ەلباسى ورتتە قازا بولعان بالالاردىڭ وتباسىنا كوڭىل ايتتى

استانا. قازاقپارات - ق ر پرەزيدەنتى نۇرسۇلتان نازاربايەۆ استانا قالاسىنداعى ءورت سالدارىنان قازا بولعان بالالاردىڭ اتا-اناسى مەن تۋىسقاندارىنا كوڭىل ايتتى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

«كەشە استانادا اۋىر قايعىلى وقيعا بولدى. ءورت سالدارىنان ءبىر وتباسى بەس بىردەي پەرزەنتىنەن ايىرىلىپ قالدى.

قازا بولعان بالالاردىڭ اتا-اناسى مەن تۋىسقاندارىنا كوڭىل ايتامىن.

وسىعان بايلانىستى مەن ۇكىمەتكە جانە استانا قالاسىنىڭ اكىمى باقىت سۇلتانوۆقا زارداپ شەككەندەرگە قاجەتتى كومەك كورسەتۋدى تاپسىردىم.

بارلىق ءوڭىردىڭ اكىمدەرى قۇزىرلى ورگاندارمەن بىرلەسىپ، ءورت قاۋىپسىزدىگىن قامتاماسىز ەتۋ ءۇشىن باقىلاۋدى كۇشەيتۋى كەرەك، سونداي-اق ءتيىستى تەكسەرىستەر ۇيىمداستىرىپ، حالىق اراسىندا ءتۇسىندىرۋ جۇمىستارىن جۇرگىزۋى قاجەت.

مۇنداي جاعداي قايتالانباس ءۇشىن بارلىق ءتيىستى شارالاردى قابىلداعان ءجون»، - دەلىنگەن حابارلامادا.

ەسكە سالا كەتەيىك، 4- اقپان كۇنى تۇندە «كوكتال-1» تۇرعىن ءۇي الابىندا جەكە ءۇيدىڭ اۋلاسىندا تۇرعىزىلعان ۋاقىتشا باسپانادا ءورت شىقتى. ءورتتى ءسوندىرۋ بارىسىندا 2006، 2008، 2014، 2016، 2018-جىلعى 5 قىز بالانىڭ دەنەسى تابىلدى. ولاردىڭ كىشىسى نەبارى 11 ايلىق ءسابي ەدى.

ءورت كەزىندە بەس بالانىڭ اتا- اناسى تۇنگى جۇمىستا بولعان.

بۇگىن 5 بالانى ەلوردالىقتار اقتىق ساپارعا شىعارىپ سالدى.