭ قاجەتى جوق. ەل كونستيتۋتسياسىندا، «قازاقستان رەسپۋبليكاسىنىڭ پرەزيدەنتى تۋرالى» كونستيتۋتسيالىق زاڭدا سايلاۋلاردى وتكىزۋ ءتارتىبى مەن ۋاقىتى، وكىلەتتىلىكتىڭ اياقتالۋ مەرزىمى ناقتى جازىلعان. كونستيتۋتسيا اياسىندا پرەزيدەنتتىڭ مەرزىمىنەن بۇرىن سايلاۋ جاريالاۋعا قۇقىعى بار. ءبىراق، مۇنداي جاعداي ورىن المايدى. سوندىقتان تىنىشتىق ساقتاپ، كۇندەلىكتى قىزمەتپەن اينالىسۋدى جالعاستىرا بەرۋ قاجەت» ، - دەدى نۇرسۇلتان نازاربايەۆ.